မန္တလေးတိုင်း၊ မြင်းခြံမြို့နယ်ထဲက ဗလုံကျေးရွာကို သြဂုတ် ၈ ရက် ည ၈ နာရီကျော်မှာ စစ်ကောင်စီတပ်ဖွဲ့တွေ ဝင်ရောက်စီးနင်းပြီး ဒေသခံတွေကို ဖမ်းဆီးသွားသလို ရွာကိုလည်း မီးရှို့သွားတယ်လို့ ဒေသခံတွေဆီက သိရပါတယ်။
ဗလုံကျေးရွာမှာ အိမ်ခြေ ၃၀၀ ကျော်ရှိပြီး တရွာလုံးကိုမီးရှို့သလို ဒေသခံတချို့ကိုတော့ ဓာစာခံအဖြစ် ဖမ်းဆီးသွားတာလို့ ဆိုပါတယ်။
မြင်းခြံမြို့နယ် ပြည်သူ့ကာကွယ်ရေးတပ်ဖွဲ့ဝင်တယောက်က “ဗလုံရွာက မြင်းခြံမြို့နဲ့ ၆ မိုင် အကွာမှာရှိတာ။ ညဘက် အလစ်အငိုက် ရွာကို စစ်ကောင်စီတပ် စစ်ကြောင်းထိုးဝင်လာပြီး ဒေသခံတွေကို ဖမ်းဆီးတာ၊ ရွာကို မီးရှို့သွားတာ၊ သြဂုတ်လ ၇ ရက်နေ့ကလည်း လက်နက်ကြီးတွေနဲ့ ရမ်းသန်းပစ်ခတ်ခဲ့လို့ ညောင်ပင်သာဒေသခံ အမျိုးသား ၂ ယောက် လက်နက်ကြီးထိမှန် သေဆုံးခဲ့ရတယ်” လို့ ပြောပါတယ်။
ဗလုံရွာကို စစ်ကောင်စီတပ် ဝင်စီးချိန်မှာ ဖမ်းဆီးသတ်ဖြတ်ခံရသူတွေလည်းရှိပြီး စစ်ကြောင်းရှိနေသေးလို့ လူဦးရေအတိအကျကိုတော့ စုံစမ်းလို့ မရသေးပါဘူး။
ပြီးတော့ ဗလုံတရွာလုံးနီးပါး မီးလောင်ပျက်စီးခဲ့ရသလို စစ်ကြောင်းကြောင့် သစ်ပင်ခြေ၊ ပျော်ဘွယ်၊ စံပြ၊ ခင်မကန်၊ မြောက်ကုန်း၊ သဲတောတဲ၊ ကံဆင့်တောင်ရွာ၊ မြောက်ရွာ၊ သမုန်းကိုင်း၊ ဖုံရသာ၊ ဖောင်းကား၊ လက်ဝဲမြင်းနီ၊ သင်ပြွန်း၊ ညောင်ပင်ရွာ၊ ရွာကြီး၊ ရွာသစ်စတဲ့ ကျေးရွာပေါင်း ၂၀ လောက်က ဒေသခံတွေ ထွက်ပြေးတိမ်းရှောင်နေကြရပါတယ်။
သြဂုတ် ၂ ရက်နေ့က မြင်းခြံမြို့အရှေ့ဘက်မှာ တော်လှန်ရေးတပ်ဖွဲ့တွေနဲ့ စစ်ကောင်စီတပ်တို့ တိုက်ပွဲတွေဖြစ်ခဲ့ပြီး သြဂုတ် ၆ ရက်နေ့မှာ စစ်ကောင်စီတပ်က အင်အားတိုးပြီး မြင်းခြံမြို့နယ်ထဲက ကျေးရွာတွေဆီ စစ်ကြောင်းထိုးလာခဲ့တာပါ။
