ကရင်နီပြည်နယ်မှာရှိတဲ့ လွိုင်ကော်-ဒီးမော့ဆို-ဖရူဆို လမ်းမကြီးမှာ စစ်ကောင်စီတပ်က စစ်ကြောင်းထိုးနေတာကြောင့် လမ်းမကြီးကိုအသုံးမပြုဖို့ ကရင်နီအမျိုးသားများ ကာကွယ်ရေးတပ် KNDF က သြဂုတ် ၁၀ ရက်နေ့မှာ ထုတ်ပြန်ပါတယ်။

သြဂုတ် ၈ ရက်နေ့ကစပြီး ဒီးမော့ဆိုမြို့ထဲကို စစ်ကောင်စီက စစ်ကြောင်းထိုးလာတာကြောင့် တော်လှန်ရေးအင်အားစုတွေနဲ့ ထိတွေ့တိုက်ပွဲဖြစ်ပွားနေပြီး ဖရူဆိုမြို့နယ်အခြေစိုက် စစ်ကောင်စီတပ်တွေကလည်း ဒီးမော့ဆို-ဖရူဆို လမ်းမကြီးတလျှောက်ကို လက်နက်ကြီးနဲ့ ပစ်ခတ်နေတယ်လို့ ဆိုပါတယ်။

KNDF ပြန်ကြားရေးတာဝန်ရှိသူက “ဒီးမော့ဆို-ဖရူဆိုလမ်းမကြီးပေါ်မှာ စစ်ကောင်စီ စစ်ရေးလှုပ်ရှားတာတွေ ရှိလာတဲ့အတွက် ပြည်သူလူထုတွေ သွားလာဖို့ မသင့်တော်တော့ဘူးပေါ့နော်၊ လုံခြုံရေးအရ သွားလာဖို့မသင့်တော်တာကြောင့် ထုတ်ပြန်ရခြင်းဖြစ်ပါတယ်” လို့ ပြောပါတယ်။

မြေပြင်စစ်ရေးအခြေအနေတွေကြောင့် လွိုင်ကော်-ဒီးမောဆို-ဖရူဆို လမ်းမကြီးအပြင် လမ်းမကြီးအပေါ်ဖြတ်သန်းသွားလာတဲ့ လမ်းသွယ်တွေကိုလည်း သြဂုတ် ၁၀ ရက်နေ့ကစပြီး အသုံးမပြုကြဖို့နဲ့ ရက်အကန့်အသတ်မရှိ ပိတ်ထားမယ်လို့ KNDF က အသိပေးထုတ်ပြန်ထားပါတယ်။

စစ်ကောင်စီက မိုးဗြဲကိုရရှိပြီးနောက် ဇူလိုင်လထဲမှာ ဖယ်ခုံအရှေ့ဘက်ကမ်းက ကျေးရွာတွေကိုလည်း စစ်ကြောင်းထိုးခဲ့ပြီး အခုလက်ရှိမှာ ဒီးမော့ဆိုမြို့အနီးကို စစ်ကြောင်းထိုးလာတာဖြစ်ပါတယ်။

​သြဂုတ် ၈ ရက်နေ့မနက်ပိုင်းက ဒီးမော့ဆိုအရှေ့ခြမ်းကနေ အနောက်ဘက်ခြမ်းကို စစ်ရှောင်မယ့်ပြည်သူ ၁၅ ယောက်ပါတဲ့ ကားကို စစ်ကောင်စီက ဖမ်းဆီးပြီး ၄ ယောက်ကို ပစ်ခတ် သတ်ဖြတ်ခဲ့ပါတယ်။

သြဂုတ် ၇ ရက်နေ့မှာလည်း ဒီးမော့ဆိုအနောက်ခြမ်းကို စစ်တပ်က လက်နက်ကြီးနဲ့ပစ်ခတ်ပြီး လေကြောင်းကနေ ဗုံးကြဲတိုက်ခိုက်တာကြောင့် ပြည်သူ ၁ ယောက် ဒဏ်ရာရခဲ့ပါသေးတယ်။