TikTok ပေါ်မှာ စစ်ကောင်စီကို ဝေဖန်ရေးသားတာကြောင့် မွန်ပြည်နယ်၊ ရေးမြို့နယ်၊ ရန်ကြီးအောင်ရပ်ကွက်က အမျိုးသမီးတယောက်ကို စစ်ကောင်စီတပ်နဲ့ ရဲတွေက ဖမ်းဆီးခဲ့တယ်လို့ ဒေသခံတွေဆီကနေ သိရပါတယ်။

စစ်ကောင်စီတပ်က ဇူလိုင် ၁၈ ရက် မွန်းလွဲ ၃ နာရီကျော်က ‘yaminLove’ Tiktok အကောင့် ပိုင်ရှင်ဖြစ်တဲ့ မွန်ပြည်နယ်၊ ရေးမြို့နယ်၊ ရန်ကြီးအောင်ရပ်ကွက်က ယမင်း (ခ) လင်းလင်းကို ဖမ်းဆီးခဲ့ပြီး ဇူလိုင် ၂၀ ရက်မှာ ပုဒ်မ ၂ ခုထက်မနည်းတပ်ကာ အမှုဖွင့် အရေးယူထားတယ်လို့ ဆိုပါတယ်။

ဖမ်းဆီးခံရသူနဲ့ နီးစပ်သူက “နိုင်ငံတော်အကြည်ညိုပျက်စေမှု၊ နိုင်ငံတော် တည်ငြိမ်အေးချမ်းရေးကို ပျက်ပြားစေတာတွေကို TikTok ပေါ်မှာ ဝေဖန်ရေးသား ဝါဒဖြန့်နေတယ်ဆိုပြီး ဖမ်းခဲ့တာ။ အခု ပုဒ်မအမျိုးမျိုးနဲ့ အမှုဖွင့်ခံထားရပြီ” လို့ ပြောပါတယ်။

အဖမ်းခံရတဲ့ အမျိုးသမီးကို ရဲတပ်ဖွဲ့က ၅၀၅(က) နဲ့ ၅၀(ည) စတဲ့ ပုဒ်မ ၄ ခုထက်မနည်းနဲ့ အမှုဖွင့် အရေးယူထားတယ်လို့ သိရပါတယ်။

ရဲတပ်ဖွဲ့နဲ့နီးစပ်သူက “CRPH/NUG တွေနဲ့ပါ ပတ်သက်ဆက်နွှယ်နေတယ် ဆိုပြီးတော့ ပုဒ်မတွေ တပ်လိုက်တာ။ အဲဒီအမျိုးသမီးကို ရေးရဲစခန်းမှာ ဖမ်းထားတာလို့ သိရပါတယ်။ အဲဒီရဲစခန်းမှာပဲ အမှုဖွင့်ထားတာ” လို့ ပြောပါတယ်။

စစ်ကောင်စီတပ်နဲ့ ရဲတွေက ယမင်း (ခ) လင်းလင်းရဲ့ မိသားစုဝင်တချို့ကိုပါ စစ်ဆေးထားပြီး ဖုန်းကို သိမ်းယူထားကာ သူနဲ့ပတ်သက်သူတွေကိုပါ စုံစမ်းထောက်လှမ်းရှာဖွေနေတယ်လို့ သိရပါတယ်။