စစ်ကိုင်းတိုင်းအတွင်းက ကလေး-ဂန့်ဂေါ လမ်းပေါ်မှာ ပြီးခဲ့တဲ့စက်တင်ဘာလ ၅ ရက်နေ့ကစလို့ စစ်တပ်စစ်ကြောင်းနဲ့ ပြည်သူ့ကာကွယ်ရေးတပ်ဖွဲ့တွေ တိုက်ပွဲတွေပြင်းထန်နေတယ်လို့ တော်လှန်ရေးတပ်ဖွဲ့ဝင်တွေဆီကနေ သိရပါတယ်။

ဒေသခံ ပြည်သူ့ကာကွယ်ရေးတပ်ဖွဲ့ဝင်တယောက်က “ကလေးမြို့နယ်တောင်ပိုင်းမှာရှိတဲ့ ကလေး-ဂန့်ဂေါကားလမ်းမပေါ်မှာ စစ်တပ်စစ်ကြောင်းက အင်အားအလုံးအရင်းနဲ့ စစ်ကြောင်းထိုးလာလို့ တိုက်ပွဲတွေပြင်းထန်နေတာ တပတ်လောက်ရှိနေ​ပြီ” လို့ ပြောပါတယ်။

ကလေး-ဂန့်ဂေါကားလမ်းပိုင်းကို ချင်းကာကွယ်ရေးတပ်ဖွဲ့တွေနဲ့ ပြည်သူ့ကာကွယ်ရေး တပ်ဖွဲ့တွေက ပြီးခဲ့တဲ့ ၂ နှစ်နီးပါး​ကတည်းက ထိန်းချုပ်ထားခဲ့တာဖြစ်ပြီး လမ်းပိုင်းပေါ်က ပျူစောထီးကျေးရွာ အထိုင်စခန်းတွေကိုလည်း တော်လှန်ရေးတပ်ဖွဲ့တွေဘက်က သိမ်းပိုက်ရရှိထားတာဖြစ်ပါတယ်။

တိုက်ပွဲအတွင်းပါဝင်နေတဲ့ တော်လှန်ရေးတပ်ဖွဲ့တခုရဲ့ပြောရေးဆိုခွင့်ရှိသူတယောက်က “အဲဒီ လမ်းပိုင်းပေါ်ကို ထိန်းချုပ်ထားတာကတော့ ၂ နှစ်နီးပါးရှိပြီပေါ့။ အဲဒီလမ်းပေါ်က ကျနော်တို့ တော်လှန်ရေးတပ်ဖွဲ့တွေဘက်က ပြီးခဲ့တဲ့ ဧပြီလထဲမှာသိမ်းပိုက်ထားတဲ့ ပျူစောထီးရွာတွေနဲ့ စစ်တပ်အထိုင်စခန်းတွေဖြစ်တဲ့ ကမ်းပါးနီ၊ နဂါးမောက်ခြံ၊ ငါးကန်၊ မှန်တော​၊ အရှေ့အောင်သာ၊ ကြံသာ နဲ့ အခြားစခန်းငယ်တွေကို ပြန်လိုချင်လို့ စစ်ကြောင်း​ထိုးနေတာ မကြာခဏပါပဲ။ ဒါပေမယ့် အခုတကြိမ်ကတော့ အင်အားတော်တော်များတယ်။ ၂၀၀ နဲ့ ၃၀၀ ကြားပါမယ်ဗျ။ အဓိက ကတော့ ကြံသာစခန်းကိုပြန်လိုချင်နေကြတာ” လို့ ​ DVB ကို ပြောပါတယ်။

တိုက်ပွဲ​တွေအတွင်း နှစ်ဖက်ထိခိုက်ကျဆုံးတာတွေရှိနေသလို စက်တင်ဘာ ၁၂ ရက်နေ့အထိ နှစ်ဖက်တိုက်ပွဲတွေပြင်းထန်နေတဲ့အတွက် မြေပြင်အခြေအနေကို အတိအကျ မသိရသေးဘူးလို့လည်း သူက ဆက်ပြောပါတယ်။

တိုက်ပွဲတွေပြင်းထန်နေတဲ့နေရာ​တွေကို အာဏာသိမ်းစစ်တပ်ဘက်ကလည်း ရဟတ်ယာဉ်တွေနဲ့ စစ်ကူပို့ဆောင်ပေးတာတွေရှိနေသလို လေကြောင်းတိုက်ခိုက်မှုတွေလည်းရှိနေတယ်လို့လည်း တော်လှန်ရေးတပ်ဖွဲ့တွေဆီကနေ သိရပါတယ်။