ရန်ကုန်တိုင်းထဲမှာ ဖွင့်ထားတဲ့ စက်ရုံတချို့ အထည်အော်ဒါမရတာနဲ့ ဆက်လည်ပတ်ဖို့ အခက်အခဲတွေ ရှိတာကြောင့် ပိတ်သိမ်းဖို့ရှိတယ်လို့ အဲဒီလုပ်ငန်းနဲ့နီးစပ်သူတွေဆီက သိရပါတယ်။

တဆင့်ခံလက်ခစား (CMP) စက်ရုံတွေအနေနဲ့ ပြည်ပအပ်ထည်ကို အားပြုလုပ်ကိုင်နေရတာ ဖြစ်ပြီး အော်ဒါလျော့နည်းလာတာ၊ ကုန်ကြမ်းဈေးနှုန်းကြီးမြင့်တာနဲ့ လျှပ်စစ်မီးလို အခြေခံလိုအပ်ချက်အတွက် ကုန်ကျစရိတ်များနေတာကြောင့် ဆက်ရပ်တည်ဖို့ ခက်လာတာလို့ ဆိုပါတယ်။

သာဓုကန်စက်မှုဇုန်က စက်ရုံအုပ်ချုပ်ရေးပိုင်း မန်နေဂျာတယောက်က “ဒီဘက်က စက်ရုံနှစ်ရုံ ပိတ်ဖို့ ပြင်နေတာရှိတယ်။ သူတို့က အဓိကအော်ဒါမရတော့လို့။ စက်ရုံပိတ်မှာမို့လို့ အဲဒီစက်ရုံတွေက အလုပ်သမားတွေ တခြားစက်ရုံတွေမှာ အလုပ်ကြိုလျှောက်နေကြတယ်” လို့ ပြောပါတယ်။

လှိုင်သာယာမြို့နယ်၊ ရွှေလင်ဗန်းစက်မှုဇုန်မှာဖွင့်ထားတဲ့ SDI အထည်ချုပ်စက်ရုံလည်း အော်ဒါအခက်အခဲကြောင့် ပိတ်သိမ်းဖို့ပြင်နေပြီး နစ်နာကြေးရရှိဖို့ အကျေအလည် ဆွေးနွေးနေသလို အလုပ်သမားတွေက အကူအညီတောင်းထားတယ်လို့ မြန်မာနိုင်ငံ ကုန်ထုတ်နှင့်စက်မှုလက်မှု အလုပ်သမားများအဖွဲ့ချုပ် (IWFM) က ထုတ်ပြန်ထားပါတယ်။

ပြည်တွင်းအလုပ်သမားအရေး လှုပ်ရှားသူတယောက်က “စက်ရုံတချို့က ပိတ်တယ်ဆိုပြီး နာမည်ပြောင်း ဖွင့်တတ်တာတွေလည်း ရှိတယ်။ တကယ်ပိတ်ခဲ့ရင်တောင် ဂုဏ်သိက္ခာရှိရှိနဲ့ ပေးသင့်တဲ့ နစ်နာကြေးတွေ ပေးချေဖို့ တာဝန်ရှိတယ်” လို့ ပြောပါတယ်။

မြန်မာနိုင်ငံမှာ စစ်တပ်အာဏာသိမ်းပြီးတဲ့နောက်မှာ ဥရောပထုတ်ကုန်ချုပ်လုပ်တဲ့ စက်ရုံတချို့ ပိတ်သိမ်းထွက်ခွာသွားတဲ့ ဖြစ်ရပ်တွေရှိခဲ့ပါတယ်။

လက်ရှိမှာလည်း အပြည်ပြည်ဆိုင်ရာအလုပ်သမားရေးရာအဖွဲ့ (ILO)က မြန်မာနိုင်ငံကို ပုဒ်မ ၃၃ ကျင့်သုံးဖို့ ဆုံးဖြတ်ထားတာကြောင့် ပိတ်ဆို့အရေးယူမှုတွေရှိလာနိုင်တဲ့အပေါ် အထည်ချုပ်လုပ်ငန်း အသိုင်းအဝိုင်းက အခြေအနေစောင့်ကြည့်နေကြပါတယ်။