‌ချင်းပြည်နယ်၊ မတူပီမြို့နယ်မှာ လုံခြုံရေးအခြေအနေကြောင့် ကုန်သွယ်ရေးစည်းကမ်းချက် ကန့်သတ်ချက်တွေကို မတူပီတော်လှန်ရေးအဖွဲ့ချုပ် (MRO) နဲ့ ချင်းပြည်ကာကွယ်ရေးတပ် (CDF) မတူပီတို့က ဩဂုတ် ၂၇ ရက်နေ့မှာ ထုတ်ပြန်ပါတယ်။

လုံခြုံရေးအခြေအနေကြောင့် ဩဂုတ် ၆ ရက်ကစပြီး ပိတ်ပင်ခဲ့ရာက ဩဂုတ် ၂၈ ရက်မှာ ပိတ်ပင်ထားတဲ့ ကုန်သွယ်ရေးလမ်းကြောင်းကို သတ်မှတ်ချက်တွေနဲ့ ပြန်လည်ဖွင့်လှစ်မှာ ဖြစ်ပါတယ်။

မိုးရာသီ ကားလမ်းအခြေအနေအရ အိမ်စီးကားနဲ့ ယာဉ်ငယ်တွေသာ ဖြတ်သန်းသွားလာခွင့်ပြုတာ၊ ကားကြီးတွေ ဝင်ထွက်သွားလာခွင့်မပြုတာ၊ မတူပီဒေသတွင်း ရောင်းချမယ့် ကုန်တွေကိုသာ ယာဉ်ကြီးတွေနဲ့ တင်ဆောင်ခွင့်ပြုတာ၊ ရောင်းမယ့်ကုန်စည်အားလုံးကို ကုန်စည်ခွန် ပေးဆောင်ဖို့၊ ထုတ်ပြန်ထားတဲ့ သတ်မှတ်ချက်တွေ အားလုံးကို လိုက်နာဖို့ စတဲ့ စည်းကမ်းချက်တွေ ပါရှိပါတယ်။

ဩဂုတ်လလယ်မှာ စစ်ကောင်စီတပ်က ချင်းပြည်နယ်ကို စစ်သားအင်အား ၂,၀၀၀ ဝန်းကျင်သုံးပြီး ထိုးစစ်ဆင်ဖို့ ပြင်ဆင်နေတဲ့အတွက် မကွေးတိုင်းနဲ့ ချင်းပြည်နယ်ကို ဆက်သွယ်ထားတဲ့ လမ်းကြောင်းတွေကို ကာကွယ်ရေးတပ်ဖွဲ့တွေက ပိတ်ပင်ခဲ့ပါတယ်။