ထိုင်း-မြန်မာနယ်စပ်၊ မဲဆောက်မြို့အခြေစိုက် ကလေးသူငယ်တွေနဲ့ အမျိုးသမီးတွေအတွက် လူမှုစောင့်ရှောက်ရေးအဖွဲ့ (SAW) ရုံးကို ဂျပန်အစိုးရက ထောက်ပံ့တဲ့ ကျောင်းကား ၂ စီး လာရောက် ပေးအပ်တဲ့အခမ်းအနားကို  မဲဆောက်မြို့မှာ ဇူလိုင် ၁၈ ရက် ဒီကနေ့ ကျင်းပပါတယ်။

ဂျပန်နိုင်ငံ အစိုးရရဲ့ ပညာရေးပရဟိတအဖွဲ့တွေအတွက် ထောက်ပံ့ခြင်းအစီအစဉ်အရ ဘတ်ငွေ ၁၀ သိန်းကျော်တန်ဖိုးရှိသော ကျောင်းသွား၊ ကျောင်းပြန် သယ်ပို့ကား ၂ စီးကို လာရောက် ထောက်ပံ့ခဲ့တာလို့  SAW အဖွဲ့ ဒါရိုက်တာ ဒေါ်အေးအေးမာက ပြောပါတယ်။

SAW အဖွဲ့ဟာ နယ်စပ်ဒေသရှိ မြန်မာနိုင်ငံက  မိဘမဲ့ကလေးတွေ၊ စွန်ပစ်ခံကလေးတွေ၊ လူကုန်ကူးခံရတဲ့ ကလေးတွေအပါအဝင် အကူညီမဲ့နေတဲ့ အမျိုးသမီးတွေအတွက် ပညာရေးနဲ့ လူမှုကူညီစောင့်ရှောက်ပေးနေတာ ဆယ်စုနှစ် ၂ ခုကျော် ရှိနေပြီဖြစ်ပါတယ်။