ရခိုင်ပြည်နယ်၊ ကျောက်တော်မြို့နယ်၊ သရက်တပင်ကျေးရွာက ပညာပျိုးခင်း ကိုယ်ပိုင်အ ထက်တန်းကျောင်း တည့်တည့်ကို စစ်တပ်က လေကြောင်းကနေ ဗုံးကြဲတာကြောင့်  သေဆုံးသူ ကျောင်းသူ ကျောင်းသား ၂၂ ယောက်အထိရှိပြီး ၂၆ ယောက် ဒဏ်ရာပြင်းပြင်းထန်ထန် ရရှိသွားတယ်လို့ သိရပါတယ်။

စက်တင်ဘာ ၁၂ ရက် မနက် ၁ နာရီဝန်းကျင်လောက်မှာ စစ်တပ်က လေကြောင်းကနေ ပေါင် ၅၀၀ ဗုံး ၂ လုံးနဲ့ ကြဲချတိုက်ခိုက်ခဲ့တာဖြစ်ပြီး ကျောင်းရှေ့တည့်တည့်မှာ ကျရောက်ပေါက်ကွဲခဲ့တယ်လို့ ဒေသခံတွေဆီက သိရပါတယ်။

အခုလို ဗုံးကြဲတိုက်ခိုက်မှုကြောင့် ပညာပျိုးခင်း ကိုယ်ပိုင်အထက်တန်းကျောင်းမှာ ပညာသင်ကြားနေတဲ့ Grade-12 နဲ့ Grade-11 ကျောင်းသားတွေနဲ့ ကျောင်းနားမှာနေတဲ့ ကလေး စုစုပေါင်း ၁၇ ယောက် နေရာတင် သေဆုံးပြီး အယောက် ၂၀ ကျော် ဒဏ်ရာရခဲ့တာပါ။ ဒါပေမဲ့ နောက်ပိုင်းမှာ ဒဏ်ရာရသူတွေထဲက ၅ ယောက် ထပ်ပြီးသေဆုံးခဲ့တာပါ။

ထိခိုက်သေဆုံးသူတွေဟာ ဆယ်ကျော်သက်အရွယ်တွေဖြစ်တယ်လို့ ဒေသခံဆီက သိရပါတယ်။

ဒဏ်ရာရရှိတဲ့သူ ၂၆ ယောက်ထဲမှာလည်း ဒဏ်ရာ ပြင်းထန်ဆိုးဝါးသူတွေ များပြီး နောက်ဆက်တွဲ အန္တရာယ် စိုးရိမ်နေရတယ်လို့ ဗုံးကြဲခံခဲ့ရတဲ့ သရက်တပင်ကျေးရွာ ဒေသခံတယောက်က ပြောပါတယ်။

“ကျောင်းသားတွေအိပ်နေတဲ့ နေရာမှာပဲ ဗုံးကျ‌ရောက်ပေါက်ကွဲခဲ့တာဖြစ်တယ်။ သေဆုံးမှု မြင့်တက်လာတဲ့ အနေအထားမှာ ရှိပါတယ်။ နောက်ထပ်လည်း စိုးရိမ်ရတဲ့ အနေအထားမှာ ရှိပါသေးတယ်။ ညအချိန်မှာ စစ်ကောင်စီက ဘာမှမဟုတ်တဲ့ ဒီကလေးတွေကို စာသင်နေတဲ့ နေရာတွေကို တိုက်ခိုက်တာက တော်တော်လေးကို ရွံရှာစက်ဆုပ်ဖွယ်ကောင်းတဲ့ အနေအထားလို့ ပြောလို့ရပါတယ်။”

ဗုံးထိမှန်ခဲ့တဲ့ စာသင်ကျောင်း အပါအဝင် အနီးအနားရှိ နေအိမ်တွေလည်း ပျက်စီးသွားတယ်လို့ သိရပါတယ်။

အခုလိုမျိုး စစ်တပ်ရဲ့ အစုလိုက်အပြုံလိုက် သတ်ဖြတ်မှုကြောင့် သရက်တပင်ရွာသားတွေဟာ စိုးရိမ်ကြောက်လန့်နေကြပြီး ထွက်ပြေးတိမ်းရှောင်နေသူတွေလည်း ရှိနေတယ်လို့ သိရပါတယ်။

ပြီးခဲ့တဲ့ စက်တင်ဘာ ၁၀ ရက် ည ၁၁ နာရီကလည်း ကျောက်တော်မြို့နယ်၊ လက်ပံကျေးရွာအနီးက တောင်တန်းတွေကို စစ်တပ်က လေကြောင်းတိုက်ခိုက်မှု ၂ ကြိမ် ပြုလုပ်ခဲ့ပါတယ်။

အလားတူ ကျောက်တော် အပါအဝင် အာရက္ခတပ်တော် (AA) ထိန်းချုပ်ထားတဲ့ မြို့နယ်တွေမှာလည်း အာဏာသိမ်းစစ်တပ်ရဲ့ လေကြောင်းတိုက်ခိုက်မှုတွေကြောင့် အရပ်သားပြည်သူ အစုလိုက်အပြုံလိုက် သေဆုံးမှုတွေဟာ တနေ့ထက်တနေ့ ပိုများလာနေပါတယ်။

ပြီးခဲ့တဲ့ ဩဂုတ် ၂၅ ရက် ည ၁၁ နာရီခွဲကလည်း မြောက်ဦးမြို့၊ ဒိုင်းကျီရပ်ကွက်ကို လေကြောင်းက ဗုံးကြဲတိုက်ခိုက်လို့ အစုလိုက်အပြုံလိုက် ကလေးငယ်တွေ အပါအဝင် ဒေသခံ ၁၅ ယောက် သေဆုံးပြီး ၂၀ ကျော် ထိခိုက်ဒဏ်ရာရရှိခဲ့ပါတယ်။

တဖက်မှာလည်း ရခိုင်မှာ စစ်ရှုံးနေတဲ့အတွက် အရပ်သားပြည်သူတွေကို ပစ်မှတ်ထား သတ်ဖြတ်နေတာလို့ စစ်ရှောင်အရေး ကူညီဆောင်ရွက်ပေးနေသူလည်း ဖြစ်သလို လူမှုရေး တက်ကြွလှုပ်ရှားနေတဲ့ စာရေးဆရာ ဝေဟင်အောင်က ပြောပါတယ်။

“စစ်ကောင်စီရဲ့ သဘောသဘာဝအတိုင်းပဲပေါ့နော်၊ သူ့ရဲ့ နဂိုဗီဇစိတ်က အကြမ်းဖက်သမားစိတ် ရှိပါတယ်။ ဒီကြားထဲမှာ အာဏာကိုလည်း ငမ်းငမ်းတက်လိုချင်နေတယ်၊ သူ့ကို မထောက်ခံသူတွေ သူနဲ့ မပူးပေါင်း မဆောင်ရွက်တဲ့သူတွေ အကုန်လုံးကို ပြည်သူလို့မမြင်ဘူး၊ ရန်သူလို သဘာထားနေတယ်။ ရခိုင်မှာ သူက စစ်ရှုံးနေတယ်။ စစ်ရှုံးနေလို့ ရခိုင်ကို အငြိုးတွေနဲ့ မကျေနပ်တဲ့စိတ်လည်း ရှိတယ်။ အငြိုးတွေရယ်၊ မနာလိုစိတ်ရယ်၊ အကြမ်းဖက်စိတ်ရယ် သုံးခုပေါင်းပြီးတော့ အရပ်သားပြည်သူတွေကို သတ်ဖြတ်နေတာလို့ ပြောချင်ပါတယ်။”

အာရက္ခတပ်တော် (AA) ကလည်း နိုင်ငံတဝန်းမှာ စစ်ရှုံးနေတဲ့ စစ်တပ်က စစ်ဘက်နဲ့မသက်ဆိုင်တဲ့ စာသင်ကျောင်း၊ ဆေးရုံဆေးခန်း၊ ဈေး၊ ဘာသာရေးအဆောက်အုံ၊ စစ်ဘေးရှောင်စခန်းတွေနဲ့ လူနေထူထပ်တဲ့ နေရာတွေကို လေကြောင်းတိုက်ခိုက်မှုတွေ ပြုလုပ်ကာ စစ်ရာဇဝတ်မှုတွေကို ပြောင်ပြောင်တင်းတင်း ချိုးဖောက်ကျူးလွန်နေတယ်လို့ သြဂုတ် ၂၆ ရက်က ထုတ်ပြန်ထားပါတယ်။

ကေခိုင်