ကရင်ပြည်နယ်၊ ဘားအံမြို့မှာ သံလွင်မြစ်ရေကြီးမှုကြောင့် မြို့ခံတွေနဲ့အတူ စစ်ဘေးရှောင် ပြည်သူတွေ အပါအဝင် ရေဘေးသင့်ပြည်သူ ၁၄,၀၀၀ ကျော်ဟာ ရေဘေးကယ်ဆယ်ရေးစခန်း ၂၄ ခုမှာ ခိုလှုံနေရတယ်လို့ လူမှုကူညီရေးအသင်းတွေဆီက သိရပါတယ်။

ဘားအံမြို့မှာ မိုးအဆက်မပြတ်ရွာသွန်းပြီး တောင်ကျရေနဲ့ သံလွင်မြစ်ရေကြောင့် ရေကြီးမှုတွေ ဖြစ်ပေါ်ခဲ့ပါတယ်။

ဇူလိုင် ၃၁ ရက် မနက် ၆ နာရီခွဲအချိန် တိုင်းတာချက်အရ သံလွင်မြစ်ရေဟာ စိုးရိမ်ရေအမှတ် ၇၅၀ စင်တီမီတာအထက် ၉၂၇ စင်တီမီတာကို ရောက်ရှိနေပါတယ်။

ရေကြီးနစ်မြုပ်မှုတွေကြောင့် ဘားအံမြို့ပေါ်က ကယ်ဆယ်ရေးစခန်း အခု ၂၀ နဲ့ အနီးအနား ကျေးရွာက ကယ်ဆယ်ရေးစခန်း ၄ ခုမှာ မြို့ခံတွေနဲ့အတူ စစ်ဘေးရှောင်ပြည်သူတွေ အပါအဝင် ရေဘေးသင့်ပြည်သူ ၁၄,၀၀၀ ကျော် ခိုလှုံနေရပါတယ်။

ဘားအံမြို့ အနိမ့်ပိုင်းရပ်ကွက်တွေ အကုန်လုံးနီးပါး ရေမြုပ်ကုန်ပြီလို့ လူမှုကူညီရေးအသင်း တာဝန်ရှိသူတွေက ပြောပါတယ်။

လူမှုကူညီရေးအသင်း တာဝန်ရှိသူတယောက်က “ရပ်ကွက် အကုန်လုံးနီးပါးပေါ့။ အနိမ့်ပိုင်းက အကုန်လုံးမြုပ်ပဲ။ ရေက ထပ်တက်တယ်လေ။ ၈ ရက်နေ့က လပြည့်ဆိုတော့ လပြည့်ရေကို ကျနော်တို့က လန့်နေတာ။ နောက်တခုက သိပ်တော့ အလုပ်မရှုပ်ဘူးပေါ့။ ၃ နှစ်ဆက်တိုက် ထိထားတော့ အတွေ့အကြုံက ရှိထားပြီးသားဆိုတော့ သိပ်မပင်ပန်းဘူး။ တခြားနယ်ကအသင်းတွေ ချိတ်ဖို့ ပြောတယ်။ ကျနော်တို့က ကိုယ်မြို့နယ်နဲ့ ကိုယ်နိုင်တယ်၊ အကုန်လုံးကလည်း ရေဘေးက နှစ်တိုင်းဆိုတော့ အတွေ့အကြုံရှိနေတော့ error မရှိဘူး” လို့ ပြောပါတယ်။

ဘားအံမြို့၊ ရပ်ကွက် ၉ ခုလုံးက အနိမ့်ပိုင်း နေအိမ်တွေ အပါအဝင် မြေနိမ့်ပိုင်းကျေးရွာတွေကို သံလွင်မြစ်ရေ ဝင်ရောက်ခဲ့ပါတယ်။

ရေဘေးသင့်ပြည်သူတွေကို မီးသတ်တပ်ဖွဲ့နဲ့ လူမှုကူညီရေးအသင်းတွေက မိုးလုံလေလုံ အားကစားရုံ၊ ရွှေယဉ်မျှော်ဘုရား၊ ဆိုင်ကလုံးရှယ်လ်တာ၊ အထက ၃ အားကစားရုံ စတဲ့ ရေဘေးကယ်ဆယ်ရေးစခန်း ၂၄ ခုမှာ ယာယီရွှေ့ပြောင်းထားပါတယ်။

ဒါ့အပြင် သံလွင်မြစ်ရေကြီးမှုကြောင့် ယာဉ်ငယ်တွေ သွားလာလို့မရတော့ဘဲ လက်ရှိမှာ ဘားအံ-ရန်ကုန် မှန်လုံယာဉ်လိုင်း ၂ လိုင်းပဲ ပြေးဆွဲနေတယ်လို့ အဝေးပြေးယာဉ်လိုင်း တာဝန်ရှိသူက ပြောပါတယ်။

“ထွက်တော့ ထွက်ပါတယ်။ ကျနော်တို့လည်း ၃ စီး ၄ စီး။ မိဘဂုဏ်လည်း ၃ စီး ၄ စီး ထွက်ပါသေးတယ်။ ကားလေးတွေတော့ သွားလို့မရတော့ဘူး။ ဒုံသမိတံတားမှာ ကားကြီးတောင် ၃ ချိုး ၂ ချိုးလောက် မြုပ်တယ်။ မုန်လုံကတော့ ၂ လိုင်းထွက်နေသေးတယ်။ ရေထပ်တက်ရင်တော့ နားရမှာပေါ့။”

ဇူလိုင် ၂၈ ရက်က စတင်ပြီး မြဝတီမြို့မှာ မိုးအဆက်မပြတ်ရွာသွန်းတာ၊ တောင်ကျရေကြောင့် သောင်ရင်းမြစ်ရေလျှံပြီး မြေနိမ့်ပိုင်းရပ်ကွက်တွေကို ရေဝင်ရောက်တာတွေ ဖြစ်ပေါ်ခဲ့ပါတယ်။

လက်ရှိ ဇူလိုင် ၃၁ ရက် မနက် ၆ နာရီခွဲအချိန် တိုင်းတာချက်အရ သောင်ရင်းမြစ်ရေဟာ မြဝတီမြို့ရဲ့ စိုးရိမ်ရေအမှတ် ၉၆၃ စင်တီမီတာကို ကျော်လွန်ပြီး ၁,၀၇၂ စင်တီမီတာမှာ ဆက်ရှိနေပြီး ပြန်လည်ကျဆင်းနေပါတယ်။

အောင်ခန့်