ရန်ကုန်၊ ဒဂုံမြို့သစ် (မြောက်ပိုင်း) မြို့နယ်၊ ၃၄ ရပ်ကွက်၊ ဦးဝိစာရလမ်းမပေါ်မှာ ဖွင့်လှစ်ထားတဲ့ ရွှေစင်ရတနာရွှေဆိုင် ဩဂုတ် ၁၄ ရက် နေ့လယ် ၁ နာရီကျော်က ဓားပြတိုက်ခံရပြီး ဆိုင်လုံခြုံရေးဝန်ထမ်းတယောက်က ပြန်လည်ခုခံတာကြောင့် ဓားပြတယောက်ကို ဖမ်းမိခဲ့တယ်လို့ မြို့ခံတွေထံက သိရပါတယ်။
မနေ့ နေ့လယ်က ရွှေစင်ရတနာရွှေဆိုင်ကို ဆိုင်ကယ်တစီးနဲ့ အမျိုးသား ၂ ယောက် ရောက်လာပြီး ဆိုင်အတွင်းဝင်ကာ ဝန်ထမ်းတွေကို ဓား၊ သေနတ်တွေနဲ့ ခြိမ်းခြောက် ဓားပြတိုက်ခဲ့တာမှာ လုံခြုံရေးဝန်ထမ်းက ပြန်လည်ခုခံခဲ့တာပါ။
ဒေသခံတယောက်က “ဓားပြလာတိုက်တဲ့ ၂ ယောက်ကို လုံခြုံရေးဝန်ထမ်း ကောင်လေးက ထီးနဲ့ ဝင်ရိုက်ပြီး လုံးထွေးသတ်ပုတ်နေတဲ့အချိန် သေနတ်ပါတဲ့ကောင်က ထွက်ပြေးသွားတာ။ ဆိုင်ကရွှေတွေတော့ ပါမသွားဘူး။ လုံခြုံရေးဝန်ထမ်းကောင်လေးတော့ ဓားထိသွားတယ်။ အရမ်းတော့ မစိုးရိမ်ရဘူး” လို့ ပြောပါတယ်။
လတ်တလောမှာ ဖမ်းဆီးရမိတဲ့ အမျိုးသားကို မြောက်ဒဂုံမြို့မရဲစခန်းက စစ်ဆေးနေပါတယ်။
မတ် ၂၄ ရက် မနက်ကလည်း ရန်ကုန်မြို့လယ်ခေါင်၊ ပန်းဘဲတန်းမြို့နယ်ရှိ တိတ်ရှိန်ရွှေဆိုင်ကို ဓားပြတိုက်ခဲ့ပြီး ဓားပြ ၄ ယောက်ကိုတော့ အခုအချိန်အထိ ဖမ်းမမိသေးပါဘူး။
ဇန်နဝါရီ ၈ ရက်ကလည်း ပန်းဘဲတန်းမြို့နယ်၊ အမှတ် ၇ ရပ်ကွက်၊ လမ်း ၃၀ အလယ်ဘလောက် ပထမထပ်မှာ ဖွင့်လှစ်ထားတဲ့ ရွှေချစ်သူ ရွှေဆိုင်ကို အမျိုးသား ၃ ယောက်က ဓားပြတိုက်ခဲ့ပြီး ရွှေထည်ပစ္စည်း သိန်း ၁၀,၀၀၀ ကျော်ဖိုး ပါသွားခဲ့ပါတယ်။
စစ်တပ် အာဏာသိမ်းပြီး ၂၀၂၁ ခုနှစ်ကနေ ၂၀၂၅ ခုနှစ်အတွင်း ရန်ကုန်တိုင်းအတွင်းရှိ မြို့နယ်တချို့က ရွှေဆိုင်တွေ ဓားပြတိုက်ခံရတာ အခုချိန်ထိ ၁၇ ဆိုင် ရှိလာပြီ ဖြစ်ပါတယ်။
