ရခိုင်ရိုးမနဲ့ မကွေးတိုင်းအစပ်ဖြစ်တဲ့ မကွေးတိုင်း၊ ငဖဲမြို့နယ်ထဲမှာ စက်တင်ဘာ ၇ ရက်က စစ်ကြောင်းထိုးလာတဲ့ စစ်တပ်ရဲ့ စစ်ကြောင်း ၂ ကြောင်းနဲ့ အာရက္ခတပ်တော် (AA) တို့ တိုက်ပွဲဖြစ်ပြီး စစ်တပ်ဘက်က အယောက် ၇၀ လောက် ကျဆုံးသွားတယ်လို့ AA က သတင်းထုတ်ပြန်ပါတယ်။
အဲဒီတိုက်ပွဲတွေအတွင်း စစ်တပ်ရဲ့ အလောင်း ၆၀ ကျော်နဲ့ စစ်အသုံးအဆောင်ပစ္စည်းတွေ၊ လက်နက်ခဲယမ်းတွေ သိမ်းဆည်းရမိခဲ့တယ်လို့ စက်တင်ဘာ ၁၀ ရက် AA သတင်းထုတ်ပြန်ချက်မှာ ဖော်ပြပါတယ်။
စက်တင်ဘာ ၇ ရက် မနက်က ငဖဲမြို့နယ်၊ စွန်တက်ရွာရဲ့ အရှေ့မြောက်ဘက် မီတာ ၃၀၀၀ အကွာကို စစ်ကြောင်းထိုးလာတဲ့ စစ်တပ်စစ်ကြောင်းနဲ့ ၈ နာရီကြာ တိုက်ပွဲဖြစ်ခဲ့ပြီး စစ်တပ်က တပ်လန်ကာ ကစဉ့်ကလျားနဲ့ ဆုတ်ခွာသွားတယ်လို့ ဆိုပါတယ်။
အဲဒီတိုက်ပွဲကနေ စစ်တပ်ရဲ့ အလောင်း ၆၀ ကျော်နဲ့ လက်နက်ခဲယမ်းတွေ၊ စစ်အသုံးအဆောင်တွေကို သိမ်းဆည်းရမိခဲ့ပြီး ဆုတ်ခွာသွားတဲ့စစ်ကြောင်းကို AA က လိုက်ပြီးချေမှုန်းနေပါတယ်။
အဲဒီနေ့ညနေမှာပဲ ငဖဲမြို့နယ်၊ နတ်ရေကန်ကုန်းတောင်ဘက်ကနေ စစ်ကြောင်းတကြောင်း ထပ်တက်လာပြီး တိုက်ပွဲဖြစ်ပွားကာ စစ်တပ်ဘက်က မျက်မြင် ၁၀ ယောက်ကျော် ကျဆုံးခဲ့တယ်လို့ AA က ထုတ်ပြန်ပါတယ်။
အဲဒီစစ်ကြောင်းလည်း တပ်လန်သွားပြီး လက်ရှိမှာ AA ရဲ့ တန်ပြန်ထိုးစစ်ကို ရင်ဆိုင်နေရတယ်လို့ ဆိုပါတယ်။
ဧရာဝတီတိုင်း-ရခိုင်အစပ်၊ စက်စက်ယိုရွာ အနီးပတ်ဝန်းကျင်တဝိုက်က နေရာတွေ၊ ပဲခူးတိုင်း-ရခိုင်အစပ် ဆင်လမ်ရွာ အနီးပတ်ဝန်းကျင်တဝိုက်က နေရာတွေနဲ့ ရခိုင်ရိုးမအစပ် နေရာတွေမှာ စစ်တပ်ဘက်က အင်အားအလုံးအရင်း ထပ်မံဖြည့်တင်းပြီး ထိုးစစ်ဆင်နေတာကြောင့် တိုက်ပွဲတွေ ဆက်ဖြစ်နေပါတယ်။
အဆိုပါတိုက်ပွဲတွေနဲ့ စစ်ကောင်စီတပ်ဖွဲ့ဝင်တွေ သေဆုံးမှုနဲ့ ပတ်သက်ပြီး စစ်ကောင်စီတပ်က သတင်းထုတ်ပြန်တာ မရှိသေးသလို ဆက်သွယ်မေးမြန်းနိုင်ခြင်း မရှိပါဘူး။
