ကရင်ပြည်နယ်၊ ဘားအံခရိုင်ရှိ နောင်တခီးကျေးရွာ စာသင်ကျောင်းနဲ့ မြဝတီမြို့နယ်မှာရှိတဲ့  ကျောက်ခက် စံပြ​ကျေးရွာစာသင်ကျောင်းကို  စစ်ကောင်စီတပ်က ​မောင်းသူမဲ့ ကာမီကာ​ဇေဒရုန်းနဲ့ ဗုံးကြဲတိုက်ခိုက်ခဲ့တယ်လို့ ကျောင်းသားကလေးငယ်တွေနဲ့ ဆရာ ဆရာမတချို့ ဒဏ်ရာရသွားသလို စာသင်ကျောင်းလည်း ထိခိုက်ပျက်စီးသွားတယ်လို့ ဒေသခံတွေက ပြောပါတယ်။

မြဝတီမြို့ရဲ့ တောင်ဘက်မှာရှိတဲ့ ဖလူးတိုက်နယ်​၊ ကျောက်ခက်စံပြ​ကျေးရွာကို စက်တင်ဘာ ၄ ရက် ဒီကနေ့မနက်မှာ စစ်တပ်က ​မောင်းသူမဲ့ ကာမီကာ​ဇေဒရုန်းနဲ့ ဗုံးကြဲတိုက်ခိုက်ခဲ့တယ်လို့ ဒေသခံတွေဆီက သိရပါတယ်။

ဒီနေ့မနက် ၈ နာရီ ၃၀ မိနစ်မှာ တကြိမ်၊ ၈ နာရီ ၅၀ မိနစ်မှာ တကြိမ်၊ ၂ ကြိမ်တိတိ ကာမီကာဇယ် ဒရုန်းနဲ့ ဗုံးလာကြဲချတာဖြစ်ပြီး စာသင်ကျောင်းအနီးက ဆေးရုံဟောင်းပေါ်ကို ကျရောက်ပေါက်ကွဲခဲ့လို့ ကလေးတချို့ ဒဏ်ရာရသွားပါတယ်။

ကျောက်ခက် ဒေသခံတယောက်က “ဒီမနက် လာကြဲတာ ၂ ကြိမ်၊ တကြိမ်နဲ့ တကြိမ် မိနစ်အနည်းငယ်ပဲ ကွာတယ်။ စာသင်ကျောင်းက ကလေးတချို့ ထိခိုက်ဒဏ်ရာတွေ ရတယ်လို့ ကြားတယ်။ စာသင်ကျောင်းနဲ့ နေတဲ့နေရာ နည်းနည်းဝေးတော့ ထိခိုက်မှုအခြေအနေ အတိအကျတော့ မသိရသေးဘူး”လို့ ပြောပါတယ်။

ဗုံးကြဲချိန်ဟာ မနက်အစောပိုင်းဖြစ်လို့ ကျောင်းသား​လေး​တွေ ​ကျောင်းမသွားရ​သေးတဲ့အတွက် ထိခိုက်မှု နည်းတာလို့လည်း ဒေသခံက ပြောပါတယ်။

လက်ရှိအခြေနေမှာ စစ်ကောင်စီတပ်တွေဘက်က ကာမီကာဇယ် ဒရုန်းကို ပိုမိုအသုံးပြု တိုက်ခိုက် လာနေတာ ဖြစ်ပြီး လက်ရှိ ဗုံးကြဲတဲ့ နေရာက ဒီမိုကရေစီအကျိုးပြုကရင့်တပ်မတော် (DKBA) တပ်ဖွဲ့ ထိန်းချုပ်နယ်မြေမှာ ဖြစ်ပါတယ်။

စက်တင်ဘာ ၃ ရက်ကလည်း ဘားအံခရိုင်၊ တာကရယ် (ပိုင်ကျုံ) မြို့နယ်မှာရှိတဲ့ နောင်တခီးကျေးရွာ အခြေခံပညာအလယ်တန်းကျောင်းကို စစ်တပ်က ဒရုန်းနဲ့ဗုံးကြဲတိုက်ခိုက် ခဲ့တာကြောင့် ကျောင်းဆရာတယောက်၊ ဆရာမ တယောက်နဲ့ ကလေးငယ်တယောက် ထိခိုက်ဒဏ်ရာတွေရခဲ့ပြီး ကျောင်းရုံးခန်းလည်း ပျက်စီးသွားတယ်လို့ စစ်ရေး သတင်းရင်းမြစ်တွေဆီက သိရပါတယ်။

နောင်တခီးအခြေခံပညာအလယ်တန်းကျောင်းကို ကလေးသူငယ်တွေကျောင်းတက်နေတဲ့ အချိန်မှာ ပစ်မှတ်ထားဗုံးကြဲတိုက်ခိုက်ခဲ့တာလို့  ဆိုပါတယ်။

စက်တင်ဘာ ၂ ရက်ကလည်း ဒေါနတောင်သွားတဲ့ လမ်းဟောင်းဘက်မှာ တော်လှန်ရေးအင်အားစု တပ်ဖွဲ့တွေနဲ့ စစ်ကောင်စီတပ်တွေ တိုက်ပွဲ ဖြစ်ပွားနေပြီး စစ်တပ်က လေကြောင်း ဗုံးကြဲတာ လက်နက်ကြီးတွေနဲ့ ပစ်ခတ်ခဲ့တယ်လို့လည်း စစ်ရေးသတင်းရင်းမြစ်က ပြောပါတယ်။

ဩဂုတ် ၃၁ ရက် မနက်ကလည်း ကော်သူးလေ အုပ်ချုပ်နယ်မြေ၊ ခလယ်လွီထူခရိုင်၊ လယ်ဒိုမြို့နယ်နဲ့ မူးမြို့နယ်မှာ စစ်တပ်က လက်နက်ကြီးတွေ၊ ဒရုန်းတွေနဲ့ ပစ်ခတ်ခဲ့တာကြောင့်  အရပ်သားပြည်သူ ၇ ယောက် ထိခိုက်ဒဏ်ရာရရှိခဲ့ရပြီး နေအိမ် ၄ လုံး ထိမှန်ပျက်စီးခဲ့ရတယ်လို့ ကရင်အမျိုးသားအစည်းအရုံး (KNU) က ထုတ်ပြန်ထားပါတယ်။