မော်စကိုမပါဘဲနဲ့ ယူကရိန်းလုံခြုံရေးကိစ္စတွေကိုဖြေရှင်းဖို့ ကြိုးစားမှုဟာ "ဘယ်မှမရောက်နိုင်တဲ့လမ်း" တခုလိုပဲ အောင်မြင်စရာအကြောင်းမရှိဘူးလို့ ရုရှားက သတိပေးလိုက်ပါတယ်။ 

ကိယက်ဗ်ရဲ့ အနာဂတ်လုံခြုံရေးအတွက် အာမခံချက်ရရှိဖို့ အနောက်နိုင်ငံတွေက ကြိုးပမ်းနေချိန်မှာ နိုင်ငံခြားရေးဝန်ကြီး ဆာဂေးလက်ဗ်ရော့က အခုလို သတိပေးလိုက်တာဖြစ်ပါတယ်။

အမေရိကန်သမ္မတ ဒေါ်နယ်ထရမ့်ပ်၊ ယူကရိန်းသမ္မတ ဗိုလိုဒီမာဇလန်းစကီးတို့နဲ့အတူ အိမ်ဖြူတော် တွေ့ဆုံပွဲမှာ ပါဝင်ခဲ့တဲ့ ဥရောပခေါင်းဆောင်တွေက ယူကရိန်းအတွက် လုံခြုံရေး အာမခံချက်ရရှိရေးကို အဓိက ဆွေးနွေးခဲ့ကြတာဖြစ်ပါတယ်။ 

အဲဒီကိစ္စကို လက်ဗ်ရော့က အဓိကထားဝေဖန်ခဲ့ပြီး ရုရှားမပါဘဲနဲ့ လုံခြုံရေး၊ စုပေါင်းလုံခြုံရေးဆိုတဲ့ မေးခွန်းကို အဖြေရှာနိုင်မှာမဟုတ်ဘူးလို့ ဝေဖန်ခဲ့တာဖြစ်ပါတယ်။ 

“ရုရှားပြည်ထောင်စုမပါဘဲနဲ့ လုံခြုံရေးကိစ္စဆွေးနွေးတာဟာ  စိတ်ကူးယဉ်ကမ္ဘာထဲက ဘယ်မှ မရောက်နိုင်တဲ့လမ်း၊ အောင်မြင်စရာမရှိတဲ့ ကိစ္စဖြစ်တယ်ဆိုတာ အနောက်ကမ္ဘာ၊ အထူးသဖြင့် အမေရိကန်ပြည်ထောင်စုကလူတွေ ကောင်းကောင်းနားလည်မယ်လို့ ထင်ပါတယ်" လို့ လက်ဗ်ရော့က သတင်းစာရှင်းလင်းပွဲ တခုမှာ ထည့်ပြောသွားခဲ့ပါတယ်။

နေတိုးစစ်ဘက်ခေါင်းဆောင်တွေဟာ  ယူကရိန်းလုံခြုံရေးနဲ့ပတ်သက်ပြီး ဩဂုတ် ၂၀ ရက်မှာ ဗီဒီယိုကွန်းဖရင့်စ် တခု ကျင်းပခဲ့ပါသေးတယ်။ 

Source:Reuters