မြောက်ကိုရီးယားနဲ့ အမေရိကန်ပြည်ထောင်စုတို့ရဲ့ အတိတ်ကာလ ထိပ်သီးအစည်းအဝေးတွေ ပြီးဆုံးသွားပြီးကတည်းက လက်တွေ့အဖြစ်အပျက်တွေ ပြောင်းလဲသွားခဲ့တာကို အမေရိကန်အနေနဲ့ လက်သင့်ခံရမှာဖြစ်ပြီး အနာဂတ်ဆွေးနွေးပွဲတွေမှာလည်း သူ့ရဲ့ နျူကလီးယားအစီအစဉ်ကို အဆုံးသတ်စေနိုင်မှာ မဟုတ်ဘူးလို့ မြောက်ကိုရီးယားက ဇူလိုင် ၂၉ ရက်မှာ ပြောကြားလိုက်ကြောင်း နိုင်ငံပိုင်မီဒီယာ KCNA က ဖော်ပြပါတယ်။

မြောက်ကိုရီးယားခေါင်းဆောင် ကင်မ်ဂျုံအန်းနဲ့ အမေရိကန်သမ္မတ ဒေါ်နယ်ထရမ့်ပ်တို့ကြား ပုဂ္ဂိုလ်ရေးဆက်ဆံရေးကတော့ ‘မဆိုးဝါးဘူး’ ဆိုတာကိုတော့ သဘောတူတယ်လို့ ကင်မ်ဂျုံအန်းရဲ့ ဩဇာထက်တဲ့ နှမဖြစ်သူ ကင်မ်ယိုးဂျုံက ပြောပါတယ်။

မြောက်ကိုရီးယားရဲ့ ထုတ်ပြန်ချက်နဲ့ ပတ်သက်လို့ မေးမြန်းရာမှာ အိမ်ဖြူတော်အရာရှိတယောက်က ထရမ့်ပ်ဟာ သူ့ရဲ့ သမ္မတ ပထမသက်တမ်းအတွင်း ကင်မ်ဂျုံအန်းနဲ့အတူ ကျင်းပခဲ့တဲ့ ထိပ်သီးအစည်းအဝေး ၃ ကြိမ် လုပ်ခဲ့တုန်းက သူထားရှိခဲ့တဲ့ ရည်ရွယ်ချက်အပေါ် ဆက်လက် အားထားနေဆဲ ဖြစ်တယ်လို့ ပြောဆိုခဲ့ပါတယ်။

၂၀၁၈ ခုနှစ်က စင်ကာပူမှာ သူတို့ရဲ့ ပထမဆုံး တွေ့ဆုံမှုတုန်းက ထရမ့်ပ်နဲ့ ကင်မ်ဂျုံအန်းတို့ဟာ ကိုရီးယားကျွန်းဆွယ်မှာ နျူကလီးယားလက်နက်တွေ ကင်းစင်စေဖို့ မူအားဖြင့် သဘောတူ လက်မှတ်ရေးထိုးခဲ့ကြပါတယ်။

ပြုံယမ်းအပေါ် ချမှတ်ထားတဲ့ နိုင်ငံတကာ ပိတ်ဆို့အရေးယူမှုတွေကို ဖယ်ရှားဖို့ကိစ္စအပေါ် သဘောထားကွဲလွဲမှုတွေကြောင့် နောက်နှစ် ဟနွိုင်းမှာလုပ်မယ့် ထိပ်သီးအစည်းအဝေး ပျက်သွားခဲ့တာ ဖြစ်ပါတယ်။

Source: Reuters