ဧရာဝတီတိုင်း၊ မအူပင်မြို့ကနေ စစ်မှုထမ်းဖို့ ဖမ်းခံလိုက်ရတဲ့ လူငယ် ၄ ယောက်ဟာ ဖမ်းခံရပြီး ၅ လ အကြာမှာ သေဆုံးသွားပြီဆိုတာ အကြောင်းကြားလာတယ်လို့ မိသားစုနဲ့ နီးစပ်သူတွေဆီက သိရပါတယ်။
မအူပင်မြို့၊ အမှတ် ၁ ရပ်ကွက်က လူငယ် ၄ ယောက်ကို ၂၀၂၅ ခုနှစ်၊ မတ်လ ဒုတိယပတ်မှာ စစ်မှုထမ်းဥပဒေနဲ့ ဖမ်းဆီးခဲ့တာဖြစ်ပြီး ဩဂုတ်ဒုတိယပတ်က တိုက်ပွဲအတွင်း သေဆုံးသွားတယ်လို့ ဩဂုတ် ၂၈ ရက်မှာ လာရောက်အကြောင်းကြားတာဖြစ်ပါတယ်။
မိသားစုဝင်နဲ့နီးစပ်သူတယောက်က “သေဆုံးသွားတာကို ဧည့်စာရင်းလာစစ်တဲ့ စစ်သားတွေ၊ ရဲတွေနဲ့ အမှတ် ၁ ရပ်ကွက် အုပ်ချုပ်ရေးမှုးအဖွဲ့ကပြောလို့ သိရတာ။ စပြီးဖမ်းခံရကတည်းက ပုသိမ်မြို့ကို ပို့လိုက်ကြတာဖြစ်ပြီး ဘယ်နေရာမှာ သေဆုံးတာလဲမေးတော့ ရှေ့တန်းမှာလို့ပဲ ပြောသွားတယ်။ ဘယ်အချိန်၊ ဘယ်နေရာမှာသေတယ်ဆိုတာ မပြောဘူး။ ဘယ်တပ်ထဲရောက်သွားတယ်ဆိုတာလည်း မိသားစုဝင်တွေ သိခွင့်မရခဲ့ဘူး။ စစ်မှုထမ်းဥပဒေကြောင့် ဖမ်းဆီးခံသွားရတဲ့ကလေးတွေ အသိမပေးတဲ့သူတွေလည်းရှိဦးမယ်။ အဆက်အသွယ်မရတာ ဖမ်းပြီး စစ်သင်တန်းတက်တဲ့ အချိန်ကတည်းက။ ခုမှ သေပြီဆိုတာသိရတယ်” လို့ ပြောပါတယ်။
စက်တင်ဘာလကျရင်လည်း ရပ်ကွက်အလိုက် တရပ်ကွက်ကို ၄ ယောက်နှုန်း ထပ်ပေးရဦးမယ်လို့ ကြားရကြောင်းလည်း ဒေသခံတွေက ပြောပါတယ်။
ဒေသခံတယောက်က “ကျေးရွာတွေမှာတော့ စစ်ကောင်စီတပ်တွေက သူတို့ကိုယ်တိုင် လိုက်ဆွဲတာတွေလုပ်နေပြီး မအူပင်မြို့ပေါ်မှာတော့ ရပ်ကွက်အုပ်ချုပ်ရေးမှူးတွေက လူငယ်တွေကို လိုက်ဝယ်ပေးတာတွေရှိနေသလို ခိုး၊ ဆိုး၊ လုယက်မှုကျူးလွန်သူတွေကိုဖမ်းဆီးပြီး စစ်တပ်ထဲ ပို့ပေးနေတယ်” လို့ ပြောပါတယ်။
မအူပင်မြို့နယ်အတွင်းမှာ ရပ်ကွက် ၁၂ ခုနဲ့ ကျေးရွာအုပ်စု ၈၈ အုပ်စုရှိပြီး စစ်မှုထမ်းဖို့အတွက် ၂ လတခါ၊ ၃ လတခါ လူငယ်တွေကိုရှာပြီး ပို့ပေးနေကြတယ်လို့ မအူပင်မြို့ခံတွေဆီက သိရပါတယ်။
