ဘကြီးတို့ဆီမှာတော့ ဖုန်တထောင်းထောင်းထနေပြီလို့ ဘကြီးရဲ့စတိုင်အတိုင်း အရင်းမရှိ အဖျားမရှိ ဖုန်းဝင်လာတာနဲ့ တန်းလွှတ်တော့တယ်။ ဘယ်လိုကြောင့် ဖုန်တထောင်းထောင်းထနေတာလဲလို့ မေးကြည့်တော့ အမတ်လောင်းရှာပုံတော်ဖွင့်တဲ့ပါတီတွေနဲ့ ကျနော့်ကို အမတ်လောင်းရွေးပါလို့ ရင်ဘတ်ကြီး ကော့ပြ နေသူတွေက ဘကြီးတို့ မွန်ဒေသမှာ ယောက်ယက်ခတ်၊ လော်စပီကာကြီးနဲ့ ဗျိုးမဟစ်ကြရုံတမယ်တဲ့။

ကျနော်တို့ဇာတိမြေက တော်လှန်ရေးအင်အားစုတွေ အခြေစိုက်စခန်းတည်ဖို့ရာ နယ်မြေမရှိရုံတင်မ က ဝင်ချင်ဝင်လို့ ရပေမဲ့ ပြန်ထွက်ဖို့ ခက်တဲ့နေရာမို့ PDF ကင်းစင်ဒေသ။ စစ်ကော်မရှင်လက်မည်းကြီးတွေ အပြည့်အဝ ထိန်းချုပ်ထားနိုင်တဲ့မြို့မို့ စစ်ကော်မရှင်လက်အောက်ခံ ပါတီတွေ မျက်စိကျကြတဲ့မြို့။ မွန်ပြည်နယ်ထဲက မော်လမြိုင်၊ မုဒုံ၊ ချောင်းဆုံနဲ့ ပေါင်မြို့နယ်ဆိုတာက ကျေးလက်ဒေသတွေကိုတောင် စစ်ကော်မရှင်က အုပ်စီးထားနိုင်တာမို့ ပါတီတွေ သွားရည်ယိုနေကြတာ အတောင့်လိုက်။

ဒါပေမဲ့ မွန်မြို့တိုင်းမှာ ပါတီရုံးရှိပြီး ပါတီဝင် အတန်အသင့်ရှိတာဆိုလို့ ပြည်ခိုင်ဖြိုးပါတီတခုတည်း။ မွန်ညီညွတ်ရေးပါတီတောင် မွန်မြို့တိုင်းမှာ ပါတီရုံး ရှိတာမဟုတ်။ တနိုင်ငံလုံးဝင်ပြိုင်မယ့် ပါတီတွေဆိုရင် မြို့နယ်ပါတီရုံး ၁၁၀ ဖွင့်လှစ်ရမယ်ဆိုတော့ အသဲအသန် တွေချည်း။

တရားမဝင်ရွေးကောက်ပွဲဝင်မယ့် ပါတီတွေကို ထောက်ခံတယ်ဆိုတဲ့ ပြည်သူဆိုတာ ဒီခေတ်ဒီအခါမှာ အချောင်သမားတွေကလွဲရင် ရွှေထက်တောင်ရှားတာမို့ ဘယ်ပြည်သူကမှ ဒီပါတီကို ကြွေလို့ပါဆိုပြီး ကိုယ့်အိမ်ကိုယ့်ရာမှာ အခမဲ့ပါတီရုံးခန်းဖွင့်ခွင့်မပေး။ ပါတီရုံးဖွင့်ဖို့ ပိုက်ဆံနဲ့ အိမ်ငှားပါရစေဆိုတောင် ဒီအရှုပ်ထုပ်တွေကို အာရုံအနောက်မခံလိုသူတွေ များများမို့ အိမ်ငှားရတာတောင် မျက်နှာငယ်ရ။

မတရားဘဏ္ဍာငွေတွေနဲ့ ကျိကျိတက် ချမ်းသာနေသေးတဲ့ ပြည်ခိုင်ဖြိုးကလွဲ ကျန်ပါတီတွေက ပါတီရန်ပုံငွေလည်း သိပ်မရှိ၊ ရန်ပုံငွေ ထည့်ဝင်မယ့်သူလည်း မရှိဆိုတော့ အိမ်ငှားခပြဿနာကရှိ။ ပါတီရုံးထဲ ဖဲဝိုင်းထောင်တာတို့ ဘာတို့ မဖြစ်ဖို့ အတန်အသင့်စိတ်ချရတဲ့ လူခံရှိဖို့လည်း လိုသေးတာဆိုတော့ ငွေရှာရ လူရှာရနဲ့ မြို့နယ်ပါတီရုံးတွေ ဘယ်အမြန်ဖွင့်နိုင်ပါ့မလဲ။ ဇွန်လနှောင်းမှသာ ရွေးကောက်ပွဲ တကယ်လုပ်မှာ သေချာလာတော့ ပါတီတွေ ပြာယိပြာယာ။ ရုံးခန်းဖွင့်ဖို့ကိစ္စ၊ ဒေသခံ လေး၊ ငါးဆယ်ယောက်လောက် ပါတီဝင် ဖြစ်လာဖို့ ကြိုးစားရ။ အခက်တကာအခက်ဆုံးက လူရိုသေရှင်ရိုသေ အမတ်လောင်းရရှိရေး ချွေးသီးချွေးပေါက် အတောင့်လိုက်ကျနေတာတောင် ရှာမရ။

“မော်လမြိုင်မှာတော့ အာဏာသိမ်းပြီဆိုတာနဲ့ ခံဝန်ပြေးထိုးခဲ့တဲ့ NLD သစ္စာဖောက်နည်းနည်းက အမတ်လောင်းရမလားလို့ ပြည်သူ့ပါတီနဲ့ ပြည်သူ့ရှေ့ဆောင်ပါတီဝင်တာရှိတယ်။ တကယ်နိုင်ငံရေး လုပ်တဲ့သူတွေကတော့ မြို့ပေါ်မှာလည်း မရှိတော့ဘူး။ လူရိုသေရှင်ရိုသေနဲ့ ကောင်းရောင်းကောင်းဝယ် လုပ်စားနေတဲ့ သူ ဘယ်သူကမှ ပါတီရုံးရှေ့ရောက်ရင်တောင် အဖက်လုပ် လှည့်မကြည့်ကြဘူး” လို့ ဘကြီးက ဆိုတယ်။

ဒါပေမဲ့ ပါတီတွေက လူရမှဖြစ်မှာမို့ ဘယ်ဇွဲလျှော့လိမ့်မလဲ။ လူကြီးလူကောင်းတွေ မရတာ သေချာ တော့ ရိုးသားကြိုးစား ဒါနအားနဲ့ ချိုမြိန်နေတဲ့ ပရဟိတသမားတွေဆီ မျက်စောင်းထိုးတယ်။ နယ်မြို့တွေက ပရဟိတသမားတွေဆိုတာ ငွေကြေးအရ လူရိုသေရှင်ရိုသေ မရှိတောင် မွန်မြတ်တဲ့ စေတနာကြောင့် ပြည်သူတွေရဲ့ကြား ဂုဏ်ထူးထွက်ပြီးသားသူတွေ။ ပရဟိတသမားတချို့ကျတော့ နိုင်ငံရေးတွေဘာတွေ အာဏာသိမ်း စစ်တပ်က လုပ်တဲ့ တရားမဝင်ရွေးကောက်ပွဲဆိုတာတွေ မသိ။ ဘာပဲဖြစ်ဖြစ် အမတ်လေးဘာလေးဖြစ်ရင် မျက်နှာကြီးမျိုး တန်းဖြစ်သွားမယ်ဆိုတဲ့ စိတ်ကူးယဉ်မှုလေးလည်း ရှိတော့ ခေါင်းပေါင်းစတလူလူဘဝကို မျှော်ကာ ကြည့်မိ။
“နိုင်ငံရေးဆိုတာကိုတောင် စာလုံးမှန်အောင်မပေါင်းတတ်တဲ့ ဟိုကောင်တောင် အမတ်လုပ်ချင်ရင် ဘာတွေဖတ်မှတ်ထားဖို့လိုသလဲလို့ ဘကြီးကို လာမေးတာနဲ့ မင်းသောက်ရှက်မရှိဘူးလားဆိုပြီး ဆဲလွှတ်လိုက်ရသေးတယ်”လို့ ဘကြီးက ပြောပြတယ်။

ဘကြီးပြောတဲ့ ဟိုကောင်ဆိုတာက ဘကြီးနဲ့ ခပ်လှမ်းလှမ်းတော်တဲ့ တူတယောက်။ ခပ်အေးအေး ခပ်ရိုးရိုးနဲ့ ငွေလည်းမရှာတတ်သူမို့ အစ်မတွေဆီမှာ လူပျိုကြီးဘဝနဲ့ မှီခို။ ဘွဲ့တလုံးရထားပြီး မြို့ရွာအရေး ပရဟိတသမားအဖြစ် ရာသက်ပန်ဇောက်ချနေသူမို့ လူချစ်လူခင်တော့ ပေါသူ။

“ဘကြီးငေါက်လို့ ဒီကောင် အမတ်ရူးအာရုံပျက်သွားတာမဟုတ်ဘူး။ ကြံ့ဖွံ့တွေက ပေစောင်းစောင်း လုပ်လာလို့ ကြောက်သွားတာ” တဲ့။

ပေစောင်းစောင်းဆိုတာကို ဘာမှန်းမသိလို့ ထပ်မေးကြည့်တော့ လောဘကြီးလွန်းတဲ့ ပြည်ခိုင်ဖြိုး ကောင်တွေရဲ့ မသိမသာ ခြိမ်းခြောက်ချက်။ ဒီလောက် အစစအရာရာ အသာစီးရနေတာတောင် သူတို့ကို ယှဉ်နိုင်စွမ်းရှိတဲ့သူဆိုရင် ‘မင်းတခုခုဖြစ်သွားချင်သလား’ လို့ တရားမဝင်၊ မကြားတကြား လူမိုက်စကား ပြောလာတာကြောင့် စိတ်ကူးယဉ်နေသူ ပရဟိတတွေလည်း အမတ်ရူးအိပ်မက်ကို တိုးတိုးတိတ်တိတ်ပြန်ခေါက်သိမ်းသွားကြတယ်။

ပြည်ခိုင်ဖြိုးက ဘာအာဏာရှိလို့လဲတော့ မမေးနဲ့။ မင်းအောင်လှိုင်ခန့် မွန်ပြည်နယ်ဝန်ကြီးချုပ် အောင်ကြည်သိန်းဆိုတာက မွန်ပြည်နယ် ပြည်ခိုင်ဖြိုးပါတီဥက္ကဋ္ဌ။ မွန်မြို့တိုင်းရဲ့ မြို့နယ်အဆင့်အုပ်ချုပ်ရေအဖွဲ့မှာ ပြည်ခိုင်ဖြိုးတွေပါသလို ရပ်ကျေးအုပ်ချုပ်ရေးမှာလည်း ပြည်ခိုင်ဖြိုးတွေချည်းနီးပါးမို့ မွန်ဒေသမှာ ပြည်ခိုင်ဖြိုးဆိုတာ စစ်တပ်နဲ့မခြား ဓားထက်ပြီးသား။ ဘယ်သူမဆို ဘာမဆို ဖြစ်သွားနိုင်ဖို့ ပြည်ခိုင်ဖြိုးအတွက် သိပ်လွယ်လွန်းနေတာမို့ ကြောက်ကြရ။ ဒါ့ကြောင့် အမတ်ဖြစ်ဖို့ရာ စိတ်ကူးယဉ်နေပေမဲ့ ကြောက်လည်း ကြောက်တတ်တဲ့ လူရိုးတွေခမျာ ထသွားမှ ကျိုးမယ့်အဖြစ်မျိုး မတွေးဝံ့တော့တာမို့ ပြည်ခိုင်ဖြိုးမဟုတ်တဲ့ပါ တီတွေအတွက်တော့ အမတ်လောင်း ရရှိရေးဟာ လှော်နေရင်းနဲ့ တက်ကျိုးသလို ဇောချွေးတွေနဲ့ မြော့မြော့ လေး။

ပြည်နယ်ကိုယ်စားပြု အမျိုးသားရေးလို့ဆိုတဲ့ ပါတီကတော့ စိတ်မရှည်တော့လို့ပဲလား။ သူ့ပါတီကို လူကောင်းသူကောင်းတွေ စိတ်ဝင်စားမှာ မဟုတ်ဘူးဆိုပြီး စိတ်တုံးတုံးချထား လို့ပဲလား မသိ။ နံပါတ်တုတ်နဲ့ လက်ထိတ်သာကိုင်ရတဲ့ ပြည်သူ့လုံခြုံရေးအဖွဲ့ဝင်တဦးကို သူ့ပါတီအမတ် လောင်းအဖြစ် ရွေးချယ်လိုက်ကြောင်း ဘကြီးတို့မြို့မှာ သတင်းထွက်လာတယ်။

“အဲဒီပါတီဥက္ကဋ္ဌက လာဘ်အစားကြမ်းလို့ ရဲကနေ ပြုတ်ပြီး ရိုက်မှုနဲ့လည်း ထောင်ကျသွားသေးတယ်။ ထောင်ကနေပြန်ထွက်လာတော့ မဘသဆိုပြီး လက်သီးလက်မောင်းတန်းရာကနေ အခု ဘယ်နှယ့်ဘယ်လို ပါတီဥက္ကဋ္ဌ ဖြစ်သွားသလဲ မသိဘူး။ အခု သူခန့်လိုက်တဲ့ အမတ်လောင်းကလည်း စာရိတ္တခပ်ပျက်ပျက်ဆိုတော့ ဖိနပ်ပြတ်နဲ့ ခွေးငတ်တွေ့ကြပြီဆိုပြီး မြို့ပေါ်မှာ ဟာသ ဖြစ်နေတယ်” လို့ ဘကြီးက ဆိုတယ်။

ပြဿနာက ဟာသနဲ့တင် ရပ်မနေ။ စစ်တပ်နဲ့ ပတ်သက်ရာပတ်သက်ကြောင်းတွေကြား ဒီလိုကောင် တောင် အမတ်လောင်းဖြစ်တာ ငါတို့လည်း အမတ်လောင်းဖြစ်နိုင်သားပဲဆိုပြီး အရူးချင်းကြား ငါက  တမူး သာကြောင်း ပခုံးချင်း ယှဉ်ကြ။ ပြည်သူ့စစ်တွေနဲ့ ပြည်သူ့လုံခြုံရေးအဖွဲ့ဝင်တွေထဲက အခြေခံပညာအထက်တန်းအဆင့်လောက် ပြီးမြောက်ခဲ့သူတွေ ပါတီရုံးတွေရှေ့ လမ်းသလားပြတော့တယ်။ သူတို့က စစ်တပ် ကျောထောက်နောက်ခံ ရှိပြီးသားမို့ ပြည်ခိုင်ဖြိုးကို ကြောက်ဖို့မလိုသလို ပြည်ခိုင်ဖြိုးကလည်း သူတို့လို လူမုန်းများတဲ့သူတွေ ရွေးကောက်ပွဲဝင်မှာ ကြိုက်တော့ ဘေးတီးပေးတော့တယ်။ ဒါနဲ့ ဘကြီးတို့မွန်တိုင်းဌာနေမှာ အမတ်ရူးတွေနဲ့ လှေလူးနေတာတွေကြောင့်  ပြည်သူတို့ရဲ့ လက်ဖက်ရည်ဝိုင်းမှာ မြည်းစရာ ဟာသကိုဖြစ်လို့။

ပါတီတချို့ကျတော့ စစ်တပ်က တရားမဝင်လုပ်မယ့် ရွေးကောက်ပွဲကိုသာ ဝင်ကြတာ။ သူတို့ပါတီရဲ့ အမတ်လောင်းတွေကျတော့ ရပ်ထဲရွာထဲ နိုင်ငံရေးနားမလည်ရင်တောင် လူရိုသေ ရှင်ရိုသေတော့ ဖြစ်ချင်ကြသေးဆိုတော့ စိတ်ဓာတ်တွေ ကျရ။ ဒါပေမဲ့ စက်တင်ဘာ ၈ ရက်မှာ အမတ်လောင်းအမည်စာရင်း စတင် တင်သွင်းကြတော့လို့ မင်းအောင်လှိုင် ရွေးကောက်ပွဲကော်မရှင်က စာထုတ်လိုက်ပြီမို့ ဒီအနူတောထဲမှာ အပုပ်ကြီးထဲက အပုပ်လေးကိုသာ ရွေးချယ်ကြဖို့သာ တခုတည်းလမ်း။ ဘာပဲဖြစ်ဖြစ် စစ်ကျွန်သဘောက်တွေကို ပါတီအမတ်လောင်းရွေးချယ်တဲ့အပေါ် အဘကြီး မင်းအောင်လှိုင် ခံတွင်းလိုက်မှာတော့ သေချာတယ်။

ဒီဇင်ဘာ ၂၈ မှာ စစ်ရာဇဝတ်ကောင်တွေနဲ့ အမှုတွဲ နိုင်ငံရေးမသာချပွဲ ကျင်းပမယ်။ အမတ်လောင်းတွေ ကလည်း ရပ်ထဲ ရွာထဲ ပုပ်ပွနေသူတွေချည်းမို့ အေးဆေးပဲ။

ထွန်းလင်း