မြန်မာပြည်တွင်း စစ်ဆင်ရေးတွေမှာ လေယာဉ်တွေ၊ ရဟတ်ယာဉ်တွေ မကြာခဏ ပျက်ကျ၊ ပစ်ချခံနေရတဲ့ စစ်ကောင်စီတပ်အတွက် ရုရှားနိုင်ငံက Mi-38 T ရဟတ်ယာဉ် ၃ စီးကို အခု စက်တင်ဘာလထဲမှာ ပို့ဆောင်ပေးခဲ့ပါတယ်။

DVB က ရရှိထားပြီး ပေါက်ကြားလာတဲ့စာတွေအရ ဝယ်ယူခဲ့တဲ့ ရဟတ်ယာဉ် ၃ စီးထဲ တစီးဟာ အရေးကြီးပုဂ္ဂိုလ်တွေ စီးနင်းဖို့ ဇိမ်ခံပစ္စည်းတွေနဲ့ မွမ်းမံထားပြီး ကျန် ၂ စီးကတော့ သယ်ယူပို့ဆောင်ရေး ပုံစံတွေ ဖြစ်ပါတယ်။

ဒီ ၃ စီးအတွက် ကုန်ကျငွေက ယူရို သန်း ၆၀ နီးပါးဖြစ်ပြီး လေယာဉ်မှူးနဲ့ မြေပြင်ထိန်းသိမ်းရေး သင်တန်းတွေအတွက် ယူရို ၂ သန်းကျော် ထပ်မံကုန်ကျခဲ့တယ်လို့ သိရပါတယ်။

မင်္ဂလာဒုံလေတပ်-CDM ကိုဇေယျက “ပြောမယ်ဆိုရင် ဒီကောင်တွေက အစောကြီးကတည်းက မှာဖို့လုပ်ထားပေမဲ့ စစ်ဆင်ရေးလိုအပ်ချက်အရ Mi-17 တွေကို ဦးစားပေးမှာလိုက်တယ်ဆိုတဲ့ သဘောဖြစ်သွားတယ်။ ဒါကြောင့်မလို့ အရင်နှစ်က Mi-17 တွေရောက်တာ။ ဒီနှစ်မှ ဒီကောင်က ရောက်တာပေါ့။ နောက်ကျနေတာ တကယ်တော့။ ပမာဏနည်းသေးတော့။ နောက်တခုက ဒီကောင်တွေ ဝယ်ရတဲ့ ရည်ရွယ်ချက်က ဒါတွေက တကယ်တော့ VIP သုံးဖို့၊ ခရီးစဉ်တွေမှာသုံးဖို့ ဝယ်တာပေါ့နော်။ မင်းအောင်လှိုင် စီးဖို့အတွက် တစီး ပါတယ်ပေါ့နော်။ VIP စီးပေါ့။ အရင်တုန်းကတော့ Mi-17 မှာပဲ တစီးကို မင်းအောင်လှိုင် စီးဖို့ဆိုပြီး ခွဲထားတာ။ Mi-17 က လူ ၂၅ ယောက်ပဲ ဆံ့တာ။ ဒီကောင်က ပိုဆံ့တာပေါ့နော်” လို့ ပြောပါတယ်။

အခု အသစ်ရောက်လာတဲ့ Mi-38 T ရဟတ်ယာဉ်ဟာ အင်ဂျင် ၂ လုံးတပ် အလတ်စား ဘက်စုံသုံး သယ်ယူပို့ဆောင်ရေးယာဉ်ဖြစ်ပြီး Mi-17 ရဟတ်ယာဉ်တွေ ထုတ်တဲ့ Russian Helicopters ရဲ့ နောက်ထပ်စက်ရုံတခုဖြစ်တဲ့ Kazan Helicopters စက်ရုံကနေ ထုတ်လုပ်ပါတယ်။

ဒီရဟတ်ယာဉ်ဟာ ညဘက်တွေ၊ ရာသီဥတု ပြင်းထန်တဲ့နေရာတွေနဲ့ ပူလွန်း၊ အေးလွန်းတဲ့ ဒေသတွေမှာ မောင်းနှင်နိုင်အောင် တည်ဆောက်ထားပြီး ရှာဖွေကယ်ဆယ်ရေးတွေအတွက်ပါ အသုံးပြုနိုင်ပါတယ်။

စစ်သည် အယောက် ၄၀၊ ကုန်အလေးချိန် ၅ တန်ကျော်အထိ သယ်ယူနိုင်ပြီး အမြင့်ပေ ၂၀,၀၀၀ ဝန်းကျင်၊ တနာရီ ကီလိုမီတာ ၂၉၀ အထိနဲ့ ကီလိုမီတာ ၁,၀၀၀ ကျော်ကို မရပ်မနား ပျံသန်းနိုင်ကြောင်း ကုမ္ပဏီရဲ့ အချက်အလက်တွေမှာ ဖော်ပြပါတယ်။ Mi-38 T တွေက မြန်မာစစ်တပ်အတွက် ဘယ်လောက် အသုံးဝင်လာနိုင်ပါသလဲ။ 

မြန်မာ့စစ်ဘက်ရေးရာနဲ့ လုံခြုံရေးဆိုင်ရာလေ့လာရေးအဖွဲ့ (MDSI) ရဲ့ တာဝန်ရှိသူတယောက်က “Mi-17 နေရာမှာအစားထိုးဖို့ပေါ့နော်။ Mi-17 ထက်ကို သူကစွမ်းဆောင်ရည် ၂ ဆပေါ့နော်။ အဓိက သယ်ယူပို့ဆောင်ရေးဆိုတဲ့အတွက်ကို ရှေ့တန်းစခန်းတွေမှာ အရင်ကထက် ၂ ဆ ပိုပြီး ဖြည့်ဆည်းနိုင်မှာပေါ့။ သူတို့ဘက်က အများကြီးအကျိုးရှိတာပေါ့။ မြေပြင်မှာ လမ်းကြောင်းတွေ ဖြတ်တောက်ထားတော့ အရေးပေါ် အချိန်တိုအတွင်း အင်အားဖြည့်တာ၊ ရွှေ့ပြောင်းတာတွေ ထိရောက်မှာပေါ့။ သူ့ရဲ့အားနည်းချက်က Mi-17 လိုပါပဲ။ Mi-17 ကို ပစ်ချနိုင်ရင် သူ့ကိုလည်း ပစ်ချနိုင်ဖို့ အလားအလာရှိတာပေါ့။ သူကျတော့ ယာဉ်ကနည်းနည်းကြီးတော့ အတက်၊ အဆင်းမှာ နေရာကျယ်ကျယ် လိုတယ်။ နောက်ပြီး လေယာဉ်လည်း ပိုကြီးမယ်ဆိုတော့ လက်နက်ရှိရင် ရှိသလိုပေါ့။ ပေ ၂၀,၀၀၀ ဆိုတာ ပျံတက်နိုင်တဲ့ အမြင့်ဆုံးကို ပြောတာပါ။ အဝေးကြီးတွေသွားမှ အမြင့်ကြီး တက်လို့ရတယ်၊ နီးနီးနားနားဆို တက်လို့မရဘူး၊ ဗုံးကြဲတာတွေကတော့ Y-12 တွေပဲရှိမယ်”လို့ ပြောပါတယ်။

ရဟတ်ယာဉ်ကွင်း အကျယ်အဝန်း၊ ကျည်ကာတပ်ဆင်တာနဲ့ လေ့ကျင့်ပျံသန်းတာတွေ ပြုလုပ်ရမှာကြောင့်  စစ်ဆင်ရေးတွေမှာ ချက်ချင်းအသုံးပြုနိုင်ဦးမှာ မဟုတ်သေးဘဲ အချိန် ၄ လကနေ ၆ လ ဝန်းကျင်လောက် ယူရနိုင်တယ်လို့ သူက သုံးသပ်ပါတယ်။

တဖက်မှာလည်း စစ်တပ်အာဏာသိမ်းပြီးနောက်ပိုင်း ပျက်ကျ/ ပစ်ချခံရတဲ့ စစ်လေယာဉ်နဲ့ ရဟတ်ယာဉ် အစီး ၂၀ ရှိကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက စက်တင်ဘာ ၇ ရက်မှာ ထုတ်ပြန်ထားပါတယ်။ 

အဲဒီအထဲမှာ ရဟတ်ယာဉ် ၁၀ စီး ပါဝင်ပြီး Mi-17 ရဟတ်ယာဉ်ကတော့ ၆ စီး အထိ ရှိတာကို တွေ့ရပါတယ်။

စစ်ခေါင်းဆောင်ဟာ ဘယ်လာရုစ်နိုင်ငံမှာ ပြုလုပ်ခဲ့တဲ့ ဥရောပ-အာရှ စီးပွားရေးဖိုရမ် ကနေအပြန်မှာ ရုရှားနိုင်ငံ၊ ကိုယ်ပိုင်အုပ်ချုပ်ခွင့်ရ ဘူရားတီးရားပြည်နယ်မှာရှိတဲ့ Ulan-Ude လေကြောင်း စက်ရုံကို သွားရောက် လေ့လာခဲ့ပါသေးတယ်။

စိုးသူအောင်