စစ်ကိုင်းတိုင်း၊ ဝက်လက်မြို့နယ် အရှေ့တောင်ဘက်ခြမ်းက တပ်သာ (အောက်) ကျေးရွာကို စစ်တပ်စစ်ကြောင်းက စက်တင်ဘာ ၁၈ ရက်နေ့မှာ စတင်မီးရှို့ဖျက်ဆီးနေတယ်လို့ ဒေသခံတွေဆီကနေ သိရပါတယ်။

Wetlet Informational Network ရဲ့ ပြန်ကြားရေးတာဝန်ရှိသူက “တပ်သာ (အောက်) ရွာကို မီးရှို့နေတာ ၁၈ ရက်နေ့ ညနေ ၅ ခွဲလောက်ကတည်းကပေါ့နော်။ ရွာတောင်ပိုင်းကစရှို့ခံရတာ။ မြင်ရတဲ့အနေအထားကတော့ များတယ်ဗျ။ အဲဒီရွာမှာ အိမ်ခြေအားဖြင့်တော့နည်းတယ်။ ၁၀၀ ဝန်းကျင်လောက်ပဲရှိမှာပေါ့။ ရွာခံတွေလည်း ထွက်ပြေးနေကြတယ်” လို့ ပြောပါတယ်။

စစ်ကိုင်းမြို့အခြေစိုက် အမှတ် ၃၃ ခြေမြန်တပ်မဌာနချုပ်က စစ်တပ်ဟာ စက်တင်ဘာ ၁၆ ရက်နေ့ကစလို့ တပ်သာ (အထက်) ရွာနဲ့ တပ်သာ (အောက်) ရွာကို ဝင်ရောက်တပ်စွဲနေကြတာလို့ ဆိုပါတယ်။

ဝက်လက်မြို့နယ် ပြည်သူ့ကာကွယ်ရေးတပ်ဖွဲ့ရဲ့ ပြန်ကြားရေးတာဝန်ခံ ကိုအလင်းရောင် က “သူတို့အင်အား ၁၅၀ လောက်ပါတယ်လို့ ခန့်မှန်းတယ်။ ရောက်လာကတည်းက တပ်သာ (အထက်) ရွာမှာ တပ်စွဲနေကြတယ်။ တပ်သာ (အထက်) ရွာက ကြီးတယ်။ အိမ်ခြေ ၃၀၀ ဝန်းကျင်လောက်ရှိတယ်။ အဲဒီရွာကိုတော့ မီးရှို့တာမလုပ်သေးဘူး။ အခု အရှို့ခံရတာက တပ်သာ (အောက်) ရွာပါ။ ရွာခံတွေ​လည်း ဘေးလွတ်တဲ့နေရာတွေကို ထွက်ပြေးနေကြတယ်။ စစ်ကြောင်းက ပြန်ထွက်မသွားသေးတော့ အန္တရာယ်အရမ်းများတယ်။ အဲဒါကြောင့် နယ်မြေရှင်းလင်းရေး မဝင်ရသေးတော့ ထိခိုက်ပျက်စီးတာကို အတိအကျမသိရသေးတာပါ” လို့ DVB ကို ပြောပါတယ်။

စက်တင်ဘာ ၁၉ ရက်နေ့ ညနေပိုင်းအထိ စစ်တပ်စစ်ကြောင်းနဲ့ တော်လှန်ရေးတပ်ဖွဲ့တွေ တိုက်ပွဲဖြစ်တာ မရှိသေးဘူးလို့လည်း သူက ဆက်ပြောပါတယ်။

တိုက်ပွဲတွေဖြစ်လာနိုင်တဲ့အတွက် စစ်တပ်စစ်ကြောင်းအသုံးပြုနေတဲ့ ဝက်လက်မြို့နယ်ထဲက  အမှတ် ၃ ဗျူဟာလမ်းပိုင်းပေါ်မှာရှိတဲ့ တလိုင်းရွာနဲ့ ရှိမ္မကားကျေးရွာကြားက လမ်းပိုင်းကို ပြည်သူတွေအနေနဲ့  ဖြတ်သန်းသွားလာတာတွေ မလုပ်ကြဖို့လည်း တော်လှန်ရေးတပ်ဖွဲ့တွေက သတိပေး ထုတ်ပြန်ထားတယ်လို့ သိရပါတယ်။