ရခိုင်ပြည်နယ်၊ ဘူးသီးတောင်မြို့နယ်အတွင်းက ထန်းရှောက်ခံရွာမှာ အစုလိုက်အပြုံလိုက် သေဆုံးနေတဲ့ ရုပ်အလောင်းတွေဟာ စစ်ကောင်စီတပ်သားတွေရဲ့ ရုပ်အလောင်းတွေဖြစ်ပြီး ရိုဟင်ဂျာတွေ အစုလိုက် အသတ်ခံရတဲ့ ပြောဆိုချက်က စွပ်စွဲချက်ဖြစ်တယ်လို့ အာရက္ခတပ်တော် (AA) ဘက်က တုံ့ပြန် ပြောဆိုပါတယ်။
ပြီးခဲ့တဲ့ဇူလိုင်လအတွင်းက လူမှုကွန်ရက်ပေါ်မှာ ပျံ့နှံ့လာတဲ့ ရုပ်သံဖိုင်အတွင်းက ရုပ်အလောင်း ၆၀၀ နီးပါးလောက်ဟာ အာရက္ခတပ်တော် (AA) က ရိုဟင်ဂျာတွေကို အစုလိုက် သတ်ဖြတ်ခဲ့တာ ဖြစ်တယ်လို့ လူ့အခွင့်အရေးအဖွဲ့တွေက ထုတ်ပြန်ထားခဲ့ပါတယ်။
ဒီထုတ်ပြန်ချက်နဲ့ပတ်သက်ပြီး ဒီကနေ့ ဩဂုတ် ၁၁ ရက်မှာ ပြုလုပ်တဲ့ သတင်းစာရှင်းလင်းပွဲမှာ DVB သတင်းဌာနက မေးမြန်းရာမှာ အခုလို ပြန်လည်ဖြေဆိုလိုက်တာ ဖြစ်ပါတယ်။
အာရက္ခတပ်တော် (AA) ရဲ့ ပြောခွင့်ရ ဦးခိုင်သုခက “အကြမ်းဖက်စစ်ကောင်စီက ဆောင်းတဲ့ ဦးထုပ်တွေ၊ နောက်ပြီး သေနေတဲ့ အလောင်းတွေရဲ့ အရိုးစုတွေမှာ ဝတ်ဆင်ထားတဲ့ စစ်ဖိနပ်တွေ၊ အဲဒါတွေက သက်သေတွေပဲဖြစ်ပါတယ်။ အခု စွပ်စွဲပြီး ပြောဆိုထားတဲ့ ဓာတ်ပုံတွေဟာ အကြမ်းဖက်စစ်ကောင်စီဘက်က ကျဆုံးသွားတဲ့ စစ်သားအလောင်းတွေပဲ ဖြစ်ပါတယ်” လို့ ပြောဆိုခဲ့ပါတယ်။
ဒါ့အပြင် ၂၀၁၇ ခုနှစ် လူဦးရေစာရင်းအရ ထန်းရှောက်ခံကျေးရွာမှာ လူဦးရေ ၉၉၃ ယောက် ရှိခဲ့ပြီး တိုက်ပွဲကာလအတွင်းမှာ ဒေသခံပြည်သူတွေ စစ်ရှောင်ဖို့ နေရာရွှေ့ပြောင်းတာတွေ ရှိခဲ့သလို လက်ရှိမှာတော့ လူဦးရေ ၇၉၁ ယောက် ရှိတယ်လို့ ဦးခိုင်သုခက ဆက်ပြောပါတယ်။
“ကျနော်တို့က ရွာသူကြီးကို ဘာဖြစ်လို့ လူဦးရေ လျော့သွားလဲဆိုပြီး ပြန်မေးတော့ သူရှင်းပြတာက တချို့လူတွေက ဘင်္ဂလားဒေ့ရှ်ဘက် ဒုက္ခသည်စခန်းတွေကို ပြေးသွားတာရှိတယ်။ နောက် တချို့က ရန်ကုန်ဘက်ကို ပြေးသွားတဲ့သူတွေ ရှိတယ်။ တချို့က မလေးရှားဘက်ကို သွားတာရှိတယ် ဆိုပြီး အခုလို ရှင်းပြတာတွေ ရှိပါတယ်။ ဒါကြောင့် သူတို့ စွပ်စွဲထားသလို ရွာသား ၆၀၀ လောက်ကို ULA/AA က အစုလိုက် အပြုံလိုက် သတ်ဖြတ်ထားတယ်ဆိုတဲ့ ကိစ္စဟာ လုံးဝမဟုတ်ပါဘူး” လို့ ဦးခိုင်သုခက ပြောပါတယ်။
ဒါကြောင့် ကိုယ်ကျိုးရှာသူတချို့က AA ကို စွပ်စွဲထားတာဖြစ်ပြီး သတင်းထောက်တွေအနေနဲ့ ထန်းရှောက်ပင်ရွာကို ကိုယ်တိုင်သွားကြည့်မယ်ဆိုရင်လည်း လုံခြုံရေးပေါ်မူတည်ပြီး စီစဉ်ပေးနိုင်တယ်လို့ ဦးခိုင်သုခက ဆက်လက်ပြောဆိုသွားပါတယ်။
