မန္တလေးတိုင်း၊ မိုးကုတ်မြို့အနောက်ပိုင်း ဘော်လုံးကြီးရွာက သားသမီးမရှိတဲ့ မိဘ ၁၀ ယောက်ကို တအာင်းအမျိုးသားလွတ်မြောက်ရေးတပ်မတော် (TNLA) က စစ်မှုထမ်းဖို့ ခေါ်သွားခဲ့ပြီး ဇူလိုင် ၁၈ ရက်မှာ ၆ ယောက်ကို အာမခံနဲ့ ပြန်လွှတ်ပေးခဲ့တယ်လို့ နီးစပ်သူတွေဆီက သိရပါတယ်။

နီးစပ်သူတယောက်က “စစ်မှုထမ်းဖို့ခေါ်သွားပြီး တညအိပ်လိုက်ရတယ်။ နောက်ရက် မနက်ကျ အာမခံနဲ့ ပြန်လွှတ်ပေးတယ်။ ပြည်တွင်းမှာ သားသမီးအလုပ်လုပ်နေတဲ့ မိဘဆိုရင် ၃ လအတွင်း သားသမီးကို စစ်မှုထမ်းဖို့ အာမခံပေးရတယ်၊ ပြည်ပကဆိုရင် အာမခံ ၆ လနဲ့ ပြန်လွတ်လာတယ်” လို့ ပြောပါတယ်။

TNLA က စစ်မှုထမ်းဖို့ ခေါ်သွားသူတွေထဲမှာ TNLA က ခန့်အပ်ထားတဲ့ ဘော်လုံးကြီးရွာ အုပ်ချုပ်ရေးမှူးနဲ့ ရာအိမ်မှူးပါ ပါသွားပြီး ဖမ်းသွားသူ ၁၀ ယောက်ထဲက ကျန်အမျိုးသား ၄ ယောက်ကိုတော့ ပြန်မလွှတ်သေးဘူးလို့ သိရပါတယ်။

ဒေသခံရွာသားတယောက်က “အဝေးမှာ အလုပ်လုပ်နေတဲ့ သားသမီးက ပြန်လာဖို့ အခုအခြေအနေနဲ့ မလွယ်ဘူး။ အာမခံပေးပြီး သူတို့ပြန်ခေါ်လို့ သားသမီးကမလာရင် မိဘက လိုက်ရမယ် ဆိုတာ အဆင်မပြေဘူး။ ကိုယ့်လူမျိုးကို ဒီလိုလုပ်တာ လွန်တယ်” လို့ ပြောပါတယ်။

TNLA က တအာင်းပလောင်လူမျိုးတွေ နေထိုင်တဲ့ မိုးကုတ်ကရွာတွေဖြစ်တဲ့ ပိန်းပြစ်၊ ဗမွန်၊ ဘော်လုံးကြီး၊ ဘော်လုံးလေး၊ ဆင်ခွာ၊ ကျောက်ကြမ်းရွာတွေကနေ တအိမ်တယောက် စစ်မှုထမ်းဖို့ ပြီးခဲ့တဲ့ နှစ်ဆန်းပိုင်းကစပြီး ကောက်ခံနေတာလို့ သိရပါတယ်။

စစ်သားစုဆောင်းတာနဲ့ပတ်သက်လို့ တအိမ်တယောက် တာဝန်ထမ်းရမှာဖြစ်ပြီး စစ်မှုမထမ်းဘဲ ရှောင်တိမ်းရင် အရေးယူတာတွေရှိမယ်လို့ TNLA ရဲ့ ပြောရေးဆိုခွင့်ရှိသူ လွေးယေဦးက အရင်က DVB ကို ပြောခဲ့ဖူးပါတယ်။