မိုးကုတ်တွင် စစ်တပ် ဗုံးကြဲမှုကြောင့် ပြည်သူ ၁ ဦး ဒဏ်ရာရ
DVB
·
August 26, 2025
မန္တလေးတိုင်း၊ မိုးကုတ်မြို့အရှေ့ပိုင်း စည်ပင်သာယာရပ်ကွက်နဲ့ မင်းတံတားရပ်ကွက်အနီးကို စစ်တပ်က သြဂုတ် ၂၅ ရက် ည ၁၁ နာရီ ၅၆ မိနစ်မှာ ဂျက်တိုက်လေယာဉ်နဲ့ ဗုံး ၂ လုံး ကြဲချတိုက်ခိုက်ခဲ့တာကြောင့် ပြည်သူတယောက် ထိခိုက်ဒဏ်ရာရခဲ့တယ်လို့ မြို့ခံတွေက ပြောပါတယ်။
စည်ပင်သာယာရပ်ကွက်မှာ နေထိုင်သူတယောက်က “လေယာဥ်ပျံတဲ့အသံက အရမ်းနီးတယ်၊ ကြဲတော့မှာဆိုတာ သိလိုက်တယ်။ ကြဲတော့လည်း အသံအရမ်းကျယ်တာ။ ကျတာ အသံပါကြားရတယ်။ အိမ်ကိုပါ အစတွေလာစင်တယ်” လို့ ပြောပါတယ်။
စည်ပင်သာယာရပ်ကွက်ကို စစ်တပ် ဗုံးကြဲမှုကြောင့် ပြည်သူတယောက် မစိုးရိမ်ရ ထိခိုက်ဒဏ်ရာ ရခဲ့ပြီး အနီးနား နေအိမ် ၄ အိမ်ထက်မနည်း ထိခိုက်ပျက်စီးခဲ့တယ်လို့ သိရပါတယ်။
မိုးကုတ်မြို့ကို စစ်တပ်က ဇူလိုင်နဲ့ သြဂုတ်လ တတိယပတ်အတွင်း လေကြောင်းကနေ ဗုံး ၈ ကြိမ် ကြဲခဲ့တာကြောင့် ပြည်သူ ၆၀ ထက်မနည်း သေဆုံးခဲ့ရပါတယ်။
Photo: ဒေသခံ
