ရခိုင်ပြည်နယ်၊ ကျောက်ဖြူမြို့က စစ်ဘေးရှောင်ကလေးတွေအတွက် ပညာသင်ကြားပေးမယ့် ကျောင်း ၂ ကျောင်းမှာ အလှူငွေနည်းပါးလို့ ကျောင်းပိတ်ရတော့မယ့်အခြေအနေ ရောက်နေတယ်လို့ တန်ခိုးဆရာထွန်း-အခလွတ်ပညာရေးစင်တာဆီက သိရပါတယ်။

ကျောက်ဖြူမှာရှိတဲ့ စစ်ရှောင်ကျောင်းသား ၆၀၀ ဝန်းကျင်ကို စာရေးကိရိယာတွေ ထောက်ပံ့ပြီး စာသင်ဆောင် ၄ ဆောင်ပါတဲ့ စာသင်ကျောင်း ၂ ကျောင်း ဖွင့်လှစ်ပေးဖို့ စီစဉ်ထားပေမဲ့ ငွေကြေးအခက်အခဲကြောင့် ဖွင့်လှစ်နိုင်တာမရှိသေးဘဲ ပိတ်သိမ်းရမယ့်အခြေအနေကို ရောက်နေတယ်လို့ ဆိုပါတယ်။

တန်ခိုးဆရာထွန်း-အခလွတ်ပညာရေးစင်တာက တာဝန်ရှိသူတယောက်က “KG ကနေ Grade 12 လောက်အထိ ဖွင့်လှစ်ပေးဖို့ စီစဉ်ထားပေမဲ့ ငွေကြေးအခက်အခဲကြောင့် စာသင်ကျောင်းဖွင့်မယ့် အစီအစဉ်ကို နောက်တပတ်လောက်အထိ အခြေအနေမကောင်းဘူး ဆိုရင် ဖျက်သိမ်းရမယ့် သဘောမှာ ရှိတယ်။ ဖွင့်လှစ်ဖို့က အကုန်လုံးစီစဉ်ပြီးသွားပြီ။ ရန်ပုံငွေအင်အားပဲ လိုနေတာ”လို့ DVB ကို ပြောပါတယ်။

စာသင်ကျောင်း ၂ ကျောင်း ဖွင့်လှစ်ပေးဖို့ အလှူငွေ ကျပ်သိန်း ၁၅၀ လိုနေတာဖြစ်ပေမဲ့ လက်ရှိအချိန်ထိ ငွေကျပ် ၆ သိန်းခွဲပဲ ရသေးတာကြောင့် ဖွင့်လှစ်ဖို့ အဆင်မပြေဖြစ်နေတာလို့ ဆိုပါတယ်။

“ဒီကျောင်းဖွင့်ဖို့ မတည်ငွေက သိန်း ၁၅၀ ပဲလိုတာပါ။ ဒီကျောင်းဖွင့်ပြီးသွားရင်တော့ လစဉ် ရန်ပုံငွေက သိန်း ၂၀၊ ၃၀ လောာက်ပဲ လိုတာပါ”လို့ ကျောင်းတာဝန်ခံက ဆက်ပြောပါတယ်။

တန်ခိုးဆရာထွန်း-အခလွတ်ပညာရေးစင်တာဟာ မြို့နယ် ၆ ခုက စစ်ရှောင်ကလေးတွေအတွက် ကျောင်းပေါင်း ၁၈ ကျောင်းအထိ ဖွင့်လှစ်သင်ကြားပေးဖို့ စီစဉ်ခဲ့ပေမဲ့ ငွေကြေးအခက်အခဲကြောင့် ၁၅ ကျောင်းကိုပဲ ဖွင့်လှစ်ပေးနိုင်တယ်လို့ ဆိုပါတယ်။

လက်ရှိမှာတော့ ပုဏ္ဏားကျွန်း၊ ရသေ့တောင်၊ ပေါက်တော၊ အမ်းနဲ့ ကျောက်တော်မြို့တွေမှာ ကျောင်းတွေ ဖွင့်လှစ်သင်ကြားပေးနေတာ ဖြစ်ပါတယ်။

မင်းဆက်