ရှမ်းပြည်နယ်တောင်ပိုင်း၊ ပင်းတယမြို့နယ်ထဲက ကျေးရွာတချို့မှာ တောင်ကျချောင်းရေရဲ့ ရေစီးကြောင့် ကလေးငယ် အပါအဝင် ပြည်သူ ၈ ယောက် သေဆုံးပြီး ရပ်စောက်နဲ့ ပင်းတယကို ချိတ်ဆက်ထားတဲ့ တံတား ၃ စင်းလည်း ပျက်စီးခဲ့ရတယ်လို့ ဒေသခံပြည်သူတွေက ဇူလိုင် ၂၉ ရက်မှာ ပြောပါတယ်။
ဇူလိုင် ၂၇ ရက်ကစလို့ ၂ ရက်ဆက်တိုက် မိုးရွာပြီး တောင်ကျချောင်းရေတွေကြောင့် ပင်းတယမြို့နယ်၊ သိမ်ကုန်းကျေးရွာအုပ်စု၊ ကုန်းစောင်းရွာက ကလေးငယ် ၃ ယောက်၊ အမျိုးသားတယောက်၊ အမျိုးသမီး ၄ ယောက် သေဆုံးပြီး နေအိမ် ၁၂ လုံးလည်း ပျက်စီးကာ ထပ်မံပြောင်းရွှေ့ဖို့ လိုအပ်တာတွေလည်း ရှိနေပါတယ်။
ဒေသခံတယောက်က “ကိုယ်ဝန်ဆောင်တဲ့သူတွေကော ကလေးတွေရော သေတယ်။ အိမ်တွေလည်း တော်တော်ပျက်စီးတယ်။ တံတားတွေလည်း ပျက်တော့ သွားရေးလာရေး ခက်ပြီ။ မိုင်းအင်းတံတားရော ကျန်တဲ့တံတားတွေလည်း ပျက်စီးနေတာ။ ဇော်ဂျီချောင်းကတော့ ရေတက်နေတုန်းဗျ” လို့ ပြောပါတယ်။
ရပ်စောက်နဲ့ ပင်းတယကို ချိတ်ဆက်ပြီး ကုန်စည်ပို့ဆောင်တဲ့ အဓိကတံတားဖြစ်တဲ့ မိုင်းအင်းတံတားက ရေကြီးတဲ့အရှိန်ကြောင့် ကျိုးပျက်သွားခဲ့ပြီး သွားလာရခက်ခဲသွားတယ်လို့ ပြောပါတယ်။
ဒါ့အပြင် ပင်းတယမြို့နယ်ထဲက ရွာတွေနဲ့ ရပ်စောက်မြို့နယ်ထဲက ကောင်းဘို့ရွာကို ချိတ်ဆက်ထားတဲ့ တံတားလည်း ရေစီးကြောင့် ပျက်စီးပြီး နောက်ထပ်တံတားတစင်းကလည်း ပျက်စီးသွားတာကြောင့် ဒေသခံတွေ သွားလာဖို့ အဆင်မပြေတော့ဘူးလို့ သိရပါတယ်။
ရပ်စောက်မြို့နယ်ထဲမှာလည်း ရေပြန်ကျသွားပေမဲ့ လမ်းတွေပျက်စီးပြီး အိမ်ထဲ ရေဝင်ရောက်တာတွေ ရှိတယ်လို့ သိရပါတယ်။
ကလောမြို့နယ်ထဲက ရပ်ကွက်တွေမှာလည်း မိုးရွာ ရေကြီးတာကြောင့် နေအိမ် ၁၀ လုံးထက်မနည်း ရေနစ်မြုပ်နေပြီး ကားလမ်း ရေကျော်တာကြောင့် သွားလာရ ခက်ခဲတာတွေ ရှိတယ်လို့ ဒေသခံတွေက ပြောပါတယ်။
