လာမယ့်ဧပြီလမှာ စစ်မှုထမ်းသက်တမ်း ၂ နှစ်ပြည့်မယ့် ပြည်သူ့စစ်မှုထမ်းတွေကို စစ်ကောင်စီတပ်က ပေးမထွက်ဘဲ အမြဲတမ်း စစ်မှုထမ်းခိုင်းမှာကို စစ်မှုထမ်း မိသားစုဝင်တွေက စိုးရိမ်နေကြပါတယ်။

၂၀၂၆ ခုနှစ် ဧပြီလမှာ စစ်မှုထမ်းသက်တမ်း ၂ နှစ်ပြည့်မှာဖြစ်တဲ့ အပတ်စဥ် ၁ သင်တန်းဆင်းတွေကို စစ်တပ်က အမြဲတမ်း စစ်မှုထမ်းစေဖို့ စည်းရုံးနေတဲ့အတွက် စစ်မှုထမ်းတွေရော မိသားစုဝင်တွေကပါ စိုးရိမ်နေကြောင်း မင်္ဂလာဒုံမြို့ခံတယောက်က ပြောပါတယ်။

“ဘယ်သူမှ စစ်မှုမထမ်းချင်ဘူး။ နာမည်နဲ့ တိုက်ရိုက်ခေါ်လို့၊ မဲပေါက်လို့၊ ပေါ်တာဆွဲခံရလို့ ရောက်သွားတဲ့သူတွေ ရှိတယ်။ ဧည့်စာရင်းနဲ့ အဖမ်းခံရလို့၊ ရန်ဖြစ်လို့ ရဲစခန်းကနေ စစ်တပ်ထဲ ရောက်သွားတဲ့သူတွေလည်းရှိတယ်။ စစ်တပ်ကဖမ်းပြီး လူစားထိုးရောင်းစားခံရလို့ ရောက်သွားတဲ့သူတွေလည်း ရှိတယ်။ မသေလို့ ကျန်နေတဲ့ကလေးတွေကို ထပ်ပြီး မစည်းရုံးပါနဲ့။ စစ်တပ်ကသာ ကတိတည်မယ်ဆိုရင် ၂ နှစ်ပြည့်ရင် ကျနော်တို့သားသမီးတွေကို ပြန်လွှတ်ပေးစေချင်တယ်။”

အပတ်စဥ် ၁ စတင်ခေါ်ယူစဥ်က ကိုယ့်ရပ်ကိုယ့်ရွာမှာ လုံခြုံရေး ပြန်ချပေးမယ်လို့ စစ်တပ်က ပြောဆိုခဲ့ပေမဲ့ သင်တန်းဆင်းပြီးတဲ့အခါ စစ်ရေးပြင်းထန်နေတဲ့ ရှမ်းမြောက်ကို ပို့ခဲ့တာကြောင့် သက်တမ်း ၂ နှစ်ပြည့်ရင် ဆက်လက်စစ်မှုထမ်းခိုင်းမှာ စိုးရိမ်နေတယ်လို့ မြောက်ဒဂုံမြို့ခံတယောက်က ပြောပါတယ်။

“အိမ်ကသားလေးနဲ့ အပတ်စဥ် ၁ မှာ သင်တန်းအတူတူဆင်းတဲ့ ကလေးတွေဆို ဒီနေ့သင်တန်းပြီး နောက်ရက် ရှေတန်းပို့တာ၊ လားရှိုးတိုက်ပွဲမှာ သေသွားတယ်။ ချက်ချင်းအကြောင်းမကြားဘူး၊ သေပြီး ၃ လလောက်နေမှ ပိုက်ဆံ ၅ သိန်းနဲ့ စာရွက်လေးတရွက် လာပေးတယ်။ အဲလိုသတင်းတွေ ကြားရတိုင်း ၂ နှစ် မြန်မြန်ကုန်ပါစေ ဆုတောင်းနေရတယ်။ ဒါပေမဲ့ စစ်တပ်က တောက်လျှောက် လိမ်လာတာဆိုတော့ မယုံရဲဘူး။”

၁၀၂၇ စစ်ဆင်ရေးမှာ အထိနာခဲ့တဲ့ စစ်ခေါင်းဆောင်က ၂၀၂၄ ဖေဖော်ဝါရီ ၁၀ ရက်မှာ လူတိုင်း မဖြစ်မနေ စစ်မှုထမ်းရမယ့် စစ်မှုထမ်းဥပဒေကို အသက်သွင်းပြီး နိုင်ငံတဝန်းက လူငယ်တွေကို နည်းမျိုးစုံနဲ့ ခေါ်ယူပြီး မတ် ၂၈ ရက်မှာ စစ်မှုထမ်းအပတ်စဥ် ၁ ကို စခဲ့တာပါ။

စစ်မှုထမ်းအပတ်စဥ် ၁ ကို ရန်ကုန်၊ မန္တလေး၊ ဧရာဝတီ၊ နေပြည်တော်၊ ပဲခူး၊ မကွေး၊ စစ်ကိုင်း၊ မွန်ပြည်နယ်နဲ့ ရှမ်းပြည်နယ်တောင်ပိုင်းက စစ်အခြေခံသင်တန်းကျောင်းနဲ့ တန်းမြင့် သင်တန်းကျောင်း ၁၄ ကျောင်းမှာ ဧပြီ ၈ ရက်က သင်တန်းပေးခဲ့ပြီး ဇွန် ၂၈ ရက်မှာ သင်တန်းဆင်းခဲ့တာ ဖြစ်ပါတယ်။

စစ်မှုထမ်းဥပဒေနဲ့ပတ်သက်ပြီး ကန့်ကွက်သူတွေရှိပေမဲ့ ထိရောက်မှုနည်းတာကြောင့် အခုဆို စစ်မှုထမ်းအပတ်စဥ် ၁၇ ကို သင်တန်းကျောင်း ၂၄ ကျောင်းအတွက် စစ်တပ်က လူသစ်စုဆောင်းနေပြီ ဖြစ်ပါတယ်။

အမျိုးသားများနည်းတူ အမျိုးသမီးစစ်မှုထမ်း အပတ်စဥ် ၁ ကို မှော်ဘီမြို့နယ်အခြေစိုက် အမှတ် ၄ အရာခံနဲ့ အကြပ်ကြီးသင်ကျောင်း (ရကသ-၄) မှာ ဖွင့်လှစ်နေတယ်လို့ Myanmar Defense & Security Institute - MDSI ရဲ့ ထုတ်ပြန်ချက်အရ သိရပေမဲ့ စစ်တပ်ဘက်က ငြင်းဆိုထားပါတယ်။