ရှမ်းပြည်နယ်တောင်ပိုင်း၊ ပင်းတယမြို့နယ်၊ ကုန်းစောင်းကျေးရွာမှာ မိုးကြီးပြီး တောင်ကျရေနဲ့ အတူ မျောပါသွားတာကြောင့် လူ ၆ ယောက် သေဆုံးပြီး နေအိမ် ၇၀ ကျော် ပျက်စီးသွားတယ်လို့ ဒေသခံတွေထံက သိရပါတယ်။
ဇူလိုင် ၂၇ ရက် ည ၁၂ နာရီ သန်းခေါင်ကျော်မှာ ဖြစ်ပွားခဲ့ပြီး မိုးအဆက်မပြတ် ရွာသွန်းတာကြောင့် တောင်ကျရေ ရုတ်တရက် အားပြင်းစွာ အရှိန်အဟုန်နဲ့ စီးလာလို့ လူနေအိမ်တွေ မျောပါခဲ့တာလို့ ပြောပါတယ်။
ရွာခံတယောက်က “လူအိပ်နေချိန် ရုတ်တရက်ကြီး တောင်ကျရေက စီးကျလာတာ၊ ဒီလို တခါမှလည်း မကြုံဖူးဘူး။ လုံးဝထင်မထားတဲ့ အခြေအနေကြီး ဖြစ်သွားဝာာ။ ခုတော့ သေဆုံးပြီး ရုပ်အလောင်း ၆ လောင်း တွေ့တယ်။ ခု ရေကြီး မိုးရွာနေတုန်းမို့ အကုန်အတည်ပြုလို့ မရသေးဘူး” လို့ ပြောပါတယ်။
လူ ၆ ယောက် သေဆုံးပြီး နေအိမ် အလုံး ၇၀ မျောပါပျက်စီးတဲ့အပြင် ကုန်းစောင်းကျေးရွာထဲက ရွာသား ၅ ယောက်လည်း ပျောက်ဆုံးနေတယ်လို့ ပြောပါတယ်။
အခုတော့ တာဝန်ရှိသူတွေနဲ့ ကယ်ဆယ်ရေးလုပ်ငန်းလုပ်သူတွေ လာရောက်နေပြီး ရွာသားတွေလည်း ဘေးကင်းရာ ရွှေ့ပြောင်းနေရတယ်လို့ ပြောပါတယ်။
ကယ်ဆယ်ရေးအဖွဲ့ဝင်တယောက်က “ခုတော့ ယာယီအနေနဲ့ စီစဉ်ပေးတာပဲ ရှိသေးတယ်။ ရေရှည်ဆို နေရာမရှိသေးဘူး။ အစားအသောက်ပိုင်း၊ ဆေးဝါးပိုင်း၊ စောင်တွေ အခင်းတွေ အရေးပေါ်လိုအပ်တယ်” လို့ ပြောပါတယ်။
ရှမ်းပြည်နယ်တောင်ပိုင်း ပင်လောင်း၊ ညောင်ရွှေ၊ အောင်ပန်း၊ ကလောမြို့တို့မှာ အခုတပတ်အတွင်း မိုးအဆက်မပြတ်ရွာသွန်းတာကြောင့် နေအိမ် ရေမြုပ်တာ၊ တောင်ပြိုတာတွေ ဖြစ်ပေါ်နေတယ်လို့ သိရပါတယ်။
