အမေရိကန်ပြည်ထောင်စု၊ ပန်ဆယ်လ်ဗေးနီးယားပြည်နယ်၊ ပစ်ထ်စ်ဘာ့ဖ်မြို့အနီးရှိ အမေရိကန် သံမဏိစက်ရုံမှာ သြဂုတ် ၁၁ ရက်က ပေါက်ကွဲမှုကြောင့် လူ ၂ ယောက် သေဆုံးကာ အများအပြား ဒဏ်ရာရရှိခဲ့ပြီး မီးသတ်သမားတွေဟာ မီးတောက်တွေကို ငြှိမ်းသတ်နိုင်ခဲ့ကြောင်း CBS သတင်းဌာနနဲ့ တခြား ပြည်တွင်းသတင်းတွေမှာ ဖော်ပြထားပါတယ်။

ပေါက်ကွဲမှုဖြစ်ပွားရာနေရာရှိ မီးလောင်နေတဲ့ အပျက်အစီးတွေပေါ်ကို မီးသတ်သမားတွေက ရေဖျန်းနေပြီး စက်ရုံမှ မီးခိုးလုံးတွေ ထူထူထပ်ထပ် တက်လာတာကိုလည်း ဝေဟင်ရိုက်ကူးမှုကနေ မြင်တွေ့ရပါတယ်။

ကျောက်မီးသွေးကနေ လောင်စာခဲထုတ်လုပ်တဲ့ ကလဲရ်တွန်-ကုတ်ခ်-ဝါ့ခ်စ် စက်ရုံမှာ ပေါက်ကွဲမှု ဖြစ်ခဲ့ရာမှာ လူပေါင်း ဒါဇင်ချီ ထိခိုက်ခဲ့ရပြီးတော့ ထိခိုက်ဒဏ်ရာရမှု အတိုင်းအတာကို မသိရသေးကြောင်း အဲဒီစက်ရုံကို ပိုင်ဆိုင်တဲ့ အမေရိကန်စတီးလ် သံမဏိကုမ္ပဏီမှ ပြောကြားကြောင်း ပစ်ထ်စ်ဘာ့ဖ်ရှိ ABC သတင်းဌာနရဲ့ တွဲဖက်သတင်းဌာန WTAE က သတင်းပေးပို့ထားပြီး သတင်းရင်းမြစ်တွေကို ကိုးကားဖော်ပြခြင်း မရှိပါဘူး။

အမေရိကန်စတီးလ် ကုမ္ပဏီဟာ ဂျပန်ပိုင် နိပွန်စတီးလ် သံမဏိကုမ္ပဏီရဲ့ လက်အောက်ခံလည်း ဖြစ်ပါတယ်။

ပန်ဆယ်လ်ဗေးနီးယား ပြည်နယ်အုပ်ချုပ်ရေးအဖွဲ့ဟာ ပေါက်ကွဲမှုကို တုံ့ပြန်ဆောင်ရွက်ခဲ့ပြီး ကလဲရ်တွန်မြို့ရှိ ဒေသဆိုင်ရာ အရာရှိတွေနဲ့ အဆက်အသွယ်လုပ်ခဲ့ကြောင်း ပြည်နယ်အုပ်ချုပ်ရေးမှူး ဂျို့ရှ် ရှပီရိုက X မှာ ပို့စ်တင် ရေးသားခဲ့ပါတယ်။

အပျက်အစီးတွေအောက်မှာ လူတချို့ ပိတ်မိနေပြီး သူတို့ဆီရောက်ရှိဖို့ အရေးပေါ်ဝန်ထမ်းတွေ လုပ်ဆောင်နေကြောင်းနဲ့ သေဆုံးသူအရေအတွက်ကို အတည်ပြုနိုင်ခြင်း မရှိသေးကြောင်း အားလက်ဂေးနီကောင်တီရဲ့ ဆက်သွယ်ရေးဒါရိုက်တာ အာဘိဂေးလ် ဂါ့ဒ်နာက CNN သတင်းဌာနကို  ပြောပါတယ်။

Source: Reuters