အမေရိကန် သမ္မတ ထရမ့်‌ပ်ရဲ့ တရားရေးဌာနကတော့ အရပ်သားအခွင့်အရေးဆိုင်ရာ ကြိုးပမ်းမှုတွေကို ပြောင်းပြန်လှန်ပစ်နေပါပြီ။

အရင်သီတင်းပတ်က အရပ်သားအခွင့်အရေးဆိုင်ရာ လက်ထောက်ရှေ့နေချုပ် ဟာမီးဒ် ဒေလွန်က လူးဝီဗီးလ်ရဲအရာရှိဟောင်း ဘရက်ဟန်ကီဆန်ကို ထောင်တရက်သာ ချမှတ်ဖို့ ဖက်ဒရယ်တရားသူကြီးကို တောင်းဆိုခဲ့ပါတယ်။ 

ပြီးခဲ့တဲ့နှစ်က ကန်တက်ကီပြည်နယ် ဂျူရီလူကြီးတ‌ယောက်က ဟန်ကီဆန်ဟာ ဘရီယိုနာတေလာ အသတ်ခံရတဲ့ညမှာ သူ့ရဲ့အိမ်ထဲကို သေနတ်နဲ့ အချက်ပေါင်းများစွာ ပစ်ခတ်ခဲ့ပြီး ကာယကံရှင်ရဲ့ အရပ်သားအခွင့်အရေးကို ချိုးဖောက်မှုအတွက် တာဝန်ရှိတယ်လို့ ဆုံးဖြတ်ခဲ့ပါတယ်။ 

တေလာရဲ့အမှုဟာ ၂၀၂၀ ပြည့်နှစ်မှာ အမေရိကန်နိုင်ငံရဲ့ လူမျိုးရေးခွဲခြားမှုတွေကို ရပ်တန့်ဖို့ ကြိုးပမ်းခဲ့ကြတဲ့ လူမည်း အမေရိကန်တွေ ရက်စက်စွာအသတ်ခံရခြင်းရဲ့ နောက်ဆက်တွဲ အမှုဖြစ်စဉ်ဖြစ်ပါတယ်။ ဒီဖြစ်ရပ်ဟာ ယိုယွင်းနေတဲ့ စနစ်ထဲက နမော်နမဲ့ ရဲတပ်ဖွဲ့ဝင်တွေကြောင့် အရပ်သားပြည်သူတွေ အသက်အန္တရာယ်ရှိနိုင်တဲ့အထိ မှားယွင်းနိုင်တယ်ဆိုတာရဲ့ စံနမူနာ ဥပမာတခုလည်း ဖြစ်ပါတယ်။

ဖြစ်စဉ်ကို ပြန်ပြောရရင် ၂၀၂၀ ပြည့်နှစ် မတ်လ ၁၃ ရက်ရဲ့ မနက်ခင်းစောစောမှာ ရဲတပ်ဖွဲ့ဝင်တွေဟာ ဘရီယိုနာ တေလာရဲ့ တိုက်ခန်းတံခါးဝနားမှာ ဝန်းရံလိုက်ကြပါတယ်။ သူတို့ဟာ မူးယစ်ဆေးဝါးရောင်းဝယ်သူလို့ သံသယရှိထားတဲ့ ဂျမာကပ်စ် ဂလိုဗာက တေလာရဲ့အိမ်မှာ ပစ္စည်းတွေ လက်ခံရယူတယ်ဆိုတဲ့ သတင်းပေးချက်အရ တံခါးခေါက်စရာမလိုတဲ့ ရှာဖွေရေး ဝရမ်းတခု ပါရှိခဲ့ပါတယ်။ ဂလိုဗာနဲ့ တေလာဟာတို့ဟာ သမီးရည်းစားဟောင်းတွေဖြစ်ကြပြီး ရှာဖွေရေး ဝရမ်းကတော့ တေလာနဲ့ မပတ်သက်ပါဘူး။

ဝရမ်းဟာ တံခါးခေါက်စရာမလိုတဲ့ ဝရမ်းသာဖြစ်ပေမဲ့ အဆိုပါဖြစ်စဉ်မှာပါဝင်တဲ့ ရဲတပ်ဖွဲ့ဝင်တွေဟာ တံခါးခေါက်ဖို့ ညွှန်ကြားခြင်း ခံခဲ့ရပါတယ်။ ဒီနေရာကစလို့ မျက်မြင်သက်သေတွေရဲ့ ဇာတ်လမ်းတွေဟာ ကွဲပြားလာကြပါတယ်။ ဖြစ်စဉ်မှာပါဝင်ခဲ့တဲ့ ရဲတွေကတော့ သူတို့ဟာ တံခါးခေါက်ခဲ့ပြီး မိမိတို့ဟာ ရဲတပ်ဖွဲ့ဝင်တွေဖြစ်ကြောင်း ပြောကြားခဲ့တယ်လို့ ထွက်ဆိုပါတယ်။ ဘေးပတ်ဝန်းကျင်က အိမ်နီးချင်းတွေရဲ့ အစောပိုင်း အရေးပေါ်ဖုန်းခေါ်ဆိုမှုတွေကတော့ သူတို့ဟာ ရဲတွေရောက်နေတာကို မသိရှိခဲ့ဘူးဆိုတာကို ညွှန်ပြနေပါတယ်။ 

တကယ်တော့ စီးနင်းခံရမှုအပြီး ကနဦးထုတ်ပြန်ချက်များအလိုအရတော့ ရဲတပ်ဖွဲ့ဝင်တွေက သူတို့ဟာ ရဲတပ်ဖွဲ့ဝင်တွေအဖြစ် ထုတ်ဖော်အသိပေးတာမျိုးကို ဘယ်အိမ်နီးနားချင်းမှ မကြားခဲ့ဘူးလို့ ထွက်ဆိုကြပါတယ်။ မျက်မြင်သက်သေတဦးကတော့ ပထမအကြိမ်မှာ ရဲတပ်ဖွဲ့ဝင်တွေဟာ မိမိကိုယ်မိမိ ရဲတပ်ဖွဲ့ဝင်တွေအဖြစ် အသိပေးတာကို မကြားခဲ့ရဘူးလို့ ထွက်ဆိုခဲ့ပေမဲ့ နောက်ပိုင်းမှာတော့ ရဲတပ်ဖွဲ့ဝင်တွေ အသိပေးတာကို ကြားခဲ့ရတယ်လို့ ပြောင်းလဲထွက်ဆိုခဲ့ပါတယ်။

အဲဒီအချိန်မှာ တေလာက သူရဲ့ရည်းစားဖြစ်သူ ကန်နက်ဝေါ်ကာနဲ့အတူ တိုက်ခန်းအတွင်းမှာ ရှိနေခဲ့ပါတယ်။ ကန်နက်ဝေါ်ကာက သူဟာ တံခါးကို အရှိန်ပြင်းပြင်း ထုသံကြားရတာကြောင့် လန့်သွားတယ်လို့ ထွက်ဆိုခဲ့ပြီး ရဲတပ်ဖွဲ့ဝင်တွေ မိမိကိုယ်ကို ကြေညာတာကို လုံးဝမကြားခဲ့ရဘူးလို့ ထွက်ဆိုခဲ့ပါတယ်။ သူက တံခါးကို ထုရိုက်သံဟာ ကျူးကျော်ဝင်ရောက်လာသူတွေလို့ ထင်ခဲ့တာကြောင့် သူတရားဥပဒေအရ တရားဝင်ကိုင်ဆောင်ထားတဲ့ သေနတ်ကိုထုတ်ပြီး တံခါးဆီ ချဉ်းကပ်ခဲ့ပါတယ်။ 

အဲဒီအချိန်မှာပဲ ရဲတပ်ဖွဲ့ဝင်တွေက တိုက်ခန်းထဲကို အကြမ်းနည်းနဲ့ ဝင်ရောက်ဖို့ ရွေးချယ်ခဲ့ပြီး တိုက်ခန်းတံခါးကို ချိုးဖျက်ခဲ့ပါတယ်။ အိမ်တံခါးကို ချိုးဖျက်ဝင်ရောက်လာတာကို ထိတ်လန့်သွားတဲ့ ဝေါ်ကာဟာ တံခါးဝကို စတင်ပစ်ခတ်ခဲ့ပြီး ရဲတပ်ဖွဲ့ဝင်တဦးကို ထိမှန်ခဲ့ပါတယ်။ အဲ့ဒီအခါမှာ ရဲတွေကလည်း ပြန်လည်ပစ်ခတ်ခဲ့ပြီး ဝေါ်ကာကို မထိခဲ့ပေမဲ့ တေလာကို ထိမှန်သွားခဲ့ပြီး အသက်သေဆုံးသည်အထိ ဒဏ်ရာရသွားစေခဲ့ပါတယ်။ ဒါဟာ နည်းနည်းနောနော မတရားခံရမှုမဟုတ်ပါဘူး။ သူဟာ အပြစ်ကင်းမဲ့သူ၊ လက်နက်ကိုင်ဆောင်ထားခြင်းမရှိသူဖြစ်ပြီး သူရဲ့အိမ်မှာပဲ ပစ်သတ်ခံလိုက်ရပါတယ်။ 

ဒီဖြစ်ရပ်ဟာ သာမန်ရာဇဝတ်မှုတခုထက် ပိုပြီး ဝမ်းနည်းစရာကောင်းပါတယ်။ ရဲတပ်ဖွဲ့ဝင်တွေက တရားဝင် ရှာဖွေရေးဝမ်းရမ်းအပေါ် တာဝန်ထမ်းဆောင်ခဲ့တာပါ။ ဝေါ်ကာကလည်း တရားဥပဒေနဲ့ညီညွတ်တဲ့ ‌တရားဝင်သေနတ်ကိုင်ဆောင်သူဖြစ်ပြီး ကန်တက်ကီပြည်နယ်ရဲ့ ဥပဒေအရ မိမိအိမ်အတွင်းကို သူစိမ်းတယောက်က ဥပဒေမဲ့ ကျူးကျော်ဝင်ရောက်လာခဲ့ရင် သေစေနိုင်လောက်တဲ့ တုံ့ပြန်မှုမျိုး ပြုလုပ်ခွင့်ရှိပါတယ်။ 

တချိန်တည်းမှာပဲ ရဲတပ်ဖွဲ့ဝင်တွေကလည်း မိမိတို့ပစ်ခတ်ခံနေရစဉ်မှာ ပြန်လည်ပစ်ခတ်ဖို့ ဥပဒေအရ ခွင့်ပြုထားပါတယ်။ ရဲတယောက် ပစ်ခတ်ခံနေရပြီဆိုရင် အဆိုပါ ရဲတပ်ဖွဲ့ဝင်ကလည်း သူ့ရဲ့အသက်ကိုကာကွယ်ဖို့ ခုခံပစ်ခတ်မယ်ဆိုတာ သိသာပါတယ်။ ဒါသာ အမှုအကြောင်းအရာ အပြည့်အစုံဆိုရင်တော့ တေလာရဲ့အိမ်ထဲကို လူစိမ်းတအုပ် ကျူးကျော်လာပြီလို့ ထင်ခဲ့တဲ့ ဝေါ်ကာရော၊ ဝေါ်ကာရဲ့ စတင်ပစ်ခတ်ခြင်းကိုခံရလို့ ပြန်လည်ပစ်ခတ်ခဲ့တဲ့ ရဲတွေရော နှစ်ဖက်စလုံးကို အပြစ်တင်လို့ မရတော့ပါဘူး။ 

အမေရိကန်ဥပဒေရဲ့ ကြောက်မက်ဖွယ်ကောင်းတဲ့ အချက်တခုအရ အမှုဖြစ်စဉ်မှာပါဝင်တဲ့ တယောက်ချင်းစီဟာ ဥပဒေအရ တရားဝင်တဲ့ ကိုယ့်ကိုယ်ကိုယ် ခုခံကာကွယ်ခွင့်အတိုင်း ပြုမူခဲ့ကြတာပါ။ ရဲတပ်ဖွဲ့ဝင်တွေနဲ့ ဝေါ်ကာဟာ တရားဝင်သေနတ်ပစ်ပွဲမှာ ပါဝင်ခဲ့ကြတာပါပဲ။ 

ဒါပေမဲ့ ရဲတပ်ဖွဲ့ဝင် ဘာရက်ဟန်ကင်ဆန်ကတော့ အဲ့ဒီလိုမဟုတ်ခဲ့ပါဘူး။ ကျနော်ရဲ့ သတင်းဌာနက လုပ်ဖော်ကိုင်ဖက် ရုက်မီနီ ကာလီမာချီရဲ့ ၂၀၂၀ ခုနှစ်က တင်ပြချက်အရ ဘာရက်ဟန်ကင်ဆန်ဟာ ပေပေါင်းများစွာအကွာမှာရှိတဲ့ ကားပါကင်ကနေ တေလာရဲ့ တိုက်ခန်းအတွင်းကို ကောင်းကောင်းမမြင်ရဘဲ ပစ်ခတ်ခဲ့တယ်လို့ သိရပါတယ်။ သူဟာ အဲ့ဒီနေရာကနေ ဆယ်ချက်ပစ်ခတ်ခဲ့ပြီး အဲ့ထဲက သုံးချက်ဟာ နံရံကိုဖောက်ပြီး ကိုယ်ဝန်ဆောင်အမျိုးသမီးတဦးနဲ့ မိသားစုတို့ နေထိုင်တဲ့ ဘေးချင်းကပ်ရပ်အခန်းထဲကို ဝင်ရောက်သွားခဲ့ပါတယ်။

ဟန်ကင်ဆန်ရဲ့ ကျည်ဆန်တွေက တေလာကို မထိခဲ့ပါဘူး။ ဒါပေမဲ့ သူ့ရဲ့ မဆင်မခြင် ကျည်ဆန်အသုံးပြုမှုဟာ သူရဲ့ အခွင့်အရေးတွေကို ချိုးဖောက်ခဲ့ပါတယ်။ လူဝီဗီး ရဲဌာနက ဟန်ကင်ဆန်ကို ၂၀၂၀ ခုနှစ် ဇွန်လမှာ ထုတ်ပယ်ခဲ့ပြီး အဲ့ဒီညက သူ့ဟာ အသိစိတ်လွတ်ပြီး တုန်လှုပ်ချောက်ချားသွားခဲ့တယ်လို့ ထုတ်ပယ်စာမှာဖော်ပြခဲ့ပါတယ်။ 

ကန်တက်ကီပြည်နယ်အစိုးရရှေ့နေတွေက ဟန်ကင်ဆန်ကို ထိန်းချုပ်မှုကင်းမဲ့စွာ အန္တရာယ်ဖြစ်စေမှုနဲ့ တရားစွဲဆို‌ခဲ့ပေမဲ့လည်း ၂၀၂၂ ခုနှစ် မတ်လမှာ ဂျူရီလူကြီးအဖွဲ့က သူ့ကို စွဲချက်ကနေ တရားသေလွှတ်ပေးခဲ့ပါတယ်။ ဖက်ဒရယ်ရှေ့နေတွေကတော့ ဟန်ကင်ဆန်ဟာ တေလာရဲ့ အရပ်သားရပိုင်ခွင့်ကို အလွန်အကျွံအင်အားသုံးကာ ချိုးဖောက်ခဲ့တယ်လို့ ထုတ်ပြန်ခဲ့ပြီး အရပ်သားအခွင့်အရေးချိုးဖောက်မှုနဲ့ ထပ်မံ တရားစွဲဆိုခဲ့ပါတယ်။

ပထမဆုံးဖက်ဒရယ်တရားခွင်ကတော့ ဂျူရီလူကြီးတွေရဲ့ မဲခွဲမှုနဲ့ပဲ ပြီးဆုံးသွားခဲ့ပါတယ်။ ဘိုင်ဒန်အစိုးရရဲ့ တရားရေးဌာနကတော့ နိုဝင်ဘာလမှာ သူ့ကိုပြန်လည်စစ်ဆေးခဲ့ပြီး အပြစ်ရှိကြောင်း ဆုံးဖြတ်ချက်ချခဲ့ပါတယ်။ 

တရက်တာ ထောင်ဒဏ်ကျခံရစေဖို့ တင်ပြတဲ့ စာရွက်စာတမ်းထဲမှာ ဒေလွန်က ဂျူရီလူကြီးတွေရဲ့ ဆုံးဖြတ်ချက်ဟာ ဟန်ကင်ဆန်အနေနဲ့ တရားဥပဒေဘက်တော်သားအဖြစ် ထပ်မံတာဝန်ထမ်းဆောင်ခွင့်မရစေဖို့နဲ့ ဥပဒေအရ တရားဝင်လက်နက်ကိုင်ဆောင်ခွင့်မရရှိစေဖို့ အာမခံထားလုနီးပါးပဲလို့ ရည်ညွှန်းထားပါတယ်။ 

တနည်းဆိုရရင် သူ့အနေနဲ့ ခံသင့်သလောက် ခံရပြီးပြီလို့ သူက ဆိုလိုချင်တာပါ။

ဒီစကားလုံးတွေကို ဖတ်ရတာခက်ခဲပါတယ်။ ထရမ့်ပ်အစိုးရအဖွဲ့ဟာ သေစေနိုင်လောက်တဲ့ ‌လက်နက်ကို မှားယွင်းစွာအသုံးပြုပြီး တိုက်ခန်းနှစ်ခုမှာရှိတဲ့ အပြစ်မရှိတဲ့လူတွေကို အန္တရာယ်ဖြစ်စေခဲ့တဲ့ ရဲအရာရှိတဦးကို သနားကြင်နာမှုအပြည့်ပြသခဲ့ပေမဲ့ တချိန်တည်းမှာပဲ ရာဇဝတ်မှုတစုံတရာ ကျူးလွန်ခြင်းမရှိတဲ့ ရွှေ့ပြောင်းအခြေချသူတွေကို နိုင်ငံရပ်ခြားပို့ပြီး ရက်စက်ကြမ်းကြုတ်တဲ့ အခြေအနေတွေမှာ အကန့်အသတ်မရှိ ထိန်းသိမ်းထားပါတယ်။

အဓိကအချက်ကတော့ ထရမ့်ပ်ရဲ့ ယိုယွင်းနေတဲ့ တရားစီရင်မှုဟာ ဘက်အပေါ်မူတည်ပြီး ဖြစ်တည်နေတာပါ။ ထရမ့်ပ်ဟာ သူ့ကို အားပေးကူညီသူတွေအပေါ် ညှာတာထောက်ထားပြီး ဝေဖန်သူတွေကို ဖိနှိပ်နေတယ်ဆိုတာကို ကျနော်တို့ကျင့်သားရနေကြပါပြီ။ ထရမ့်ဟာ သူ့ရဲ့ ဖဒရယ်ရေးရာရာဇဝတ်မှုတွေကို ကိုင်တွယ်ခဲ့ကြတဲ့ အစိုးရရှေ့နေတွေကို အလုပ်ထုတ်လိုက်ပေမဲ့ ဇန်နဝါရီ ၆ ရက်ဖြစ်စဥ်က အကြမ်းဖက်သူတွေကို လွတ်ငြိမ်းခွင့်ပေးလိုက်ခြင်းဟာ သူ့ရဲ့ တရားဥပ‌ဒေနဲ့ပတ်သက်လို့ မျက်နှာလိုက်တတ်တဲ့ ဥပမာတခုပါပဲ။

ထရမ့်ပ်အုပ်ချုပ်ရေးအဖွဲ့ရဲ့ အရပ်သားအခွင့်အရေးဆိုင်ရာ ကဏ္ဍကို နိုင်ထက်စီးနင်းပြုမှုကတော့ လုံးဝကွဲပြားပါတယ်။ ထရမ့်အစိုးရအဖွဲ့ဟာ အရပ်သားအခွင့်အရေးချိုးဖောက်မှုဆိုင်ရာ အမှုအသစ်တွေကို တရားစွဲဆိုဖို့ ဆိုင်းငံ့ထားခဲ့ပြီး ရဲတွေရဲ့ ချိုးဖောက်မှုများအပေါ် ယခင်ကချမှတ်ထားတဲ့ စီရင်ချက်တွေအပေါ်မှာ ပြန်လည်သုံးသပ်သွားမယ်လို့တောင် ညွှန်ပြနေပါတယ်။ 

အုပ်ချုပ်ရေးအဖွဲ့အသစ်က ယခင်အုပ်ချုပ်ရေးရဲ့ စီရင်ချက်တွေ ဆုံးဖြတ်ချက်တွေကို ပြန်လည်သုံးသပ်စစ်ဆေးတာက မှားယွင်းတဲ့ကိစ္စတော့မဟုတ်ပေမဲ့ ယင်း ပြန်လည်စစ်ဆေးမှုတွေဟာ ဟန်ကင်ဆန်ရဲ့ အမှုလိုမျိုး တရားမျှတမှုကို ပျက်ယွင်းစေတယ်ဆိုရင် ဒါဟာ အရပ်သားအခွင့်အရေးဌာနရဲ့ မူလရည်ရွယ်ချက်ကို ကျနော်တို့မျက်စိရှေ့မှာတင် နှောင့်နှေးစေတာပဲဖြစ်ပါတယ်။

အရပ်သားအခွင့်အရေးရပိုင်ခွင့်တွေဟာ တရားမမျှတတဲ့ အစိုးရအရာရှိတွေဆီက အပြစ်မဲ့တဲ့ နိုင်ငံသားတွေ အထူးသဖြင့် လူနည်းစုသာရှိတဲ့ အသိုက်အဝန်းတွေက အပြစ်မဲ့နိုင်ငံသားတွေကို ကာကွယ်ဖို့ ရေးဆွဲထားတာဖြစ်ပါတယ်။ ဒါပေမဲ့ ဒီနေရာမှာတော့ တရားဥပဒေက ဇောက်ထိုးမိုးမျှော်ဖြစ်သွားပါပြီ။ တရားရေးဌာနက အပြစ်မဲ့တဲ့ အရပ်သားတယောက်ရဲ့ အခွင့်အရေးတွေကို မတရားသဖြင့် ချိုးဖောက်ခဲ့တဲ့ ရဲတပ်ဖွဲ့ဝင်တဦးကို ကာကွယ်ဖို့အတွက် သူ့ရဲ့ အရပ်သားအခွင့်အရေးဌာနကိုအသုံးပြုနေပါတယ်။ 

ကျနော်တို့ရဲ့ တရားရေးစနစ်ကို ထရမ့်ပ်က ဘယ်လို နှောင့်ယှက်နေတယ်၊ ဖျက်ဆီးနေတယ်ဆိုတာ ဖော်ပြဖို့ ခဲယဉ်းပါတယ်။ သို့သော် ကိစ္စတိုင်းမှာတော့ လုပ်ပုံကိုင်ပုံက တထပ်တည်းပါပဲ။ သူ့ရဲ့မိတ်ဆွေတွေက အခွင့်အရေးရကြပြီး ရန်သူတွေကတော့ နှင်ထုတ်ခံကြရပါတယ်။ ဒေလွန်က ဟန်ကီဆန်ရဲ့ အမှုကို ဝင်ရောက်စွက်ဖက်တဲ့ သီတင်းပတ်အတွင်းမှာပဲ ထရမ့်ပ်အစိုးရအဖွဲ့ဟာ ဂျက်ဖရီ အက်ပ်စတိုင်း၊ ဂေလိန်း မက်စ်ဝဲ နဲ့ ရှောင်ကုမ်းဘ်စ် တို့ကို တရားစွဲဆိုရာမှာ ကူညီခဲ့တဲ့ အမေရိကန်အစိုးရရှေ့နေတစ်ဦးဖြစ်သူ မော်ရိန်း ကော်မီ ကို ထုတ်ပယ်ခဲ့ပါတယ်။

ကော်မီဟာ သူထုတ်ပယ်ခံရခြင်းရဲ့ အသေးစိတ် ရှင်းပြချက်ကို မရရှိခဲ့ပေမဲ့လည်း သူဟာ ထရမ့်ပ်ရဲ့ အမုန်းဆုံး ရန်သူများတွေထဲက တယောက်ဖြစ်တဲ့ ဖယ်ဒရယ် စုံစမ်းစစ်ဆေးရေး ဗျူရို (F.B.I.)  အကြီးအကဲဟောင်း ဂျိမ်းစ် ကော်မီရဲ့ သမီးဖြစ်နေပါတယ်။

ပြီးခဲ့တဲ့အပတ်ကလည်း ဒီမိုကရက်တွေရဲ့ ဆန္ဒပြထွက်ခွာခဲ့မှုကြားထဲကပဲ အထက်လွှတ်တော် တရားရေးကော်မတီက အီမီလ် ဘိုဗီ (၃) ကို တတိယမြောက် တရားရုံးချုပ် တရားသူကြီးအဖြစ် ခန့်အပ်ဖို့ မဲပေးခဲ့ကြပါတယ်။ ဘိုဗီဟာ ထရမ့်ပ်ရဲ့ ရှေ့နေဟောင်းတယောက်ဖြစ်ပြီး သူ့ရဲ့ ဒုတိယသက်တမ်းအတွင်း တရားရေးဌာနက ထရမ့်ပ်ရဲ့ အဓိက လူယုံတွေထဲက တယောက်ဖြစ်ပါတယ်။

သူဟာ ထရမ့်ရဲ့ လူဝင်မှုကြီးကြပ်ရေး အစီအစဉ်မှာ ပူးပေါင်းဆောင်ရွက်တဲ့အနေနဲ့ နယူးယောက်မြို့တော်ဝန် အဲရစ် အဒမ်စ်အပေါ် စွဲဆိုထားတဲ့ နိုင်ငံရေးဆိုင်ရာ အဂတိလိုက်စားမှု စွဲချက်တွေကို ပယ်ဖျက်ဖို့ တရားရေးဌာနကို ညွှန်ကြားခဲ့ပါတယ်။ ဒါ့အပြင် ဘိုဗီဟာ ဖက်ဒရယ်တရားရုံးတွေရဲ့ အမိန့်တွေကို ချိုးဖောက်ဖို့ အသင့်ရှိနေကြောင်း အစည်းအဝေးတွေမှာ ပြောကြားခဲ့တယ်လို့ သတင်းပေးသူတဦးက ဆိုပါတယ်။ ဒါကိုတော့ သူက ငြင်းဆိုထားပါတယ်။

ဟန်ကီဆန်အမှုရဲ့ တရားသူကြီး ရီဘဲကား ဂရေဒီ ဂျန်နင်းစ် (ထရမ့်ခန့်အပ်ထားသူ) ဟာ ဒီလွန်ရဲ့ အကြံပြုချက်ကို မဖြစ်မနေ လက်ခံဖို့ မလိုအပ်ပါဘူး။ သူ့မှာ ဟန်ကီဆန်ရဲ့ ရာဇဝတ်မှုတွေအတွက် တရားမျှတတဲ့ ပြစ်ဒဏ်ချမှတ်ဖို့ အခွင့်အာဏာရှိပါတယ်။

သို့သော် သူ့အနေနဲ့ မှန်ကန်တဲ့အရာကို လုပ်ဆောင်ခဲ့တယ်ဆိုရင်တောင်မှ တရားစီရင်ရေးစနစ်ကို ကာကွယ်ဖို့ တရားသူကြီးတွေကိုချည်း အားကိုးနေလို့မရတာတော့ သေချာပါတယ်။ အစိုးရရဲ့ ဘယ်ဌာနမဆို ဖွဲ့စည်းပုံအခြေခံဥပဒေမှာ ပြဋ္ဌာန်းထားတဲ့အတိုင်းပဲ လုပ်ပိုင်ခွင့်ရှိတာဖြစ်ပြီး အကောင်းဆုံးအချိန်ဆိုရင်တောင်မှ သမ္မတ‌ တယောက်မှာ တရားရေးအစိတ်အပိုင်းတခုတည်းနဲ့ ကန့်သတ်ထားလို့မရနိုင်တဲ့ အာဏာတွေရှိပါတယ်။

ဒါပေမဲ့ အခုက အကောင်းဆုံးအချိန် မဟုတ်ပါဘူး။ ဒေါ်နယ်ထရမ့်ပ်ဟာ အမေရိကန်ရဲ့ တရားမျှတမှုစနစ်ကို သူ့ရဲ့ ကိုယ်ပိုင် နိုင်ငံရေးလက်နက်အဖြစ် ပြောင်းလဲဖို့ ဆုံးဖြတ်ထားပြီး အခုအခါ ဘရီယိုနာတေလာရဲ့ မိသားစုဟာ တရားမျှတမှုကင်းမဲ့ခြင်းရဲ့ နာကျင်မှုကို ခံစားနေကြရပါပြီ။

သူရိန်သွေး

New York Times သတင်းစာပါ David French ၏ "Trump’s Perversion of Justice Has Reached a New Phase" ဆောင်းပါးအား ဆီလျော်အောင် ပြန်ဆိုသည်။