စပိန်နိုင်ငံဟာ အခုနွေရာသီမှာ တောမီး ၁၁၃ နေရာ လောင်ကျွမ်းခဲ့တဲ့ မြူနီစီပယ်မြို့တွေကို အရေးပေါ်နယ်မြေအဖြစ် သြဂုတ် ၂၆ ရက်မှာ ကြေညာခဲ့ပါတယ်။

စပိန်နိုင်ငံရှိ ဒေသစုစုပေါင်း ၁၆ ခုကို အရေးပေါ်အစီအစဉ် စာရင်းထဲ ထည့်သွင်းထားကြောင်း စပိန်ပြည်ထဲရေးဝန်ကြီး ဖာနန်းဒို ဂရန်းဒဲမာလာ့စ်ကာက ပြောပါတယ်။

“ကက်ဘိနက်အစည်းအဝေးက အခုလေးတင် အရပ်ဘက်ကာကွယ်ရေး အရေးပေါ်အခြေအနေကို ကြေညာလိုက်တာဖြစ်ပြီး ဇွန် ၂၃ ရက်မှ သြဂုတ် ၂၅ ရက်အထိ ၂ လတာ ကာလအတွင်း တောမီး အကြီးအကျယ် လောင်ကျွမ်းမှု ၁၁၃ မှု ကြုံတွေ့ခဲ့ရတဲ့နယ်မြေ အားလုံးပါတယ်။”

လောလောဆယ်မှာလည်း မီးလောင်မှုကြီး ၁၅ ခုက အခုထိ မငြိမ်သက်သေးတာကြောင့် မီးလောင်ပြင် နေရာတွေမှာ ထိခိုက်ပျက်စီးမှု သို့မဟုတ် အရေးပေါ်အခြေအနေအတွက် အကဲဖြတ်ဖို့ စောလွန်းပါသေးတယ်လို့ ဝန်ကြီး မာလာ့စ်ကာက အစိုးရအဖွဲ့ အစည်းအဝေးအပြီးမှာ သတင်းထောက်တွေကို ပြောပါတယ်။

အရေးပေါ်အခြေအနေက မပြီးပြတ်သေးပေမဲ့ မကြာသေးမီနှစ်တွေအတွင်းမှာ အကြီးမားဆုံး သဘာဝပတ်ဝန်းကျင်ဆိုင်ရာ ကပ်ဘေးတခုနဲ့ ရင်ဆိုင်နေရတာလို့လည်း ဆိုပါတယ်။

ဥရောပတောင်ပိုင်း နယ်မြေအများစုဟာ ဆယ်စုနှစ် ၂ ခုအတွင်းမှာ အဆိုးရွားဆုံး တောမီးရာသီတွေကို ကြုံတွေ့နေရတာပါ။

စပိန်နိုင်ငံမှာ ခန့်မှန်းခြေ မီးလောင်ဧရိယာဟာ ဟက်တာ ၄ သိန်းကျော်ရှိပြီး ၂၀၀၆ ခုနှစ်မှာစပြီး မှတ်တမ်းတင်ထားတဲ့အထဲမှာ စံချိန်တင် အကြီးမားဆုံး ဖြစ်ပါတယ်။

Source: Reuters