ဖိလစ်ပိုင်မြို့တော် မနီလာမြို့၊ တွန်ဒို လူနေရပ်ကွက်က ပျံကျအိမ်တွေမှာ စက်တင်ဘာ ၁၃ ရက် နှောင်းပိုင်းက မီးလောင်ကျွမ်းခဲ့ပြီး မိသားစု ၁,၀၀၀ ကျော် အိုးမဲ့အိမ်မဲ့ဖြစ်ခဲ့ရပါတယ်။

မနီလာ စံတော်ချိန် ည ၈ နာရီလောက်မှာ မီးစတင်လောင်ကျွမ်းခဲ့ပြီး လူထူထပ်တဲ့ အိမ်တွေကနေတဆင့် အမြန် ပျံ့နှံ့သွားခဲ့တာပါ။

မီးသတ်ဌာန BFP နဲ့ စေတနာ့ဝန်ထမ်း မီးသတ်တပ်ဖွဲ့တွေက စက်တင်ဘာ ၁၄ ရက် မနက် ၂ နာရီ ၄၆ မိနစ်မှာ မီးလောင်မှုကို ထိန်းချုပ်နိုင်ခဲ့ပြီး မနက် ၆ နာရီမှာ အပြီးငြှိမ်းသတ်နိုင်ခဲ့တယ်လို့ ကြေညာခဲ့ပါတယ်။

တညလုံး မီးငြှိမ်းသတ်နေတဲ့ မီးသတ်ကားအများအပြားက အိမ်တွေပေါ်ကို မီးသတ်ကားတွေနဲ့ ရေဖျန်းခဲ့ကြပုံကို ဒရုန်းယာဉ်တွေနဲ့ ရိုက်ကူးထားတဲ့ ရုပ်သံထဲမှာ တွေ့ရပါတယ်။

ဒေသန္တရအစိုးရရုံးတွေက ကယ်ဆယ်ရေးလုပ်ငန်းတွေကို ညှိနှိုင်း ဆောင်ရွက်နေပါတယ်။ မိသားစု ၁,၁၀၀ ကျော် အိုးမဲ့အိမ်မဲ့ဖြစ်ခဲ့ရပြီး စာသင်ကျောင်းတွေမှာ ခဏ နေထိုင်ရပါတယ်။ မီးလောင်မှုအတွင်း လူသေဆုံးမှုမရှိဘူးလို့ BFP က ဆိုပါတယ်။

ဖိလစ်ပိုင်နိုင်ငံဟာ အဆောက်အအုံတွေ၊ အိမ်တွေနဲ့ ရုံးခန်းတွေမှာ မီးဘေးလုံခြုံရေးကို ကြပ်မတ်ဆောင်ရွက်ရာမှာ ဟာကွက်ရှိတဲ့ မှတ်တမ်းတွေ ရှိနေပါတယ်။

ဩဂုတ်လတုန်းက မနီလာမြို့ တရုတ်တန်းမှာ ငါးထပ်တိုက်ခန်း မီးလောင်လို့ လူ ၁၁ ယောက် သေဆုံးခဲ့ပါတယ်။

Source: Reuters