ဧရာဝတီတိုင်း၊ လပွတ္တာမြို့နယ်၊ တူးမြောင်းကျေးရွာအုပ်စု၊ ဇီးဖြူကုန်းကျေးရွာမှာ သြဂုတ် ၁၁ ရက်က အမျိုးသမီးတယောက်အား အဓမ္မပြုကျင့် သတ်ဖြတ်ခဲ့သူကို သြဂုတ် ၁၇ ရက်မှာ ဖမ်းမိသွားတယ်လို့ ဒေသခံတွေဆီက သိရပါတယ်။
ဇီးဖြူကုန်းကျေးရွာမှာ သြဂုတ် ၁၁ ရက် နေ့လယ် ၂ နာရီကျော်လောက်က အသက် ၁၈ နှစ်အရွယ် အမျိုးသမီးတယောက် အဘိုးဖြစ်သူရဲ့အိမ်မှာ ဟင်းစားသွားယူပြီး အပြန်လမ်းမှာ ဖိုးဇော် အသက် ၃၅ နှစ်က အဓမ္မပြုကျင့် သတ်ဖြတ်ခဲ့တာလို့ ဆိုပါတယ်။
အဓမ္မပြုကျင့်သတ်ဖြတ်ပြီးနောက် ဇီးဖြူကုန်းရွာ အလယ်ကြားက ပျဥ်းမပင်မှာ အားကစားဘောင်းဘီရှည်နဲ့ လည်ပင်းကိုချည်ပြီး အပင်မှာ တွဲလောင်းချထားခဲ့ကာ ဆွဲကြိုးချ အဆုံးစီရင်တဲ့ပုံစံ ဖန်တီးခဲ့တာလို့ ဆိုပါတယ်။
တူးမြောင်းနယ်မြေ ရဲစခန်းနဲ့ နီးစပ်သူတယောက်က “လူသတ်တရားခံ ဖိုးဇော် အသက် ၃၅ နှစ်ကို သြဂုတ်လ ၁၇ ရက်နေ့က ဖမ်းဆီးရမိတယ်။ သူက မြောင်းမြမှာ လွန်ခဲ့တဲ့ ၂၀၂၄ ခုနှစ်က ဆိုင်ကယ်ခိုးမှုဖြစ်ပြီး အုပ်ချုပ်ရေးရုံးမှာ ဖမ်းဆီးထားတဲ့အချိန်က ထွက်ပြေးလာပြီး လပွတ္တာမြို့နယ်၊ ဇီးဖြူကုန်းကျေးရွာမှာ လာရောက်ပုန်းအောင်းနေသူ ဖြစ်တယ်” လို့ ပြောပါတယ်။
အခုအသတ်ခံရတဲ့ မမြတ်စု နေတဲ့အိမ်နဲ့ ဟင်းစားသွားယူတဲ့ အဘိုးဖြစ်သူအိမ်က လမ်းလျှောက်သွားရင် မိနစ် ၃၀ လောက်သာ သွားရတဲ့နေရာဖြစ်ပြီး နေ့လယ် ၂ နာရီကျော်က ဟင်းစားသွားယူတာ ညနေ ၄ နာရီကျော်အထိ အိမ်ပြန်မလာတာကြောင့် မိသားဟုဝင်တွေ လိုက်ရှာတဲ့အခါ ရွာအလယ်တောင်ကုန်းပေါ်က ပျဥ်းမပင်မှာ လည်ပင်း ဆွဲကြိုးချအနေအထားနဲ့ ပြန်တွေ့ရှိခဲ့ပါတယ်။
အလောင်းကိုစစ်ဆေးရာ မသင်္ကာဖွယ်ရာ တွေ့ရှိပြီး ရဲစခန်းတိုင်တန်းခဲ့ရာက ဖိုးဇော် ဆိုသူကို မသင်္ကာလို့ဆိုပြီး သြဂုတ် ၁၆ ရက်မှာ ဖမ်းဆီးစစ်ဆေးရာ အဓမ္မပြုကျင့်စဥ် ပြန်လည်ခုခံခဲ့လို့ လက်လွန်သွားခဲ့ပြီး အားကစားဘောင်းဘီကို ချွတ်ခါ လည်ပင်းမှာချည်ပြီး ဆွဲကြိုးချတဲ့ပုံ လုပ်ဆောင်ခဲ့တာလို့ ဝန်ခံခဲ့ကြောင်း ဆိုပါတယ်။
ဖိုးဇော် ကိုတော့ လပွတ္တာမြို့မရဲစခန်းမှာ ချုပ်နှောင်ထားပြီး လူသတ်မှု၊ အတင်းအဓမ္မပြုကျင့်မှုတွေနဲ့ ဆက်လက်စစ်ဆေးနေကာ တရားဥပဒေအရ အရေးယူဆောင်ရွက်ဖို့ လုပ်ဆောင်နေတယ်လို့ ရဲစခန်းနဲ့ နီးစပ်သူတွေဆီက သိရပါတယ်။
