မန္တလေးတိုင်း၊ ညောင်ဦးခရိုင်၊ ကျောက်ပန်းတောင်းမြို့နယ် မကျဉ်းတိုင်း ကျေးရွာအနီး ကြက်မောက် တောင်ရေလှောင်တမံ ရေပိုလွှဲကနေ ရေကျော်နေတဲ့အတွက် မိတ္ထီလာ-ကျောက်ပန်းတောင်း ကားလမ်းပိုင်းကို ယာယီပိတ်ထားရပြီး ယာဥ်တွေပိတ်ဆို့နေတယ်လို့ မြေပြင်ကူညီ ကူညီကယ်ဆယ်ရေးအဖွဲ့တွေဆီက သိရပါတယ်။

ကျောက်ပန်းတောင်းမြို့နယ်မှာ စက်တင်ဘာ ၂၉ ရက်နဲ့ ၃၀ ရက်မှာ ရက်ဆက် မိုးများစွာ ရွာသွန်းခဲ့လို့ ကြက်မောက်တောင် ရေလှောင်တမံမှာ ရေပိုလွှဲက ရေကျော်တက် များပြားနေတာကြောင့် ခရီးသွားပြည်သူတွေ ဘေးအန္တရာယ်ကင်းရှင်းရေးအတွက် ကျောက်ပန်းတောင်း-မိတ္ထီလာသွား ကားလမ်း မိုင်တိုင်အမှတ် ၅၁ မိုင် ၄ ဖာလုံကနေ ၇ ဖာလုံကြားကို ခရီးသွားလာဖြတ်သန်းမှု ယာယီပိတ်ထားတာလို့ သိရပါတယ်။

အခြေအနေကို သိရှိတဲ့သူတယောက်က “သက်ဆိုင်က ကားလမ်းကို ပိတ်လိုက်တာပါ။ အန္တရာယ် ရှိတဲ့အခြေအနေမို့ ပိတ်တာ။ ကားလမ်းပေါ် ရေက တော်တော် ကျော်တက်နေတာ။ ရေက လျော့ကျမသွားသေးဘူး။ ရပ်တန့်နေရတဲ့ ကားတွေမနည်းဘူး” လို့ ပြောပါတယ်။

မိုးသည်းထန်စွာ ရွာသွန်းတာကြောင့် ကြက်မောက်တောင် ရေလှောင်တမံ ရေပိုလွှဲကနေ ရေကျော်နေတဲ့အတွက် ပန်းတောင်း-မိတ္ထီလာ ကားလမ်း မိုင်တိုင်အမှတ် ၅၁ မိုင်၊ ၄ ဖာလုံကနေ ၇ ဖာလုံကြားအထိ နဲ့ ဆည်ရေမြောင်းတလျှောက် မြေနိမ့်ရာနေရာတွေမှာ ရေ ၅ ပေကနေ ၆ ပေကျော်အထိ ရေတက်နေတယ်လို့ သိရပါတယ်။

ဒေသခံတယောက်က “အခုရေကျော်ကျနေတဲ့ ကြက်မောက်တောင်ဆည်က ဘယ်တုန်းကမှ အခုလို မဖြစ်ခဲ့တာ။ အခု ကားလမ်ဘေးက တချို့အိမ်တွေဆို နေမြုပ်နေပြီ။ ကားတွေသွားရင် အန္တရာယ် အရမ်းများတယ်” လို့ ပြောပါတယ်။

ရေကြီးရေလျှံဖြစ်နေတဲ့ ကျောက်ပန်းတောင်း-မိတ္ထီလာကားလမ်းမှာ နယ်မြေခံမီးသတ်တပ်ဖွဲ့တွေ၊ လူမှုကူညီရေးအသင်းတွေက ကူညီကယ်ဆယ်ရေးလုပ်ငန်းတွေ လုပ်ဆောင်ပေးနေတယ်လို့ သိရပါတယ်။

ပိတ်ထားရတဲ့ လမ်းပိုင်းကို ရေကျော်မှု လျော့ကျသွားရင် ပြန်လည်ဖြတ်သန်းခွင့်ပြုမယ်လို့ သိရပါတယ်။