တက္ကသိုလ်လေ့ကျင့်ရေးတပ်ဖွဲ့ဝင် ဆရာ၊ ဆရာမနဲ့ ကျောင်းသားတွေကို စစ်သင်တန်းပေးနေတယ်လို့ စစ်ကောင်စီက အောက်တိုဘာ ၁ ရက် ညက ထုတ်ပြန်ပါတယ်။
Non-CDM ကျောင်းဆရာမတယောက်က “ဒီလိုအခြေအနေမျိုးမှာ ဘယ်သူက သူတို့ရဲ့ စစ်သင်တန်းကို တက်ချင်မှာလဲ။ ကျမတို့လည်း ကြောက်တယ်။ တက်ရမယ်လို့ စာထွက်ထားတာ။ မဖြစ်မနေကို တက်ရမယ်တဲ့။ ဒီသင်တန်းကို တက်ရမယ်လို့ ပြောနေကြကတည်းက ကျမတို့ အလုပ်ထွက်ချင်စိတ်ပေါက်တယ်။ ဒါပေမဲ့လည်း မိဘတွေကကျတော့ လူကြီးတွေဆိုတော့ ကြောက်တယ်လေ။ မတက်ရင် စစ်တပ်က ဖမ်းလိမ့်မယ် ဆိုပြီး ပြောတယ်။ ဒီအချိန်မှာမှ အလုပ်ထွက်စာတင်ရင်လည်း စစ်လားဆေးလား လုပ်မယ်လေ။ ဒါကြောင့် တက်ရတာ” လို့ ပြောပါတယ်။
အဲဒီစစ်သင်တန်းကို ကာကွယ်ရေးဦးစီးချုပ်ရုံး(ကြည်း)၊ ပြည်သူ့စစ်၊ နယ်ခြားတပ်များ ညွှန်ကြားရေးမှူးရုံးတွေရဲ့ တက္ကသိုလ်လေ့ကျင့်ရေးတပ်တွေက သင်ပေးနေတာ ဖြစ်ပါတယ်။
ထုတ်ပြန်ချက်မှာ စစ်သင်တန်းတက်နေတဲ့ ဆရာ၊ ဆရာမ၊ ကျောင်းသားတွေက သူတို့ကိုယ်တိုင် ဆန္ဒပြုတဲ့သူတွေ ဖြစ်တယ်လို့လည်း ဖော်ပြထားပါတယ်။
စစ်သင်တန်းဖွင့်ပွဲတွေကို အောက်တိုဘာ ၁ ရက်က နေပြည်တော်ကောင်စီနယ်မြေ၊ ရှမ်းပြည်နယ်(တောင်ပိုင်း) ဗထူးတပ်မြို့၊ မွန်ပြည်နယ် ချောင်းဆုံမြို့၊ ရန်ကုန်တိုင်း မှော်ဘီမြို့၊ ဧရာဝတီတိုင်း ပုသိမ်မြို့နဲ့ ပဲခူးတိုင်း တောင်ငူမြို့တွေမှာရှိတဲ့ နယ်မြေခံ သင်တန်းကျောင်းတွေမှာ လုပ်တာ ဖြစ်ပါတယ်။
သင်တန်းတွေက ပထမနှစ် အခြေခံစစ်ပညာသင်တန်း၊ ဒုတိယနှစ် အခြေခံစစ်ပညာသင်တန်း၊ ပထမနှစ် တန်းမြင့်စစ်ပညာသင်တန်း၊ ဒုတိယနှစ် တန်းမြင့်စစ်ပညာသင်တန်းတွေ ဖြစ်ပြီးတော့ သာမန်သင်တန်းချိန်နဲ့ စခန်းချလေ့ကျင့်ချိန်အလိုက် သင်ကြားပေးသွားမှာ ဖြစ်တယ်လို့ ဖော်ပြထားပါတယ်။
