မန်ယူအသင်းဟာ ဂျာမန်ကလပ် လိုက်ပ်ဇစ်တိုက်စစ်မှူး ဘင်ဂျမင် ဆက်စ်ကို ကို ယူရို ၈၅ သန်းနဲ့ ခေါ်ယူ နိုင်ခဲ့ပါတယ်။
သြဂုတ် ၈ ရက်ညပိုင်းအထိ နှစ်ဘက်စလုံးက သတင်းမထုတ်ပြန်သေးပေမဲ့ တိုက်စစ်မှူး ဆက်စ်ကိုဟာ အင်္ဂလန်ကို ရောက်နေပြီဖြစ်ပြီး မန်ယူအသင်းနဲ့ ဆေးစစ်မှုခံယူခဲ့တယ်လို့ သိရပါတယ်။
မန်ယူအသင်းဟာ ဆလိုဗေးနီးယားတိုက်စစ်မှူးအတွက် ကနဦး ယူရို ၇၆ သန်းခွဲပေးချေခဲ့ရပြီး စွမ်းဆောင်ရည် အပေါ်မူတည်ကာ နောက်ထပ်အပိုကြေး ယူရို ၈ သန်းခွဲ ထပ်ပေးရမှာဖြစ်ပြီး စုစုပေါင်း ယူရို ၈၅ သန်းပေးချေရမှာပါ။
မန်ချက်စတာယူနိုက်တက်ဟာ ဆက်စ်ကို ကို ၂၀၃၀ အထိ သက်တမ်းရှိတဲ့စာချုပ်ချုပ်ဖို့ ပုဂ္ဂိုလ်ရေးသဘောတူညီမှုရထားတာဖြစ်ပြီး မန်ယူအသင်းကိုပြောင်းဖို့အတွက် သူ့လစာကို လျှော့ယူခဲ့တယ်လို့ Sky Germany က ဖော်ပြပါတယ်။
အသက် ၂၂ နှစ်အရွယ် အရပ် ၆ ပေ ၅ လက်အမြင့်ရှိ ဆက်စ်ကိုဟာ လိုက်ပ်ဇစ်နဲ့ ၂ ရာသီကာလအတွင်းမှာ စုစုပေါင်း ၃၉ ဂိုးသွင်းယူခဲ့သူဖြစ်ပြီး ဆလိုဗေးနီးယားနိုင်ငံအသင်း အတွက်လည်း ၄၁ ပွဲကစားပြီး ၁၆ ဂိုးသွင်းယူထားပါတယ်။
ဆက်စ်ကို ကို ခေါ်ယူဖို့ နယူးကာဆယ် ယူနိုက်တက်ကလည်း ကြိုးပမ်းခဲ့ပေမဲ့ ကစားသမားက မန်ချက်စတာယူနိုက်တက် အသင်းကိုပဲ ရွေးချယ်ခဲ့တာဖြစ်ပါတယ်။
