ပဲခူးတိုင်း၊ လက်ပံတန်းမြို့နယ်ထဲမှာ စက်တင်ဘာ ၉ ရက် နေ့လယ်ပိုင်းက စစ်တပ်လက်အောက်ခံ ပြည်သူ့စစ်အဖွဲ့ဝင်တွေက ဒရုန်းနဲ့ဗုံးကြဲတိုက်ခိုက်ခဲ့တာကြောင့် ဒေသခံအမျးသမီး ၂ ယောက် သေဆုံး၊ ဒဏ်ရာရသူတွေလည်းရှိခဲ့ပြီး နေအိမ်တချို့လည်း ပျက်စီးခဲ့တယ်လို့ ဒေသခံတွေဆီကနေ သိရပါတယ်။

အမည်မဖော်လိုတဲ့ ဒေသခံတယောက်က “လက်ပံတန်းနဲ့ ၂ မိုင်လောက်ပဲဝေးတဲ့ သစ်ရောင်းပြင်ရွာကို စစ်တပ်ဘက်က ဒရုန်းနဲ့ဗုံးကြဲသွားလို့ ပြည်သူတွေထိခိုက်သေဆုံးခဲ့ကြပြီးတော့ လူနေအိမ်တွေလည်း ပျက်စီးသွားပါတယ်” လို့ ပြောပါတယ်။

စစ်တပ်လက်အောက်ခံတွေရဲ့ ဒရုန်းနဲ့ဗုံးကြဲတိုက်ခိုက်မှုကြောင့် သစ်ရောင်းပြင်ကျေးရွာနေ အသက် ၆၀ ဝန်းကျင် ဒေါ်ခင်လှိုင် နဲ့ အသက် ၅၀ ဝန်းကျင် ဒေါ်စန်းဌေး တို့ သေဆုံးခဲ့ကြသလို အသက် ၄၅ နှစ်အရွယ် မညိုမီလှိုင် နဲ့ အသက် ၉ နှစ်အရွယ် မယွန်းဝတီ တို့လည်း ဒဏ်ရာတွေရရှိခဲ့ကြပြီး လူနေအိမ် ၂ လုံးလည်း ထိခိုက်ပျက်စီးသွားခဲ့တယ်လို့ ဆိုပါတယ်။

လက်ပံတန်းအခြေစိုက် ရွှေတန်းမြေ ပြည်သူ့ကာကွယ်ရေးတပ်ဖွဲ့ တာဝန်ခံ ကိုအောင်က “အဲဒီ သစ်ရောင်းပြင်ရွာကို ဒရုန်းနဲ့ဗုံးကြဲသူတွေဟာ လက်ပံတန်းမြို့မှာရှိတဲ့ ပြည်သူ့စစ်အဖွဲ့ ဗုံးကြဲခဲ့တာပါ။ သူတို့ဒရုန်းတွေ ပျံနေ​တာကတော့ မနက်စော ၇ နာရီလောက်ကတည်းကပါ။ နေ့လယ် ၁၂ နာရီလောက်မှာမှ ဗုံး ၂ လုံး ကြဲသွားတာဖြစ်ပါတယ်။ သေဆုံးသွားကြတဲ့ အမျိုးသမီးတွေကတော့ နေရာမှာတင်ဆုံးသွားတာပါ။ ဒဏ်ရာရတဲ့သူ ၂ ယောက်ကလည်း ဒဏ်ရာပြင်းထန်လို့ ဆေးရုံတင်ထားရပါတယ်” လို့ DVB ကို ပြောပါတယ်။

အဆိုပါ ဗုံးကြဲတိုက်ခိုက်ခံခဲ့ရတဲ့ သစ်ရောင်းပြင်ကျေးရွာမှာ တော်လှန်ရေးတပ်ဖွဲ့ဝင်တွေ ​အခြေချနေထိုင်နေတာ မရှိသလို တိုက်ပွဲဖြစ်ပွားနေတာလည်းမရှိဘဲ အ​ကြောင်းမဲ့ဗုံးကြဲပြီး ပြည်သူကို သတ်ဖြတ်နေတာလို့ ဆိုပါတယ်။

ပြီးခဲ့တဲ့ စက်တင်ဘာ ၄ ရက်ကလည်း လက်ပံတန်းမြို့ပေါ်ကနေ ဆင်တလင်းကျေးရွာကို ရောက်ရှိနေကြတဲ့ စစ်တပ်လက်အောက်ခံတွေဟာ သရက်ချောင်းကျေးရွာကို ဒရုန်းနဲ့ အကြောင်းမဲ့ ဗုံးကြဲတိုက်ခိုက်​ခဲ့တာကြောင့် အသက် ၃၀ အရွယ် ကိုဇေယျာလင်း သေဆုံးခဲ့ရပါသေးတယ်။