ကရင်နီ (ကယား) ပြည်နယ်မှာ ဇူလိုင် ၂၂ ရက် နေ့လယ်ပိုင်းက မော်ချီးကနေ လွိုင်ကော်ကိုပြန်လာသူ အယောက် ၃၀ လောက် လွိုင်ကော်မြို့ဝင်ဂိတ်နားမှာ ဖမ်းဆီးခံလိုက်ရတယ်လို့ ဖမ်းဆီးခံရသူတွေရဲ့ မိသားစုဝင်တွေက ပြောပါတယ်။
ဖမ်းခံရသူ မိသားစုဝင်တယောက်က “မော်ချီးကနေ လွိုင်ကော် ပြန်တာ၊ တချို့က တောင်ကြီး တက်မှာ၊ အဲဒါ လွိုင်ကော်ဂိတ်မှာ ဖမ်းတာ၊ မိသားစုတွေရော ပါတယ်၊ လူငယ် လူလတ်တွေပါ”လို့ ပြောပါတယ်။
လွိုင်ကော်မြို့ဝင်ဂိတ်မှာ ဖမ်းဆီးခံရသူ အယောက် ၃၀ လောက်ကို လွိုင်ကော် ဒေသကွပ်ကဲမှု စစ်ဌာနချုပ် ထဲကို ခေါ်သွားတယ်လို့ ကနဦးသိရပါတယ်။
စစ်ကောင်စီတပ်က မော်ချီးကို လေကြောင်းကနေ မကြာခဏ ဗုံးကြဲတဲ့အတွက် ဒေသခံတွေက မော်ချီးကနေ တခြားနေရာကို တရက်ကို ကား ၂ စီး ၃ စီးနဲ့ ရွှေ့ပြောင်းကုန်ကြပြီး လမ်းသွားလမ်းလာတွေလည်း နည်းပါးကုန်ပြီလို့ သိရပါတယ်။
မော်ချီးကို ၂၀၂၅ ခုနှစ် ဧပြီကနေ ဇူလိုင် ၁၅ ရက်အထိ စစ်တပ်က လေကြောင်းကနေ ဗုံး ၉ ကြိမ် ကြဲချ တိုက်ခိုက်တာကြောင့် အသက် ၃ နှစ်အရွယ် ကလေးငယ် အပါအဝင် ပြည်သူ ၂၈ ယောက် သေဆုံးခဲ့ရပြီး အယောက် ၆ဝ ကျော် ထိခိုက်ဒဏ်ရာရရှိခဲ့ပါတယ်။
