သတင်းစာမှာ၊ မီးလာပါ၍

အိမ်မှာ နေ့ ည၊ မီးမရတာ

ဘယ်ကမှားလဲ၊ ဘယ်မှန်လဲ

သဲသဲကွဲကွဲ သိလိုပါသည်ဗျား။ ။

ကျနော် ပြောတာမဟုတ်၊ လူရွှင်တော်ဇာဂနာ ပြောတာ။ သတင်းစာတွေမှာတော့ တပြည်လုံး လျှပ်စစ်မီးတွေ ထိန်လင်းနေကြောင်း ဖော်ပြနေတယ်။ ရွာထဲမှာ ရပ်ကွက်ထဲမှာ အိမ်တွေမှာတော့ မီးကမလာပါ။ တကယ်က အဖြစ်မှန်က မီးမလာပါ။ တနိုင်ငံလုံးသိပါတယ်။ ဒါပေမဲ့ မင်းအောင်လှိုင် ဇော်မဲလုံးတို့ရဲ့ ကြိုးကိုင် သတင်းစာတွေမှာတော့ မီးတွေ ထိန်လင်းနေပါတယ်။ ဒါကြောင့် လင်းသလား မလင်းဘူးလား မေးရင်တော့ “သတင်းစာမှာ မီးလင်းပြီး ရပ်ရွာထဲမှာတော့ မီးမလင်း” ပါ။

အိုးဘိုထောင်ထဲ ဗုံးတွေ ကြဲလား မကြဲလား

အခုလည်း မန္တလေးထောင်ကို ဗုံးကြဲလို့ သေကြရတယ်။ သူတို့ စစ်လော်ဘီတွေဘက်ကတော့ ဗုံးလည်း မကြဲဘူး၊ သေလည်း မသေဘူးတဲ့။ အော်နေကြတယ်။ နိုင်ငံရေး အကျဉ်းသားဟောင်းတွေကတော့ အိုးဘိုထောင်ကို ဗုံးကြဲခံရလို့ သေကြပါတယ်လို့ သတင်းထုတ်ပါတယ်။ ဒီတော့ မေးစရာပေါ်လာတာက “သေကြသလား၊ မသေကြဘူးလား။ ဗုံးကြဲချသလား၊ ဗုံးကြဲမချဘူးလား။ စာဖတ်သူများ ဖြေပေးကြပါ။ ပုန်းလျှိုးနေကြရတဲ့ နိုင်ကျဉ်းဟောင်းတွေကတော့ ဗုံးကြဲတယ်။ သေကြတယ်လို့ ပြတ်ပြတ်သားသား ပြောနေပြီ။ ကဲ အိုးဘိုထောင်ရေ ပြောလိုက်တော့။ မဟုတ်ရင် မဟုတ်ဘူး။ ဟုတ်ရင်လည်း ဟုတ်တယ်ပေါ့။ ပြော ပြော။ မြန်မြန်ပြော။ မပြောသေးဘူးလား။ ဒါဆိုလည်း မေး မေးနေကြဦးမှာပါ့။ သေကြသလား မသေကြဘူးလား။ ဗုံးကြဲချသလား ဗုံးကြဲမချဘူးလား။ စာဖတ်သူများ ဖြေပေးကြပါ။ မန္တလေးထောင်က ဖြေပေးပါ။ သတင်းမှန် ပြန်ကြားရေးက ဖြေပေးပါ။”

သင်္ကြန်တတွင်း၊ သေခြင်း ၄၀၀ ထုတ်ပြန်တာက ၃၀ ပါ

ကျနော်ကိုယ်တိုင် မေးဖူးတဲ့ မေးခွန်းတခု ရှိဖူးတယ်။ ၂၀၁၈ သင်္ကြန်မှာ တနိုင်ငံလုံး လူ ၃၀၀ ကျော် ၄၀၀ လောက်ထိ သေနိုင်တယ်လို့ သတင်းရထားတယ်။ သင်္ကြန်တွင်း ၅ ရက်မှာ လူဘယ်လောက် သေသလဲ။ ရဲချုပ်ကို မေးခဲ့ဖူးတယ်။ ပြည်သူ့ရဲတပ်ဖွဲ့က ထုတ်ပြန်ပါမယ်တဲ့။ ဒါက ရဲချုပ်ရဲ့ အဖြေပါ။ ထုတ်ပြန်ချက်ထွက်လာတော့ သင်္ကြန်ကာလ လူ ၃၀ သေသတဲ့။ ကျနော်က ရဲတပ်ဖွဲ့ကို ပြောခဲ့တယ်။ မြဝတီတမြို့မှာပဲ ၆ ယောက် သေပါတယ်။ ကော့ကရိတ် ဘားအံ စတဲ့ ကရင် တပြည်လုံးမှာ ရန်ကုန်မှာ မန္တလေးမှာ အားလုံးပေါင်းရင် ၂၀၀ ကျော် သေပါတယ်။ တပြည်လုံးဆို ၃၀၀ ကနေ ၄၀၀ ကြား သေမယ်လို့ ခန့်မှန်းထားပါတယ်။ ရဲထုတ်ပြန်ချက် ၃၀ ဦးကတော့ မှားပါတယ်လို့ ပြောခဲ့ဖူးတယ်။ ရဲက ၃၀ ပဲတဲ့။ တရားဝင် ထုတ်ပြန်ချက်ပဲတဲ့။ အဲသည်မှာ မေးခဲ့ဖူးတာက ၃၀ သေတာ အမှန်လား ၃၀၀ ကျော် သေတာ အမှန်လား။

ထုတ်ပြန်စာရင်း

အထက်မင်း၏

စိတ်တွင်းဆန္ဒ

ဖြစ်ကြရပါသည်တကား။ ။

သင်္ကြန်သေတာ ၃၀ လား။ ၃၀၀ ကျော်လား။ မေးခွန်းရဲ့ အဖြေမှန်က ၄၀၀ ကျော် အမှန် ဖြစ်သွားခဲ့ပါတယ်။ နောက်နှစ် သင်္ကြန်မတိုင်ခင် သင်္ကြန်တွင်း အသေနည်းရေး ကြိုတင်အစည်းအဝေး ဧပြီလဆန်း ၂၀၁၉ မှာ လုပ်တယ်။ ဒုသမ္မတ ဦးဟင်နရီဗန်ထီးယူက ဦးဆောင်တယ်။ သူက မနှစ်တုန်းက သင်္ကြန်တွင်းမှာ ၄၀၀ ကျော် သေခဲ့တယ်။ ဒီနှစ် အသေနည်းအောင် ကြိုတင်စီမံကြဖို့ အစည်းအဝေးမှာ ပြောသွားခဲ့တယ်။ သတင်းစာမှာ သူပြောတဲ့ ၄၀၀ ကျော် သေခဲ့တယ်ဆိုတာကို ထည့်ရေး ဖော်ပြတယ်။ ကျနော်က သတင်းစာကိုင်ပြီး ရန်ကုန်တိုင်း ရဲတပ်ဖွဲ့ကို သွားပြတယ်။ ကြည့်ပါ။ ရှုပါ။ တကယ်သေတာ ၄၀၀ ကျော်ပါ။ ခင်ဗျားတို့ ပြည်သူ့ရဲက ထုတ်ပြန်ထားတာ ၃၀ ဦးပဲလို့ ပြောတော့ သူတို့ပြောလိုက်တာက ကျနော်တို့လည်း အထက်ကချပေးတဲ့ စာရင်းကို ပြန်ဖော်ပြပေးရတာတဲ့။ ကြည့်ပါဦး တနှစ်ကြာမှ နိုင်ငံတော် အတာသင်္ကြန် ထိခိုက် သေဆုံး ဦးရေက အမှန်ပေါ်လာရတယ်။ ဒါက ဒီမိုကရေစီ အစိုးရလက်ထက်မို့ တနှစ်နဲ့ အမှုမှန်ပေါ်တာနော်။ အခုလို ငါမိုကရေစီ စစ်တပ်လက်ထက်မှာတော့ အမှန်ပေါ်လာစရာ မမြင်ပါ။ ဒါကြောင့် အိုးဘိုထောင်ကို ဗုံးကြဲသလား မကြဲဘူးလား။ အကျဉ်းသားတွေ သေကြသလား မသေဘူးလား။ ထပ်မေးဦးမယ်။ “သေကြသလား မသေကြဘူးလား။ ဗုံးကြဲချသလား ဗုံးကြဲမချဘူးလား။ စာဖတ်သူများ ဖြေပေးကြပါ။”

ဆုံးရှုံးသလား မဆုံးရှုံးဘူးလား ငွေတွေမည်းမလား မမည်းဘူးလား

၁၉၈၇ ခုနှစ် စက်တင်ဘာလဆန်းက ဖြစ်ပါတယ်။ ငွေတွေ မည်းမယ်တဲ့။ သတင်းတွေ ကျယ်ကျယ်ပြန့်ပြန့် ကြားနေရတယ်။ မဆလ အစိုးရက သတင်းစာတွေကနေ စာလုံးမည်းကြီးတွေနဲ့ ကြေညာလိုက်တယ်။ မိဘပြည်သူများ နိုင်ငံတော်ငွေစက္ကူတွေကို စိတ်လက်ချစွာ အသုံးပြုနိုင်ကြောင်း၊ ရောင်းဝယ် ဖောက်ကားနိုင်ကြောင်း၊ အစိုးရက တရားမဝင် ကြေညာဖို့ လုံးဝ (လုံးဝ) အစီအစဉ် မရှိကြောင်း သတင်းစာတွေမှာ ၃ ရက်ဆက်တိုက် ဖော်ပြခဲ့တယ်။ ရုပ်မြင်သံကြားနဲ့ မြန်မာ့အသံကလည်း ငွေမည်းလုပ်ရန် အစီအစဉ် မရှိပါကြောင်း ကြေညာနေခဲ့တယ်။ မေးခွန်းတွေဖြစ်နေတဲ့ (ငွေစက္ကူတွေ တရားဝင်ဦးမလား တရားမဝင် ကြေညာမလား။ ပြည်သူတွေ ဆုံးရှုံးမလား မဆုံးရှုံးဘူးလား) ဆိုတာတွေက မဆလ အစိုးရက နိုင်ငံတော်မီဒီယာကတောင် တကူးတက ပြည်သူတွေ စိတ်အေးရအောင် ပြောနေတာပဲ။ စိတ်ချရပါပြီပေါ့။ စိတ်အေးလက်အေး ဖြစ်ကုန်ကြတာပေါ့။ စိတ်အေးလို့မှ ဖင်တောင်မပူသေး နောက်တရက် ၁၉၈၇ ခုနှစ်၊ စက်တင်ဘာလ ၅ ရက်နေ့ ၇၅ ကျပ်၊ ၃၅ ကျပ်၊ ၂၅ ကျပ်တန် ငွေစက္ကူတွေ ဖျက်သိမ်းလိုက်ကြောင်း ရေဒီယိုက ကြေညာခဲ့ပြီ။ ရက်စက်လိုက်တာ။ တက္ကသိုလ်ကျောင်းသားတွေ ရန်ကုန်မှာ ကန့်ကွက်ဆန္ဒပြကြပြီ။ တက္ကသိုလ်တွေပိတ်လိုက်ပြီ။ စိတ်ချပါလို့ ကျိန်ပြောနေတာကိုက စိတ်မချရတာပါပဲလားလို့ တတိုင်းတပြည်လုံး သင်ခန်းစာ ရလိုက်တာပေါ့။ ဆုံးရှုံးမလား မဆုံးရှုံးဘူးလား ငွေတွေမည်းမလား မမည်းဘူးလား။ နောက်ဆုံးတော့ ငွေမည်းတွေဖြစ်သွားကြတာပါပဲ။ ဒါက လွန်ခဲ့သော ၃၈ နှစ်က ကိစ္စ။ မဆီမဆိုင် အခု မေးစရာ ပြန်ပေါ်လာပြန်ပါပြီ။ ကဲ ဖြေပါ။ မန္တလေး အိုးဘိုထောင်ကို ဗုံးကြဲသလား မကြဲဘူးလား။ အကျဉ်းသားတွေ သေကြသလား မသေဘူးလား။ တော်တော့်ကို မကျေနပ်လို့ ထပ်မေးဦးမယ်။ “သေကြသလား မသေကြဘူးလား။ ဗုံးကြဲချသလား ဗုံးကြဲမချဘူးလား။ စာဖတ်သူများ ဖြေပေးကြပါ။”

တပ်ကြပ်တင်အောင်ထွန်း ရှိသေးလား သေပြီလား

စစ်အာဏာသိမ်း မင်းအောင်လှိုင် စစ်တပ်ရဲ့ ခြေမြန်တပ်ရင်း တခုမှာ ၂၀၂၂ ခုနှစ်က ဖြစ်ခဲ့တဲ့ ဖြစ်ရပ်မှန် ဝတ္ထုပါ။ ခင်မေသန်းရဲ့လင် တပ်ကြပ်တင်အောင်ထွန်း သေပြီလား ရှိသေးလား။ မိသားစုက သိချင်နေကြတယ်။ ဇနီးခင်မေသန်းနဲ့ ကလေး ၂ ယောက်က သိချင်နေကြတယ်။ ဆွေမျိုးတွေကလည်း သိချင်နေကြတယ်။ ၂၀၂၁ ခုနှစ် ဖေဖော်ဝါရီလဆန်းကတည်းက ရှေ့တန်းထွက်သွားတဲ့ တပ်ကြပ်တင်အောင်ထွန်းဟာ ၂ နှစ်ကြာလာတဲ့အထိ မိသားစုနဲ့ အဆက်အသွယ် မရတော့ပါ။ ဒါကြောင့် မိသားစုကလည်း တပ်ရင်းမှူးကို မေးတာပေါ့။ တပ်ရင်းမှူး ပြောတာက ရှေ့ကို တိုက်ကင်းထွက်ရင်း ကျွံနေလို့ပါတဲ့။ မကြာခင် ပြန်လာမယ်။ နောက်တန်းကို ပြန်ခေါ်ပေးမယ်တဲ့။ တလလည်း ပြန်မလာပါ။ ၂ လလည်း မလာသေးပါ။ ၃ လ ၄ လ ၅ လ တောင် ကြာသွားပြီ။ တပ်ရင်းမှူးကတော့ ခေါ်ထားပြီမို့ ပြန်လာတော့မယ် ပြောနေတုန်းပဲ။ ရက်ကို လစား ကြာသွားဖန်များလာတော့ မေးကြပြီပေါ့။ တပ်ကြပ်တင်အောင်ထွန်း ရှိသေးလား သေပြီလား။ တပ်ကြပ်တင်အောင်ထွန်း ပြန်လာဦးမလား။ မလာတော့ဘူးလား။ ဒီကိစ္စ နောက် ၃ လအကြာမှာ အဖြေပေါ်သွားတယ်။ ပေါ်ပုံကတော့ ဒီလိုပါ။ တနေ့ မိုးမချုပ်တချုပ်မှာ ကိုမာစီ ဆိုတဲ့ တပ်ရင်းနားမှာနေတဲ့ လူကို သရဲဝင်ပူးတယ်။ သရဲက ငိုပြီး သူ့ဇနီး ခင်မေသန်းကို တွေ့ချင်တယ်လို့ ပြောတော့ ခင်မေသန်းကို ခေါ်ပေးရတာပေါ့။ အဲသည်တော့မှ ဝင်ပူးတဲ့ သရဲဟာ တပ်ကြပ် တင်အောင်ထွန်း ဆိုတာ သိရတော့တာပေါ့။ သူက တပ်ကြပ်တင်အောင်ထွန်းပါ။ ၂၀၂၁ ခုနှစ် နှစ်စကတည်းက သူက မိုင်းနင်းမိလို့ သေပြီးသားတဲ့။ သူ့အတွက် ဆွမ်းသွပ် အမျှဝေပေးကြဖို့ ပြောပြီး တပ်ကြပ်တင်အောင်ထွန်း သရဲလည်း လူထဲ ဝင်ပူးနေရာကနေ ထွက်သွားတယ်။ အဲသည်ကျမှ သူသေပြီးတာ ၂ နှစ်ကြာသွားပါပြီလားလို့ သိကြရတော့သတဲ့။ အခုလည်း တိုက်ဆိုင်လို့ မေးစရာ ပြန်ပေါ်လာပြန်ပါပြီ။ ကဲ ဖြေပါ။ မန္တလေး အိုးဘိုထောင်ကို ဗုံးကြဲသလား မကြဲဘူးလား။ အကျဉ်းသားတွေ သေကြသလား မသေဘူးလား။ တော်တော့်ကို မကျေနပ်လို့ ထပ်ပြီး ထပ်ပြီး ထပ်မေးဦးမယ်။ “သေကြသလား မသေကြဘူးလား။ ဗုံးကြဲချသလား ဗုံးကြဲမချဘူးလား။ ဖြေပေးကြပါ။”

အမေစုနဲ့ ထိုင်းနိုင်ငံခြားရေးဝန်ကြီး တွေ့ကြသလား မတွေ့ကြဘူးလား

၂၀၂၃ ခုနှစ် ဇူလိုင် ၉ ရက်နေ့က ထိုင်းနိုင်ငံခြားရေးဝန်ကြီး ဒွန်ပရာမွတ်ဝိနိုင်း နေပြည်တော်ကို တိတ်တဆိတ် သွားရောက်ခဲ့ပြီး ဒေါ်အောင်ဆန်းစုကြည်နဲ့ တွေ့ခွင့်ရခဲ့တဲ့အကြောင်း သတင်းဌာနတွေကို ပြောခဲ့တယ်။ ဇူလိုင် ၁၂ ရက်မှာ ဒေါ်အောင်ဆန်းစုကြည်ရဲ့ သတင်းစကားကို အာဆီယံ အစည်းအဝေးမှာ ဖတ်ကြားခဲ့သလိုလို သတင်းက ထွက်လာတယ်။ ကဲ မေးကြည့်မယ်နော်။ အမေ ဒေါ်အောင်ဆန်းစုကြည်နဲ့ ထိုင်းနိုင်ငံခြားရေးဝန်ကြီးတို့ဟာ တွေ့ခဲ့ကြသလား မတွေ့ခဲ့ကြဘူးလား။ အခု ၂ နှစ်ကြာလာတဲ့အထိ ရှင်းရှင်းလင်းလင်း မသိကြရသေးဘူး။ တွေ့တယ်။ မတွေ့ဘူး။ ဒါလေးတောင်မှ ၂ နှစ်စောင့်ရတဲ့တိုင် အဖြေက မရသေးဘူး။ နောက်ထပ်လည်း ဒေါ်အောင်ဆန်းစုကြည် ထောင်ထဲက ဓာတ်ပုံဆိုပြီး မျက်နှာကို အလွန် အနီးကပ် ကပ်ရိုက်ထားတဲ့ပုံ တပုံ ထွက်ပေါ်လာခဲ့ပြန်တယ်။ တကယ့် အမေစုပုံလား။ ဒါမှမဟုတ် အမေစုပုံမဟုတ်ဘူးလား။ မရှင်းမလင်းပါပဲ။ အခုအထိ မပွင့်လင်းသေးပါဘူး။ အခုလည်း လာပြန်ပြီ။ မန္တလေး အိုးဘိုထောင်ကို ဗုံးကြဲသလား မကြဲဘူးလား။ အကျဉ်းသားတွေ သေကြသလား မသေဘူးလား။ တော်တော့်ကို အရမ်းကို မကျေနပ်လွန်းလို့ ထပ်ပြီး ထပ်ပြီး ထပ်ကာ ထပ်ကာထပ်မေးဦးမယ်။ အိုးဘိုထောင်မှာ "သေကြသလား မသေကြဘူးလား။ ဗုံးကြဲချသလား ဗုံးကြဲမချဘူးလား။ စာဖတ်သူများ ဖြေပေးကြပါ။ "

သမ္မတကြီး ဦးဝင်းမြင့် နေကောင်းလား မကောင်းဘူးလား

သမ္မတဦးဝင်းမြင့် တောင်ငူအကျဉ်းထောင်အတွင်း ကျန်းမာရေး မကောင်းတဲ့အတွက် ဆီးပိုက် တပ်ထားရသတဲ့။ တချို့ကလည်း သမ္မတကြီး နေကောင်း ကျန်းမာပါတယ်တဲ့။ တချို့ကလည်း သမ္မတကြီးဟာ တောင်ငူထောင်မှာ မရှိတော့ဘူးတဲ့။ အမေစုလိုပဲ စစ်စခန်းတခုမှာ ထားသတဲ့။ ရေငုံနှုတ်ပိတ်နေပါတယ်။ တေမိ လုပ်နေပါတယ်။ သမ္မတကြီးရော အမေစုရော ရှေ့နေနဲ့တောင် တွေ့ခွင့် မရှိ။ မင်းအောင်လှိုင်ကတော့ ဒေါ်အောင်ဆန်းစုကြည် ကျန်းမာနေပါတယ်လို့ တရုတ် သတင်းဌာနတခုကို ပြောသတဲ့။ မကြာခင်ကပဲ အမေစု ထောင်တွင်း ဓာတ်ပုံတွေနဲ့ နေ့စဉ် နေထိုင်မှု မှတ်တမ်းတွေလည်း ထွက်ပေါ်လာသေးတယ်။ ဒါပေမဲ့ ဒါတွေဟာ လိမ် ညာ မုသား ပြောပါများလှတဲ့ စစ်ဗိုလ်ချုပ်ကတွေဆီက လာတဲ့ စကားတွေလေ။ အမြဲ အမှားပြောနေသူတွေရဲ့စကားဆိုတော့ ဘယ်လို ယုံရပါ့မလဲ။ ဒီတော့ မေးစရာတွေ ပေါ်လာပြန်တယ်။ သမ္မတနဲ့ အမေစုတို့ ထောင်မှာပဲ ရှိသလား။ ထောင်မှာ မရှိတော့ဘူးလား။ သူတို့ ကျန်းမာကြလား။ မကျန်းမာကြဘူးလား။ ဒီမေးခွန်းတွေကို ဖြေရမယ့်သူတွေကလည်း အာဏာသိမ်း စစ်ဗိုလ်ချုပ်ကြီးများလေ။ ဒီတော့ ထပ်မေးစရာပေါ်လာတာက အဲ့သည် အာဏာသိမ်း စစ်ဗိုလ်ချုပ်ကြီးတွေ ပြန်ဖြေကြမှာတွေကရော အမှန်တွေလား။ မမှန်တာတွေလား။

ထပ်ထပ်ပြီး အာဏာသိမ်း ဗိုလ်ချုပ်ကြီးတွေကို နောက်ဆုံး မေးစရာများ

အမေစု၊ ဦးဝင်းမြင့်နဲ့တကွ နိုင်ငံရေး အကျဉ်းသားတွေအားလုံး ကျန်းမာကြလား၊ မကျန်းမာကြဘူးလား။ ထောင်ဆရာဝန်တွေက ဆေးကောင်းကောင်း ကုပေးကြသလား။ မကုပေးကြဘူးလား။ (ကြားနေရတာကတော့ လုံးဝကုမပေးဘူးတဲ့)။ ကုမပေးလည်းထား။ ထောင်ထဲမှာ ဆေးတွေ လုံလောက်သလား။ မလုံလောက်ဘူးလား။ (မလုံလောက်ဘူးလို့သာကြား) နောက်ပြီး ထောင်ထဲကို ဆေးသွင်းလို့ ရလား။ မရဘူးလား။ (မရဘူးလို့ကြား) ထောင်တွေထဲမှာ နိုင်ငံရေး အကျဉ်းသားတွေ ရှိနေသလား။ ရှိမနေဘူးလား။ (စစ်တပ်ကတော့ နိုင်ငံရေး အကျဉ်းသားဆိုတဲ့ ဝေါဟာရတောင် မကြားဘူးဘူးလို့ ပြောနေကြ)ပါရဲ့။ ကဲ ဒါတွေ မဖြေချင်လည်း ထားတော့။ အခု မေးတာလေးကို ဖြေပေးပါတော့။ မန္တေလေး အိုးဘိုထောင်မှာ "သေကြသလား မသေကြဘူးလား။ ဗုံးကြဲချသလား ဗုံးကြဲမချဘူးလား။ အာဏာတောင် သိမ်းထားရဲကြတဲ့ ဗိုလ်ချုပ်ကြီးများက အခု မေးခွန်းလေးလောက်ကိုတော့ ဖြေရဲကြလိမ့်မယ် ထင်ပါတယ်။

အိုးဘိုထောင်ထက်

ဗုံးချနှက်လား မနှက်လား

အများ သိလိုကြပါသည်။

အိုးဘိုထောင်တွင်း

နိုင်ကျဉ်းသေလား၊ မသေလား

ဖြေကြားပေးစေလိုပါသည်။ ။