အိန္ဒိယအသင်းနဲ့ အုပ်စုနောက်ဆုံးပွဲစဉ်မှာ အနိုင်ရလဒ်ရယူနိုင်မှသာ မြန်မာ ယူ- ၂၀ အမျိုးသမီး အသင်း အာရှဖလားခြေစစ်ပွဲ အောင်မြင်မှာဖြစ်ပါတယ်။
မြန်မာ ယူ-၂၀ အမျိုးသမီးအသင်းဟာ သြဂုတ် ၈ ရက်က ကစားခဲ့တဲ့ အင်ဒိုနီးရှား ယူ-၂၀ နဲ့ အုပ်စု ဒုတိယပွဲစဉ်မှာ ၂ ဂိုး စီ သရေရလဒ်နဲ့သာ ကျေနပ်ခဲ့ရတာပါ။
ဒီရလဒ်ကြောင့် အိန္ဒိယနဲ့ ရမှတ်တူပေမဲ့ ဂိုးကွာခြားချက်အရ အုပ်စုဒုတိယနေရာမှာရပ်တည်နေ တာပါ။
ခြေစစ်ပွဲအဆင့်မှာ အုပ်စုပထမ ၈ သင်းနဲ့ အကောင်းဆုံးအုပ်စုဒုတိယ ၃ သင်း စုစုပေါင်း ၁၁ သင်းသာ ခြေစစ်ပွဲအောင်မြင်မှာပါ။
မြန်မာယူ-၂၀ အမျိုးသမီးအသင်းဟာ အိန္ဒိယနဲ့ပွဲမှာ အနိုင်ရမှသာ အုပ်စုပထမနေရာကနေ တိုက်ရိုက် ခြေစစ်ပွဲအောင်မြင်မှာဖြစ်ပြီး သရေကျခဲ့မယ်ဆိုရင် ထိပ်တိုက်တွေ့ဆုံမှု စည်းမျဉ်းအရ တူညီနေပေမဲ့ ဂိုးကွာခြားချက်အရ အုပ်စုဒုတိယ သို့မဟုတ် တတိယနေရာ အထိဆင်းပေးရမှာပါ။
သရေကျခဲ့လို့ ရမှတ် ၅ မှတ်နဲ့ ဒုတိယရမယ်ဆိုရင် အကောင်းဆုံးအုပ်စုဒုတိယ ၃ သင်းစာရင်းဝင်မှာ မဟုတ်ဘဲ တခြားအုပ်စုတွေမှာ ၆ မှတ်ရရှိထားတဲ့ အသင်းတွေက ၅ သင်းအထိရှိနေတာ ဖြစ်ပါတယ်။
အုပ်စု တတိယနေရာက အင်ဒိုနီးရှားကလည်း ရမှတ် ၂ မှတ်ရရှိထားပြီး အုပ်စုတွင်း အားအနည်းဆုံးအသင်းဖြစ်တဲ့ တာ့မင်နစ္စတန်နဲ့ပွဲမှာ ဂိုးအများအပြားနဲ့ အနိုင်ရမယ်ဆိုရင် ရမှတ် ၅ မှတ်ရရှိပြီး ခြေစစ်ပွဲ အောင်ဖို့ မျှော်လင့်နိုင်ပါတယ်။
