ရှမ်းပြည်မြောက်ပိုင်း၊ ကျောက်မဲခရိုင်၊ သီပေါမြို့ရှိ သမိုင်းဝင် ဘော်ကြိုဘုရားအနီးကို စစ်တပ်က စက်တင်ဘာ ၃ ရက် မွန်းလွဲပိုင်းက လေကြောင်းကနေ ဗုံးကြဲခဲ့တာကြောင့် ဗုံးကျရောက်ပေါက်ကွဲပြီး ကျောင်းဆောင်ရဲ့ ပြတင်းတံခါးမှန်တချို့ ပျက်စီးကာ ရွာထဲက အိမ် ၃ လုံး နဲ့ ဒေသခံ အမျိုးသား တယောက် ဒဏ်ရာရသွားပါတယ်။
မနေ့ မွန်းလွဲ ၃ နာရီခွဲလောက်က လားရှိုး-မန္တလေး ကားလမ်းမပေါ်ရှိ သီပေါ-ဘော်ကြို ဘုရားနားတဝိုက်မှာ လေယာဉ်ပေါ်ကနေ ဗုံး ၂ လုံး ကျလာတယ်၊ ပထမတလုံးက နမ့်လုံချောင်းအနီး တောထဲကျတာကြောင့် အထိအခိုက်မရှိ၊ ဒုတိယတလုံးက ဘော်ကြိုဘုရား မျက်နှာချင်းဆိုင် ဘော်ကြိုဈေး ရွာထဲကျတယ်လို့ သီပေါဒေသခံတယောက်က ပြောပါတယ်။
“ပထမတလုံးက တောထဲကျလို့ လူနေအိမ်တွေ မထိခိုက်ဘူး။ ဒုတိယတလုံးက ဘော်ကြိုဈေး ရွာထဲ ကျတာ၊ အိမ် ၃ လုံး လုံးဝပျက်စီးတယ်။ အိမ်ရှင်နာမည်တော့ မသိဘူး။ ပြီးတော့ ဦးမောင်ဇော် ဆိုတဲ့လူ ဘယ်ဘက်လက်နဲ့ ညာဘက်ဝမ်းဗိုက်နား ကျည်စစင်ပြီး ဒဏ်ရာရတယ်။ ကျည်စတွေကြောင့် ဘော်ကြိုကျောင်း ပြတင်းပေါက်မှန် ကျကွဲတယ်။ ကျောင်းက ကြီးကြီးမားမားတော့ မပျက်စီးဘူး။ ရွာထဲက ခွေးမတကောင် သေသွားတယ်။ ခွေးပေါက်စလေးတွေ ကျန်ခဲ့တယ်။”
ဒီကိစ္စနဲ့ပတ်သက်ပြီး တအာင်းအမျိုးသားလွတ်မြောက်ရေးတပ်မတော် (TNLA) ဘက်ကလည်း စစ်ကောင်စီတပ်က မနေ့ မွန်းလွဲ ၁ နာရီ ၃၇ မိနစ်မှာ သီပေါမြို့နယ် ဘော်ကြိုကျေးရွာကို လေကြောင်းနဲ့ ပေါင် ၂၅၀ ဗုံး ၂ လုံး ရည်ရွယ်ချက်ရှိရှိ လာရောက်ကြဲချတိုက်ခိုက်ခဲ့တယ်လို့ ထုတ်ပြန်ထားပါတယ်။
စစ်ကောင်စီတပ်က TNLA သိမ်းပိုက်ထားတဲ့ ရှမ်းပြည်မြောက်ပိုင်းက ဒေသတွေကို လေကြောင်းနဲ့ မကြာခဏ ဗုံးကြဲတိုက်ခိုက်နေတာမှာ ဩဂုတ် ၁၈ ရက်ကလည်း သီပေါမြို့၊ အနောက်ရပ်ကွက်နဲ့ တောင်မြို့ရပ်ကွက်မှာ ဗုံးကြဲခံရတာကြောင့် ပြည်သူ ၃ ယောက် ထိခိုက်ဒဏ်ရာရခဲ့ပြီး နေအိမ် ၇ လုံး ထိခိုက်ပျက်စီးခဲ့ပါတယ်။
သီပေါမှာ စစ်ရှောင်ပြည်သူပေါင်း ၂,၀၀၀ နီးပါး လုံခြုံတဲ့နေရာတွေမှာ လာရောက်ခိုလှုံနေကြောင်း၊ အများစုမှာ သီပေါ၊ ကျောက်မဲ၊ နောင်ချို၊ နောင်ပိန်စတဲ့မြို့နယ်က လာကြတာဖြစ်ပြီး ဆန်၊ ဆီ စတဲ့ အခြေခံစားနပ်ရိက္ခာ တော်တော်အခက်အခဲရှိနေတယ်၊ စေတနာရှင်တွေအနေနဲ့ သီပေါ နှလုံးသားပရဟိတအဖွဲ့ nayzawtun99900@gmail.com ကို ဆက်သွယ်ကူညီနိုင်တယ်လို့ ပရဟိတ အဖွဲ့ဝင်တယောက်က ပြောပါတယ်။
