ဗီယက်နမ်နိုင်ငံမှာ ကျင်းပတဲ့ အာဆီယံအမျိုးသမီးချန်ပီယံရှစ်ပြိုင်ပွဲ ဗိုလ်လုပွဲမှာ မြန်မာအမျိုးသမီးအသင်းက သြစတြေးလျ ယူ-၂၃ လူငယ် အမျိုးသမီးအသင်းနဲ့ လာမယ့် ဩဂုတ် ၁၉ ရက်မှာ ယှဉ်ပြိုင်သွားရမှာ ဖြစ်ပါတယ်။
မနေ့ညနေက ယှဉ်ပြိုင်ကစားခဲ့ကြတဲ့ ဆီမီးဖိုင်နယ်ပွဲစဉ်တွေမှာ မြန်မာအမျိုးသမီးအသင်းက ထိုင်းအသင်းကို ၂ ဂိုး ၁ ဂိုးနဲ့ အနိုင်ရပြီး ဗိုလ်လုပွဲတက်ရောက်ခဲ့တာ ဖြစ်သလို သြစတြေးလျ ယူ-၂၃ အသင်းကလည်း အိမ်ရှင် ဗီယက်နမ်အသင်းကို ၂ ဂိုး ၁ ဂိုးနဲ့ အနိုင်ရပြီး ဗိုလ်လုပွဲတက်လာတာပါ။
မြန်မာအမျိုးသမီးအသင်းနဲ့ သြစတြေးလျ ယူ-၂၃ အသင်းတို့ဟာ ဒီပြိုင်ပွဲမှာ အုပ်စုတစုတည်း ကျခဲ့ပြီး အုပ်စုတွင်းပွဲစဉ်မှာတော့ မြန်မာအသင်းက သြစတြေးလျ ယူ-၂၃ အသင်းကို ၂ ဂိုး ၁ ဂိုးနဲ့ အနိုင်ရထားပါတယ်။
အာဆီယံအမျိုးသမီးချန်ပီယံရှစ်ပြိုင်ပွဲသမိုင်းမှာတော့ မြန်မာအမျိုးသမီးလက်ရွေးစင်အသင်းဟာ ဗိုလ်လုပွဲကို ၆ ကြိမ်မြောက် တက်ရောက်နိုင်ခဲ့တာ ဖြစ်ပါတယ်။
၂၀၀၄ ခုနှစ်က စတင်ခဲ့တဲ့ အာဆီယံအမျိုးသမီးပြိုင်ပွဲသမိုင်းမှာ မြန်မာအမျိုးသမီးအသင်းက ၂ ကြိမ်ချန်ပီယံ ဖြစ်ခဲ့ဖူးပြီး ဗိုလ်လုပွဲကို ၆ ကြိမ်မြောက် တက်ရောက်လာခဲ့တာပါ။
မြန်မာအမျိုးသမီးအသင်းဟာ ပထမဆုံးအကြိမ် ကျင်းပတဲ့ ၂၀၀၄ ပြိုင်ပွဲမှာပဲ ပထမဆုံးချန်ပီယံဖြစ်ခဲ့ပြီး ၂၀၀၇ ခုနှစ်မှာ ဒုတိအကြိမ် ချန်ပီယံဖြစ်ခဲ့တာပါ။
အဲဒီ နောက် ၂၀၁၁၊ ၂၀၁၂ နဲ့ ၂၀၁၅ ပြိုင်ပွဲမှာ ဗိုလ်လုပွဲကို ၃ ကြိမ် တက်ခဲ့ပေမဲ့ ချန်ပီယံဆုနဲ့ လွဲချော်ခဲ့ရတာပါ။ အခုနှစ် ပြိုင်ပွဲမှာ ဗိုလ်လုပွဲတက်ခဲ့တာက ၁၀ နှစ်အတွင်း ပထမဆုံးအကြိမ် ဖြစ်ပါတယ်။
