မန္တလေးတိုင်း မဟာအောင်မြေမြို့နယ်၊ မဟာအောင်မြေအနောက်ရပ်ကွက်၊ ၃၉ လမ်း၊ ၈၄ x ၈၅ လမ်းမှာရှိတဲ့ ရွှေနန်းသုခ ရွှေဆိုင် ဇူလိုင် ၂၄ ရက် ဒီကနေ့ ညနေ ၄ နာရီက ဓားပြတိုက်ခံရပြီး ဆိုင်ဝန်ထမ်း ၂ ယောက် ဒဏ်ရာရကာ ရွှေပါသွားတယ်လို့ မြို့ခံတွေဆီက သိရပါတယ်။
“ကားနဲ့လာပြီး ဓားပြတိုက်တာ၊ သေနတ်တွေပါ ပစ်ဖောက်၊ ဝန်ထမ်းတွေကိုလည်း.ထိုးကြိတ်ပြီး ဆိုင်ထဲက ရွှေတွေရော ရောင်းထားတဲ့ပိုက်ဆံတွေရော ယူသွားတာ။”
ရွှေနန်းသုခရွှေဆိုင်ကို အမည်မသိလူ ၆ ယောက် က ကားနဲ့လာပြီး ဝန်ထမ်းတွေကို သေနတ်နဲ့ပစ်ဖောက် ခြိမ်းခြောက်ကာ ရွှေထည်ပစွည်းနဲ့ငွေသိန်း ၃၀ ယူသွားတယ်လို့ အုပ်ချုပ်ရေးနဲ့နီးစပ်တဲ့ သတင်းအရင်းအမြစ်က DVB ကို ပြောပါတယ်။
“၆ ယောက်လာတာ ၂ ယောက်က ကားပေါ်ကစောင့်တယ်၊ ၄ ယောက်က ရွှေဆိုင်ထဲဝင်ပြီး ဓားပြတိုက်တာ။ ဝန်ထမ်း ၂ ယောက်ကို ထိုးကြိတ်သွားတယ်။ ငွေက သိန်း ၃၀ ပါသွားတယ်။ ရွှေကစစ်ဆေးနေတုန်း။”
လတ်တလောမှာ စစ်ကောင်စီတပ်နဲ့ရဲတွေက ရွှေနန်းသုခရွှေဆိုင်မှ CCTV မှတ်တမ်းတွေကို စစ်ဆေးကာ ပြစ်မှုကျူးလွန်သူတွေကို လိုက်လံရှာဖွေနေတယ်လို့ မြိုခံတွေဆီက သိရပါတယ်။
ပြီးခဲ့တဲ့ ဧပြီ ၂၈ ရက်ကလည်း မန္တလေးတိုင်း တံတားဦး၊ အမရပူရ၊ ချမ်းမြသာစည်၊ မဟာအောင်
မြေနဲ့ ကျောက်ဆည်မြို့မှာ ရွှေဆိုင်ဓားပြတိုက်မှု ၅ ကြိမ်၊ လုယက်မှု ၅ ကြိမ်ကျူးလွန်ခဲ့တဲ့ နေထက်လင်း ဦးဆောင်တဲ့ ၁၇ ဦးဂိုဏ်းကို ရဲတွေကဖမ်းမိခဲ့ပေမဲ့ တိုက်ရာပါ ရွှေနဲ့ငွေတွေ မရဘူးလို့ ထုတ်ပြန်ထားပါတယ်။
အလားတူပင် ဖေဖော်ဝါရီ ၂၁ ရက် နေ့လယ်ကလည်း မဟာအောင်မြေမြို့နယ် ဗောဓိကုန်း ကမ္ဘောဇဘဏ် ၃၇ ဓားပြတိုက်ခံရပြီး သိန်း ၁၅၀၀ ပါသွားတဲ့ ဖြစ်စဥ်လည်းရှိပါတယ်။
