ပဲခူးတိုင်း၊ တောင်ငူ၊ ထန်းတပင်နဲ့ အုတ်တွင်းမြို့နယ်မှာ ဇူလိုင် ၂၈ ရက် မနက်ပိုင်းက ၁၇ နှစ်အရွယ် လူငယ်တယောက်နဲ့ နောက်ထပ် အမျိုးသား ၂ ယောက် ရေစီးနဲ့မျောပါ သေဆုံးသွားတယ်လို့ အကူအညီပေးနေသူထံကနေ သိရပါတယ်။
ထန်းတပင်မြို့နယ်နဲ့ အုတ်တွင်းမြို့နယ်တို့မှာ စစ်တောင်းမြစ်ရေ မြင့်တက်လာပြီး ရေကြီးရေလျှံ ဖြစ်တာကြောင့် ဒေသခံတွေ ရေဘေးရှောင်နေရချိန် ရေစီးနဲ့မျောပါ သေဆုံးတာပါ။
အကူအညီပေးနေသူတယောက်က “ထန်းတပင်က တယောက်၊ အုတ်တွင်း မြင်းစုရွာက တယောက် ပါသွားတာ။ ရေဘေးရှောင်ရင်း မြင်းစုတံတားရောက်တော့ လမ်းဖြတ်ကူးတဲ့အချိန် ရေတိုက်စားပြီး တံတားကျိုးကျတော့ ရေစီးထဲ မျောသွားတာ။ သူတို့နှစ်ယောက်ကတော့ အလောင်းပြန်ရပြီ။ ၁၇ နှစ် ကောင်လေးကတော့ တောင်ငူ မြတ်စောညီနောင်ဘုရားနားမှာ မျောသွားတာ။ အခုထိတော့ အလောင်းမရသေးဘူး၊ လိုက်ဆယ်နေတယ်”လို့ ပြောပါတယ်။
ပဲခူးတိုင်း တောင်ငူ၊ ထန်းတပင်၊ အုတ်တွင်းနဲ့ မုန်း စတဲ့နေရာတွေမှာ ဇူလိုင် ၂၇ ရက် ညပိုင်းကစပြီး စစ်တောင်းမြစ်ရေ သိသိသာသာ မြင့်တက်လာတာကြောင့် ဒေသခံတွေ ရေဘေးရှောင်နေရပြီး အကူအညီတွေလည်း လိုအပ်နေတယ်လို့ ဒေသခံတယောက်က ပြောပါတယ်။
“အခုတော့ စက်လှေတွေ၊ နောက်ပြီး ထမင်းဘူး၊ ရေသန့်၊ မားမား ဒါတွေတော့ အရေးပေါ် လိုအပ်နေတယ်။ ရေဘေးရှောင်နေရတာကလည်း လူထောင်နဲ့ချီ ရှိနေတယ်။ ရေကလည်း တအားတိုးနေပါတယ်။”
မိုးလေဝသနဲ့ဇလဗေဒ ညွှန်ကြားမှုဦးစီးဌာနကလည်း ပဲခူးတိုင်းအတွင်းမှာရှိတဲ့ စစ်တောင်းမြစ်နဲ့ ရွှေကျင်မြစ်တွေမှာ စိုးရိမ်ရေမှတ်ထက် ကျော်လွန်နေပြီး စိုးရိမ်ရေမှတ်အထက်မှာ ဆက်လက်တည်ရှိနေနိုင်တာကြောင့် ကြိုတင်သတိပြု ရှောင်ရှားကြဖို့လည်း သတိပေးထားပါတယ်။
