ခရိုနီကုမ္ပဏီတွေ ဖြစ်ကြတဲ့ KBZ နဲ့ Max ကုမ္ပဏီတွေဟာ မြန်မာစစ်တပ်ရဲ့ ရိုဟင်ဂျာလူမျိုးတုံး သတ်ဖြတ်မှုမှာ ဘဏ္ဍာငွေပံ့ပိုးပေးခဲ့ပြီး လူမဆန်တဲ့ပြစ်မှုကြီးတွေဖြစ်တဲ့ လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေ ကျူးလွန်ရာမှာ ကြီးကြီးမားမားတိုက်ရိုက်ပံ့ပိုးပေးခဲ့တယ်လို့ Justice For Myanmar က ဒီကနေ့ သြဂုတ် ၂၅ ရက်မှာ ထုတ်ပြန်ပါတယ်။

အဲဒီ ကုမ္ပဏီ ၂ ခုဟာ စစ်အုပ်စုရဲ့ “နယ်မြေရှင်းလင်းစစ်ဆင်ရေး” ပံ့ပိုးကူညီဖို့နဲ့ ဘင်္ဂလားဒေ့ရှ်နိုင်ငံကို  ထွက်ပြေး တိမ်းရှောင်ခဲ့ရတဲ့ ရိုဟင်ဂျာဒုက္ခသည်တွေကို နေရပ်ပြန်မလာနိုင်ဖို့ နယ်စပ်ခြံစည်းရိုး ဆောက်လုပ်ဖို့အတွက် ဆိုပြီး ဒေါ်လာသန်းပေါင်းများစွာကို စစ်အုပ်စုဆီ တိုက်ရိုက်ငွေကြေးလှူဒါန်းမှုတွေ ပြုလုပ်ခဲ့တယ်လို့ ထုတ်ပြန်ချက်မှာ ပါရှိပါတယ်။  

အဲဒီ ကုမ္ပဏီတွေနဲ့  အဖွဲ့အစည်းတွေရဲ့ စစ်အုပ်စုဆီ တိုက်ရိုက်လှူဒါန်းနေတာတွေကို ကုလသမဂ္ဂရဲ့ အချက်အလက်ရှာဖွေရေးမစ်ရှင် (FFM) က မှတ်တမ်းတင်ထားရှိခဲ့ပြီး၊ ရာဇဝတ်ကြောင်းအရ စုံစမ်းစစ်ဆေးမှုတရပ် လုပ်ဆောင်ပြီး တရားစွဲဆိုဖို့ တိုက်တွန်းတောင်းဆိုခဲ့တယ်လို့ ဆိုပါတယ်။

လက်ရှိအချိန်အထိလည်း အဲဒီ ကုမ္ပဏီတွေကို အပြစ်ပေးအရေးယူတာ ကျူးလွန်သူတွေက  သူတို့ကျူးလွန်နေတဲ့ လက်ရှိနိုင်ငံတကာရာဇဝတ်မှုတွေကနေ အကျိုးအမြတ်တွေ ဆက်လက် ရရှိနေကြဆဲပါလို့ ထုတ်ပြန်ချက်မှာ ပါရှိပါတယ်။

အခုလို ပြစ်ဒဏ်ကင်းလွတ်ခွင့်ရရှိနေတာက ရာဇဝတ်မှုကြီးတွေ ကျူးလွန်တဲ့ စစ်အုပ်စုနဲ့ ငွေကြေးထောက်ပံ့နေတဲ့ ခရိုနီတွေကို ပိုပြီးရဲတင်းစေခဲ့တယ်လို့ ဆိုပါတယ်။

ဒီစွပ်စွဲချက်တွေနဲ့ ပတ်သက်ပြီး  KBZ နဲ့ Max ကုမ္ပဏီတွေဘက်ကိုတော့ ဆက်သွယ်မေးမြန်းနိုင်ခြင်း မရှိပါဘူး။ 

သြဂုတ် ၂၅ ရက်နေ့ဟာ ရိုဟင်ဂျာတွေအပေါ် မြန်မာစစ်အုပ်စုက လူမျိုးတုံးသတ်ဖြတ်မှု ကျူးလွန်ခဲ့တယ်ဆိုပြီး စွပ်စွဲခံရတဲ့ ၈ နှစ်မြောက်နေ့ ဖြစ်ပါတယ်။

၂၀၁၇ ခုနှစ်တုန်းက ရခိုင်ပြည်နယ်မှာ အာဆာအကြမ်းဖက်အဖွဲ့တွေရဲ့  တိုက်ခိုက်မှုကနေ စတင်ပြီး စစ်တပ်က နယ်မြေရှင်းလင်းရေးခေါင်းစဉ်နဲ့ အင်အားအလွန်အကျွန်သုံး နှိမ်နင်းခဲ့တာမှာ သိန်းနဲ့ချီတဲ့ ရိုဟင်ဂျာတွေ နယ်စပ်ဖြတ်ကျော် ထွက်ပြေးခဲ့ရတာဖြစ်ပါတယ်။

ဒီဖြစ်စဉ်အပြီးမှာ  မြန်မာ-ဘင်္ဂလားဒေ့ရှ်နယ်စပ်ရှိ အတားအဆီးမရှိဖြစ်နေတဲ့ နေရာတွေမှာ သံဆူးကြိုးတွေကာဖို့ လုပ်ဆောင်တာမှာ ခရိုနီကုမ္ပဏီတွေက ငွေကြေးထည့်ဝင်လှူဒါန်းခဲ့ကြတာကို အဲဒီအချိန်က ပြည်တွင်း သတင်းမီဒီယာတွေမှာ ရေးသားဖော်ပြခဲ့ကြပါတယ်။  

ကေခိုင်