ထိုင်းအရှေ့တောင်ပိုင်း၊ လယောင်းမြို့နယ်ထဲမှာ ပြီးခဲ့တဲ့ရက်ပိုင်းက မိုးဆက်တိုက်ရွာသွန်းပြီး ရေကြီးရေလျှံတာကြောင့် ကချိတ်ရပ်ကွက်ရှိ မွေးမြူရေးလုပ်ငန်းတခုက ကြက်အကောင်ရေ ၅၀,၀၀၀ ကျော် သေဆုံးသွားတယ်လို့ ထိုင်းသတင်းတွေမှာ ဖော်ပြပါတယ်။

စက်တင်ဘာ ၇ ရက် ညနေပိုင်းကစ ၈ ရက် မနက်ပိုင်းထိ တညလုံး မိုးသည်းထန်စွာ ရွာသွန်းပြီး တောင်ကျချောင်းရေတွေပါ ဝင်လာတယ်၊ ကြက်ခြံ ၂ ခြံထဲကို ရေတွေလှိမ့်ဝင်လာတာကြောင့် မွေးထားတဲ့ အကောင်ရေ ၅၀,၀၀၀ ကျော် သေကုန်တယ်လို့  ရတ်ချ်ဒါးဖိပ် ကြက်မွေးမြူရေးလုပ်ငန်းပိုင်ရှင် နန်းအဖိရဒီက သတင်းထောက်တွေကို ပြောပါတယ်။

ရပ်ကွက်တခုလုံး ရေတွေပြည့်နေတာကြောင့် ကြက်တွေကို ဘယ်မှရွှေ့ပြောင်းလို့မရဘူး၊ ရေက ၃၀ စင်တီမီတာထိတောင် တက်လာလို့ ကြက်ခြံ ၂ ခြံရှိတာ တခြံက အကုန်သေတယ်၊ နောက်တခြံကလည်း အားလုံးနီးပါးသေတယ်၊ အမှန်က အဲဒီကြက်တွေဟာ ဒီလ ၁၈ ရက်နေ့မှာ သွားရောင်းရမယ့်ကြက်တွေ၊ ခုလိုသေကုန်တော့ အကြီးအကျယ်ဆုံးရှုံးတယ်၊ တန်ဖိုး ဘတ် ၁၀ သန်းလောက် ဆုံးရှုံးတယ်၊ လွန်ခဲ့တဲ့ ၃ နှစ်ကလည်း အခုလို ရေကြီးပြီး ကြက်တွေ သေကုန်သေးတယ်၊ ပြန်ပြီးရင်းနှီးမြှုပ်နှံထားကာမှ ဒီတခါတော့ ဆုံးရှုံးမှုအကြီးမားဆုံးပဲလို့  နန်းအဖိရဒီက ပြောသွားပါတယ်။

ကြက်တွေ ပျက်စီးဆုံးရှုံးတဲ့နေရာကို ပြည်သူ့ပါတီ လယောင်းလွှတ်တော်အမတ် လာရောက် စစ်ဆေးကြည့်ရှုပြီး ရေကြီးတဲ့နေရာကို သဘာဝဘေးသင့်နေရာအဖြစ် ကြေညာဖို့၊ ပျက်စီးဆုံးရှုံးမှုတွေကို ကူညီထောက်ပံ့ဖို့ ခရိုင်ဝန်ရုံးထံ တင်ပြသွားမယ်လို့ ပြောတဲ့အကြောင်း  မန်နေဂျာအွန်လိုင်းသတင်းမှာ ဖော်ပြသွားပါတယ်။

Source: MGROnline