ဧရာဝတီတိုင်း၊ လပွတ္တာခရိုင်၊ တူးမြောင်းတိုက်နယ်ဆေးရုံမှာ ဦးခေါင်းနှစ်လုံးပါ ယောက်ျားလေးတယောက် မွေးဖွားခဲ့တယ်လို့ ဖြစ်စဉ်ကိုသိရှိတဲ့ ဒေသခံတွေဆီက သိရပါတယ်။

အဲဒီကလေးငယ်ကို မြောင်းမြခရိုင်၊ ရေကျော်ကျေးရွာအုပ်စု၊ နံကပ်ကျေးရွာက အသက် ၃၀ နှစ်အရွယ် အမျိုးသမီးတယောက်က တူးမြောင်းတိုက်နယ်ဆေးရုံမှာ ဩဂုတ် ၂၇ ရက် မနက် ၈ နာရီခွဲမှာ မွေးဖွားခဲ့တာလို့ ဆိုပါတယ်။

ဖြစ်စဉ်ကိုသိရှိတဲ့ ဒေသခံတယောက်က “ထူးထူးဆန်းဆန်းဆိုတော့လည်း စိတ်ဝင်စားမှု မြင့်တက်တာပေါ့နော်။ ဆေးရုံမှာကတည်းက လာကြည့်တဲ့သူတွေ မနည်း။ လက်ရှိအထိတော့ ကလေးရော မိခင်ပါ ကျန်းမာပါတယ်” လို့ ပြောပါတယ်။

လက်ရှိမှာတော့ မိခင်ရော ဦးခေါင်း ၂ လုံးနဲ့ ကလေးကိုပါ တူးမြောင်းတိုက်နယ်ဆေးရုံကနေ ရန်ကုန်ဗဟိုအမျိုးသမီးဆေးရုံကြီးကို လပွတ္တာမြို့နယ် လူမှုကယ်ဆယ်ရေးအဖွဲ့က ကူညီပို့ဆောင်ပေးထားတယ်လို့ သိရပါတယ်။

ကူညီပေးခဲ့သူတယောက်က “လိုအပ်တာတွေ စစ်ဆေးဖို့ ရန်ကုန်ဆေးရုံကို လွှဲတာလို့ သိရတယ်။ ခက်ခက်ခဲခဲနဲ့ မွေးခဲ့ရတာလို့ သိရတယ်။ ရန်ကုန်ဆေးရုံကြီးကို မနေ့ကတည်းက ပို့လိုက်ပါပြီ။ အဲ့လောက်ပဲ သိရပါတယ်” လို့ ပြောပါတယ်။

ပြီးခဲ့တဲ့ ၂၀၂၀ ပြည့်နှစ် စက်တင်ဘာ ၁၆ ရက်ကလည်း နေပြည်တော်၊ တပ်ကုန်းမြို့နယ် ခုတင်-၁၀၀ ပြည်သူ့ဆေးရုံမှာ တပ်ကုန်းမြို့နယ်၊ ရွေးစုကျေးရွာက အသက်၀ ၂၉ နှစ်အရွယ် အမျိုးသမီးတယောက်က ဦးခေါင်းနှစ်လုံးပါတဲ့ ယောကျ်ားလေးတယောက်ကို မွေးဖွားခဲ့သေးတယ်လို့ သိရပါတယ်။