ဧရာဝတီတိုင်း၊ ဟင်္သာတခရိုင်၊ လေးမျက်နှာမြို့နယ်၊ အောက်စုကျေးရွာ ကျောင်းထိုင် ဘုန်းကြီး တပါးနဲ့ အရပ်သား ၆ ယောက်ကို အာဏာသိမ်း စစ်တပ်က ဖမ်းဆီးထားသွားတယ်လို့ ဒေသခံတွေဆီက သိရပါတယ်။
ဇူလိုင် ၃၁ ရက်မှာ စစ်တပ်က အောက်စုကျေးရွာကျောင်းထိုင်ဆရာတော်ကို သင်္ကန်းချွတ်ပြီး စစ်ဆေးဖို့ ရှိတာကြောင့်ဆိုကာ အရပ်သား ၆ ယောက်နဲ့အတူ ဖမ်းဆီးခဲ့တာဖြစ်ပြီး သြဂုတ် ၄ ရက်အထိ ဘယ်မှာ ဖမ်းထားတယ်ဆိုတာ မသိပါဘူးလို့ ဆိုပါတယ်။
ဒေသခံတယောက်က ''အကြမ်းဖက်သမားတွေကို ကျောင်းမှာ လက်ခံထားတယ်လို့ စွပ်စွဲပြီးဖမ်းတာ။ အဖမ်းခံရတဲ့ ဆရာတော်က ကျောင်းထိုင်ဆရာတော်ပါ။ အဲဒီနေ့ တရက်တည်း ဒေသခံ ၆ ယောက်လည်း အဖမ်းခံရတာ''လို့ ပြောပါတယ်။
ဖမ်းဆီးခံရတဲ့ ကျောင်းထိုင်ဘုန်းကြီးဟာ ရခိုင်တိုင်းရင်းသားတယောက်ဖြစ်ပြီး စစ်တပ်က အင်အားအများအပြားနဲ့ တော်လှန်ရေးတပ်တွေနဲ့ အဆက်အသွယ်ရှိတယ်ဆိုပြီး ဖမ်းသွားတာ လို့ဆိုပါတယ်။
စစ်ဘေးရှောင်အရေး ကူညီပေးနေသူက ''အုပ်ချုပ်ရေးဘက်က ထပ်သိရတာကတော့ စစ်ရှောင်တွေ ကိုကျောင်းထဲမှာ လက်ခံပေးထားတာကြောင့်ဖမ်းတာလို့ လည်းသိရတယ်။ ဆရာတော်နဲ့ အရပ်သားတွေနဲ့ ပါဖမ်းတဲ့နေ့ကတည်းက အဆက်အသွယ် ပြတ်နေတာ။”လို့ ပြောပါတယ်။
အဖမ်းခံရတဲ့ အရပ်သား ၆ ယောက်ဟာ အမျိုးသားတွေဖြစ်ပြီး ပြည်သူ့ကာကွယ်ရေးတပ်ဖွဲ့ (PDF) အပါအဝင် တော်လှန်ရေးတပ်တွေနဲ့ အဆက်သွယ်ရှိတာကြောင့်ဆိုပြီး ဖမ်းသွားတာပဲလို့ သိရပါတယ်။
လေးမျက်နှာမြို့နယ်ဟာ လတ်တလော တိုက်ပွဲဖြစ်နေတဲ့ ဒေသတခုဖြစ်ပြီး စစ်တပ်က အောက်စုကျေးရွာနဲ့ တဆက်တည်း အလယ်ကျွန်းကျေးရွာအောက်ရိုး ကျေးရွာမှာ လူငယ်အများစု မရှိတာကြောင့်အရပ်သား သက်ကြီးပိုင်းတွေ ၅ ယောက်ကို ဖိအားပေး ကင်းစောင့် ခိုင်းထားတယ်လို့ ဆိုပါတယ်။
