ဧရာဝတီတိုင်း၊ ရေကြည်မြို့နယ်၊ မြောက်စမ်းကျေးရွာရှိ အမြောက်တပ် အမတ-၃၄၄ အနီးပတ်ဝန်းကျင်မှာ အာရက္ခတပ်တော် (AA)၊ တော်လှန်ရေးပူးပေါင်းတပ်ဖွဲ့တွေနဲ့ စစ်တပ်တို့ တကျော့ပြန် တိုက်ပွဲ ပြင်းပြင်းထန်ထန် ဖြစ်ပွားနေတယ်လို့ ဒေသခံတွေဆီက သိရပါတယ်။

အဲဒီ အမြောက်တပ်ကို အာရက္ခတပ်တော် (AA) နဲ့ PDF တော်လှန်ရေးပူးပေါင်းတပ်တွေက အခုနှစ် မေလ ပထမအပတ်က စတင်ထိုးစစ်ဆင် တိုက်ခိုက်ခဲ့တာဖြစ်ပြီး ပြီးခဲ့တဲ့ရက်ပိုင်းက တိုက်ပွဲတွေ ခေတ္တငြိမ်သက်သွားရာက သြဂုတ် ၆ ရက် ဒီကနေ့မနက် အစောပိုင်းက စတင်ပြီး တိုက်ပွဲ တကျော့ပြန် ဖြစ်နေတာလို့ ဆိုပါတယ်။

ရေကြည်မြို့နယ်က ဒေသခံတယောက်က “အဆက်မပြတ် ပစ်ခတ်သံတွေ ကြားနေရတယ်။ တိုက်ပွဲက တော်တော်ပြင်းထန်ပုံရတယ်။ လေကြောင်းနဲ့လည်း ပစ်ခတ်တာတွေ ရှိတယ်။ အမြောက်တပ်ဘက်သွားတဲ့ လမ်းတွေအားလုံးလည်း ပိတ်ထားတယ်” လို့ ပြောပါတယ်။

အာရက္ခတပ်တော် (AA) နဲ့ မဟာမိတ်တပ်တွေက အမြောက်တပ် အမတ-၃၄၄ ကို ထိုးစစ်ဆင်လာတာဖြစ်ပြီး စစ်တပ်က စက်တပ်လေထီးတွေအပြင် လေကြောင်းနဲ့ပါ ပစ်ကူပေး ပြန်လည်ခုခံနေတယ်လို့ တပ်နဲ့ နီးစပ်သူက ဆိုပါတယ်။

စစ်ရေးသတင်းရင်းမြစ်က “အခုတခါ တိုက်ပွဲက တဖက်ဖက်က အပြီးသတ်သိမ်းသွားမယ့် အခြေအနေ ရှိတယ်။ နှစ်ဖက်တပ်တွေ အင်အားဖြည့်ထားပြီး ပြန်တိုက်တဲ့ တိုက်ပွဲလေ” လို့ ပြောပါတယ်။

အမြောက်တပ် အမတ-၃၄၄ ကို လေတပ်က လေယာဉ်နဲ့ စစ်လက်နက်တချို့ကို ပြီးခဲ့တဲ့ ဇူလိုင် ဒုတိယအပတ်က ပို့ဆောင်ခဲ့သေးတယ်လို့ စတပ်နဲ့ နီးစပ်သူတွေဆီက သိရပါတယ်။

အမတ-၃၄၄ မှာ ပြီးခဲ့တဲ့ရက်အတွင်းက စတင်ဆောက်လက်စ အရေးပေါ်ဆင်းသက်ဖို့ ရဟတ်ယာဉ်ကွင်းနဲ့ အဆောက်အအုံတချို့ကိုလည်း စစ်တပ်ကက သြဂုတ် ၃ ရက်က အပြီးသတ် တည်ဆောက်ထားပါတယ်။

အဲဒီတိုက်ပွဲအခြေအနေနဲ့ ပတ်သက်လို့ အာရက္ခတပ်တော် (AA) ဘက်ကရော စစ်တပ်ဘက်ကပါ စစ်ရေးသတင်းတွေ ထုတ်ပြန်ထားတာ မရှိသေးပါဘူး။