စပိန်၊ ပေါ်တူဂီ၊ ဂရိနဲ့ တူရကီနိုင်ငံတို့က မီးသတ်သမားတွေဟာ ခုသီတင်းပတ်တွေအတွင်း လောင်ကျွမ်းနေတဲ့ တောမီးတွေကို ဆက်ငြှိမ်းနေပါတယ်။ 

ပူပြင်းခြောက်သွေ့တဲ့ အခြေအနေတွေကြောင့် မီးလောင်ကျွမ်းမှုကို ထိန်းချုပ်ဖို့ ဆက်ပြီး ခက်ခဲနေဦးမယ်လို့ မျှော်လင့်နေကြပါတယ်။ 

သီတင်းပတ်ကုန်ပိုင်းမှာ အပူချိန်တွေ မြင့်တက်လာလို့ တောမီးထိန်းချုပ်ရေး ကြိုးပမ်းချက်တွေကို စိန်ခေါ်နေတဲ့ အပူလှိုင်းတွေကြားမှာ ဥရောပ တောင်ပိုင်းမှာ တောမီးတွေ ဆက်လောင်နေပါတယ်။ 

စပိန်ဟာ လက်ရှိမှာ မီးလောင်မှုကြီး ၁၄ ခုကို ငြှိမ်းသတ်နေတယ်လို့ အရေးပေါ်ဌာန အထွေထွေ ညွှန်ကြားရေးမှူး ဗယ်ဂီးနီးယား ဗာကိုလက်စ်က ပြောပါတယ်။ 

ဒီနေ့ဟာ မီးဘေး အန္တရာယ် တကျော့ပြန် ပြင်းထန်တဲ့ နေ့တနေ့ ဖြစ်လိမ့်မယ်လို့ စပိန်ဝန်ကြီးချုပ် ပေဒရို စန်ချက်ဇ်က X လူမှုကွန်ရက်ပေါ်မှာ ရေးခဲ့ပါတယ်။ 

စပိန်မှာ မီးလောင်ကျွမ်းမှုကြောင့် စေတနာ့ဝန်ထမ်း မီးသတ်သမား ၂ ယောက် အပါအဝင် ၃ ယောက် သေဆုံးခဲ့ပါတယ်။ 

နိုင်ငံ မြောက်ဘက်နဲ့ အနောက်ဘက်မှာ မီးလောင်မှုအများဆုံးနေရာ အပါအဝင် နိုင်ငံရဲ့ နေရာအများစုမှာ ပြင်းထန်တဲ့ မီးဘေးအန္တရာယ်ကို စပိန် အမျိုးသားမိုးလေဝသအေဂျင်စီ AEMET က သတိပေးခဲ့ပါတယ်။ 

အပူချိန် ၄၀ ဒီဂရီစင်တီဂရိတ်ထက် ကျော်လွန်လာခဲ့တဲ့ အပူလှိုင်းဟာ အခုလအတွင်း တနင်္လာနေ့အထိ ကြာမြင့်မယ်လို့ ခန့်မှန်းထားပါတယ်။ 

စပိန်နိုင်ငံ ဂါလီစီယာ ဒေသ၊ ဗီယာဗယ်ဘောက်စ်ရွာမှာ သြဂုတ် ၁၆ ရက်က တောမီးကို မီးသတ်သမားတွေနဲ့အတူ ဒေသခံပြည်သူတွေကပါ မီးငြှိမ်းသတ်ခဲ့ကြပါတယ်။ 

ခုချိန်ထိ စပိန်နိုင်ငံမှာ တောမီးလောင်ကျွမ်းမှုကြောင့် လူ ၇ ဦးသေဆုံးပြီး လန်ဒန်မြို့ ဧရိယာလောက်ကျယ်တဲ့ ဒေသတဝိုက် မီးလောင်ကျွမ်းခဲ့ပါတယ်။ 

အခုအထိ စပိန်မှာ ဟက်တာ ၁၅၇,၀၀၀ ကျော် တောမီးလောင်ကျွမ်းခဲ့ပြီး နှစ်စဉ်ပျမ်းမျှ လောင်ကျွမ်းနှုန်းထက် ၂ ဆနီးပါးရှိတယ်လို့ ဥရောပသမဂ္ဂ တောမီးဆိုင်ရာ အချက်အလက်ဌာနက ပြောပါတယ်။

ဥရောပတောင်ပိုင်းတခွင် အနှစ် ၂၀ အတွင်း အဆိုးရွားဆုံး နွေရာသီ တောမီးလောင်ကျွမ်းမှုကို  မီးငြှိမ်းသတ်ဖို့ မီးသတ်သမားတွေက ရုန်းကန်နေရပါတယ်။ 

သီတင်းနှစ်ပတ်နီးပါးကြာ အပူလှိုင်းနဲ့ တောင်ပိုင်းလေတိုက်ခတ်မှုတွေကြောင့် စပိန်နိုင်ငံမှာ အခြေအနေ ပိုဆိုးလာခဲ့တယ်လို့ အရေးပေါ်ဌာနက ပြောခဲ့ပါတယ်။ 

Source: Reuters