တောင်ကိုရီးယားကို သြဂုတ် ၁၉ ရက်မှာ မြန်မာနိုင်ငံကနေ  EPS စနစ်နဲ့ လုပ်သား ၇၁ယောက် ရောက်ရှိခဲ့ရာမှာ အမျိုးသမီးလုပ်သား ၂  ယောက် သွားရောက် လုပ်ကိုင်ခွင့်ရရှိတယ်လို့  ပြည်အလုပ်အကိုင် အေဂျင်စီ (POEA) စာရင်းတွေအရသိရပါတယ်။

အဲဒီအမျိုးသမီးလုပ်သား ၂ ယောက်က ဝန်ဆောင်မှုလုပ်ငန်းအမျိုးအစားနဲ့ ရောက်ရှိလာ တာဖြစ်ပြီး အဲဒီလုပ်ငန်းအမျိုးအစားအတွက် အမျိုးသား ၁၀ ယောက်လည်း ပါဝင်ပါတယ်။

မြန်မာကနေ တောင်ကိုရီးယားကို ဒီနှစ်ကမှ အမျိုးသမီးလုပ်သားစေလွှတ်ခွင့်ပေးခဲ့တာဖြစ်ပေမဲ့ အခုအချိန်အထိ ၄ ယောက်ပဲ လွှတ်နိုင်သေးတာလို့ EPS အလုပ်အကိုင်နဲ့ အကျွမ်းဝင်နေသူတွေ ဆီက သိရပါတယ်။

ကိုရီးယားဘာသာသင်တန်းနည်းပြတယောက်က "ကိုရီးယားဘက်ကကို  မြန်မာအမျိုးသမီး လုပ်သားခေါ်တာနည်းနေတာ။ အခုမှစလွှတ်တာကြောင့်လည်းပါမယ်။ အလုပ်ခေါ်စာရဖို့ စောင့်နေသူတွေက ထောင်ချီရှိနေတာ"လို့ ပြောပါတယ်။

မြန်မာနိုင်ငံဘက်က အမျိုးသမီးလုပ်သားတွေကို ဝန်ဆောင်မှုလုပ်ငန်း အမျိုးအစား အတွက်ပဲ သွားလုပ်ခွင့်ပေးထားတာဖြစ်ပြီး အဲဒီလုပ်ငန်းအမျိုးအစားကို မနှစ်ကလုပ်တဲ့ EPS-TOPIK စာမေးပွဲမှာ ပထမဆုံး ထည့်သွင်းခဲ့တာဖြစ်ပါတယ်။

တောင်ကိုရီးယားကို အမျိုးသမီးလုပ်သားတွေ သွားခွင့်ပြုလိုက်တာကြောင့် စိတ်ဝင်စားမှု မြင့်တက်ခဲ့ပြီး EPS-TOPIK စာမေးပွဲကို ဝင်ရောက်ဖြေဆိုတဲ့ အမျိုးသမီးသောင်းနဲ့ချီ ရှိခဲ့ကာ ဦးရေ ၃,၀၀၀ နီးပါးစာမေးပွဲအောင်ထားတယ်လို့ POEAရဲ့ ထုတ်ပြန်ချက်အရသိရပါတယ်။