ကရင်နီပြည်နယ်ရဲ့ မြို့တော် လွိုင်ကော်မြို့မှာ စစ်တပ် ထောက်ခံတဲ့ အနုပညာရှင်တွေက သြဂုတ် ၂၄ ရက်က ရောက်လာပြီး သီချင်းဆိုတာနဲ့ ကျောင်းစာဖတ်ခန်း (စာကြည့်ခန်းအဆောင်သစ်) ဖွင့်ပွဲ လာတာရှိတယ်လို့ ဒေသခံတွေက ပြောပါတယ်။
လွိုင်ကော်မြို့မှာ စစ်ကောင်စီခန့် ပြည်ထောင်စုဝန်ကြီး၊ ပြည်နယ်ဝန်ကြီးနဲ့ စစ်တပ်ကို အားပေးထောက်ခံကြသူတွေဖြစ်တဲ့ ရန်အောင်၊ မေသန်းနု၊ စိုးမြတ်သူဇာ၊ ဒိန်းဒေါင်၊ ငြိမ်းချမ်း၊ ယဥ်လတ်၊ သင်ဇာမြင့်မိုရ်၊ နေခြည်ငြိမ်းချမ်း၊ အုန်းသီးတို့က ၂၄ ရက် ညမှာ သီချင်းဆိုပြီး ၂၅ ရက်မှာ အ.ထ.က ၁ ကျောင်းမှာ စာဖတ်ခန်းကျောင်းဆောင်သစ်ဖွင့်ပွဲ တက်တယ်လို့ သိရပါတယ်။
ဒေသခံ အမျိုးသားတယောက်က “ရွေးကောက်ပွဲ နီးလာပြီလေ၊ စည်ကားတယ်ဆိုတာမျိုး ပြချင်တာ၊ ကလေးတွေ စာဖတ်ခန်း စာကြည့်တိုက်သဘောပါပဲ၊ တကယ်က အယောင်ပြရယ်၊ ရွေးကောက်ပွဲအတွက် သူတို့ ပြည်သူကို မြှူဆွယ်နေတာ အေးချမ်းတယ် ဆိုတာမျိုးပေါ့၊ လက်နက်ကြီးက ဒေါငံခါးဘက် ပစ်နေတယ်” လို့ ပြောပါတယ်။
စစ်တပ်က ရွေးကောက်ပွဲအတွက် ပြည်သူတွေကို စည်းရုံးတဲ့အနေနဲ့ တပ်ထောက်ခံတဲ့ အနုပညာရှင်တချို့ကိုခေါ်ပြီး နယ်မြေအေးချမ်းသယောင် ပြနေပေမဲ့ လွိုင်ကော်နဲ့ မဝေးတဲ့ ဒီးမော့ဆိုမြို့နယ် ဒေါငံခါးရွာအနီးတဝိုက်မှာ စစ်တပ်နဲ့ တော်လှန်ရေးအင်အားစုတွေကြား တိုက်ပွဲ ဖြစ်ပွားနေတယ်လို့ သိရပါတယ်။
ဩဂုတ် ၂၅ ရက် ညပိုင်းမှာလည်း ဒီးမော့ဆို အနောက်ဘက်ခြမ်းကို လက်နက်ကြီးတွေ အတွဲလိုက် ပစ်နေတယ်လို့ ဒေသခံတွေက ပြောပါတယ်။
ရွေးကောက်ပွဲလုပ်နိုင်ဖို့ ရှမ်း-ကရင်နီနယ်စပ်က မိုးဗြဲကို ဇူလိုင်လထဲ စစ်တပ်က စစ်ကြောင်းထိုး သိမ်းပိုက်ပြီးတဲ့နောက် ဒီးမော့ဆိုမြို့နယ်ဘက်ကို စစ်ကြောင်းထိုးလာတဲ့အတွက် တော်လှန်ရေးအင်အားစုတွေနဲ့ သြဂုတ်လထဲ တိုက်ပွဲတွေ ဖြစ်ပွားနေတာပါ။
စစ်တပ်က ရွေးကောက်ပွဲအပိုင်း ၁ အနေနဲ့ ဒီဇင်ဘာလထဲမှာ လုပ်သွားဖို့ရှိပြီး ကရင်နီပြည်နယ်ထဲက မြို့နယ်အားလုံးကို မဲဆန္ဒနယ်အဖြစ် သတ်မှတ်ထားကာ လွိုင်ကော်နဲ့ ဘောလခဲမြို့နယ်ကို ပထမအပိုင်းထဲမှာ ထည့်သွင်းထားပါတယ်။
