ပဲခူးတိုင်း၊ ပဲခူးမြို့မှာ စက်တင်ဘာ ပထမအပတ်အတွင်း စစ်တပ်က လူငယ်တယောက်ကို ဖမ်းဆီးပြီး ဒိုက်ဦးမြို့နယ်အတွင်းက စစ်တပ်စခန်းတခုမှာ ငွေကျပ် ၂၅ သိန်းနဲ့ သွားရောက် ရောင်းစားခဲ့တာကြောင့် မိသားစုဝင်တွေက ငွေကျပ် သိန်း ၅၀ နဲ့ ပြန်လည်ရွေးယူခဲ့ရတယ်လို့ သိရပါတယ်။
ဖမ်းဆီးရောင်းစားခံရတဲ့ လူငယ်က အလင်းရောင်ရပ်ကွက်ကလို့ သိရပြီး ည ၁၁ နာရီဝန်းကျင် လိပ်ပြာကန်မှာ ထိုင်နေချိန် စစ်ကောင်စီတပ်ဖွဲ့ဝင် ၂ ယောက်က လာရောက်ဖမ်းဆီးခဲ့တာလို့ ဖမ်းဆီးခံရသူ လူငယ်နဲ့ နီးစပ်သူတယောက်က ပြောပါတယ်။
“ကောင်လေးက ဈေးရောင်းတာ။ ညပိုင်း လိပ်ပြာကန်မှာ တယောက်တည်း သွားထိုင်နေတဲ့အချိန် ဖမ်းခံရတာ။ ကောင်လေးကလည်း အထဲရောက်မှ ဖုန်းခိုးဆက်လို့ သူ့မိသားစုက သိရတာ။ ဖမ်းသွားတဲ့ စစ်သား ၂ ယောက်က ဒိုက်ဦးဘက်က စစ်တပ်မှာ သူ့ကို ၂၅ သိန်းနဲ့ ရောင်းသွားတာ။ သူ့မိသားစုက သိန်း ၅၀ နဲ့ သွားပြန်ခေါ်ရတယ်။ လူအစားလည်း တယောက် ရှာပေးခဲ့ရတယ်။”
ပဲခူးတိုင်းအတွင်းက ကျေးရွာတွေမှာ စစ်ကောင်စီက ပေါ်တာဆွဲ ဖမ်းဆီးမှုတွေ မကြာခဏ ပြုလုပ်ပေမဲ့ ပဲခူးမြို့လယ်ကောင်မှာ အခုလိုဖြစ်ပွားတာ မရှိသေးဘူးလို့ သိရပြီး ဖမ်းဆီးထားတဲ့ လူငယ်ကို စက်တင်ဘာ ၇ ရက်က ပြန်လွှတ်ပေးလိုက်တယ်လို့ ဖမ်းဆီးခံရသူ လူငယ်နဲ့ နီးစပ်သူက ပြောပါတယ်။
“ပဲခူးဘက်က ရွာတွေမှာ ပေါ်တာဆွဲနေတာတွေက အယောက်ပေါင်း မနည်းတော့ဘူးလေ။ သတင်းအစအနတောင် မရတော့ဘဲ ပျောက်သွားတဲ့သူတွေလည်း ရှိနေတာပဲ။ အခုကိစ္စကြီးကကျ ပဲခူးမြို့လယ်ကောင်ကြီးမှာကို ဖြစ်တာ။ နောက်ပြီး ပဲခူးမှာဆို ညဈေးက ၁၂ နာရီမှ ပိတ်တာ။ မနက် ၂ နာရီ၊ ၃ နာရီ ဈေးလာဝယ်တတ်တဲ့သူတွေတောင် ရှိတယ်။”
စစ်ကောင်စီက ပြည်သူ့စစ်မှုထမ်းဥပဒေကို စတင်အသက်သွင်းပြီးတဲ့နောက် လူငယ် ၇၀,၀၀၀ နီးပါးကို အတင်းအဓမ္မ ဖမ်းဆီးခဲ့ပြီး စစ်သင်တန်းတွေကို ပို့ဆောင်ကာ စစ်မြေပြင်မှာ စေလွှတ် အသုံးချခဲ့တဲ့အပြင် စစ်မှုထမ်းအပတ်စဥ်အလိုက် လူဦးရေအနည်းဆုံး အယောက် ၄,၀၀၀ ရရှိနိုင်ဖို့အတွက် လူငယ်တွေကို အရှိန်အဟုန်မြှင့်ပြီး အတင်းအဓမ္မ ဖမ်းဆီးနေတယ်လို့ အမျိုးသားညီညွတ်ရေးအစိုးရ (NUG) က ဇူလိုင် ၂၁ ရက် ထုတ်ပြန်ချက်မှာ ဖော်ပြထားပါတယ်။
